نۇرالي امانگەلديەۆ بورودۋليحا اۋدانى جەزكەنت كەنتى مەكتەپ-ليتسەيىنىڭ 8-سىنىبىندا وقيدى. جاڭالىققا جانى قۇشتار جاس ورەن جاقىندا سىبايلاس جەمقورلىققا قارسى وي قالىپتاستىراتىن «ساتىلمايتىن الپامىس» اتتى كومپيۋتەرلىك ويىن جوباسىن ازىرلەپ, جۇرتتى ەلەڭ ەتكىزدى.
نۇرالي وسى جۇمىسىن العاش رەت ۇيىمداستىرىلعان سىبايلاس جەمقورلىققا قارسى جوبالاردىڭ ءى رەسپۋبليكالىق بايقاۋىنا ۇسىنعانى سول, وقۋشىنىڭ ەرەكشە جوباسى ۇزدىك باعالانىپ, «سىبايلاس جەمقورلىققا قارسى مەدياقۇرالدار» باعىتى بويىنشا 1 ملن تەڭگە كولەمىندە اقشالاي سىيلىقپەن ماراپاتتالدى. بالاڭدىعىنا قاراماي, قوعامدىق كەرەعار قۇبىلىستى تەجەۋ ءۇشىن تەر توككەن ەڭبەگىنىڭ ەش كەتپەگەنىن بىلدىرسە كەرەك.
الدىمەن ايتايىق, ءنۇراليدىڭ جاڭا ويىن جوباسىنا جەتەكشىلىك ەتكەن اناسى ناتاليا گەنناديەۆنا ينفورماتيكا پانىنەن اتالعان ءبىلىم وشاعىندا قازاق جانە ورىس تىلدەرىندە ساباق بەرەدى. العاشىندا «جاقسىنى كورمەككە» دەگەندەي, جوبا اۆتورىنىڭ وزىمەن تىلدەسپەك بولىپ اكەسىنە قوڭىراۋ شالعانىمىزدا, ونىڭ «بالداۋرەن» دەمالىس لاگەرىندە ەكەنىن ەستىدىك. اكەسى الماتىدا جۇمىس بابىمەن جۇرگەنىن, مۇمكىندىك بولسا, اناسى ناتاليامەن حابارلاسۋدى سۇراپ, «قازاقشاسى مەنەن جاقسى» دەپ ازىلدەپ قويدى. دەگەنمەن ءازىل بولعانىمەن, شىندىعىندا سولاي ەكەن. ناتاليا ەلۋباەۆانى ۇلىنىڭ جەڭىسىمەن قۇتتىقتاعانىمىز سول, اڭگىمە تيەگىن قازاقشا اعىتىپ قويا بەردى.
ء«نۇراليدىڭ بۇل جوباسىن «ساتىلمايتىن الپامىس» دەپ اتاۋىنىڭ دا ءوز ءمانىسى بار. بارىمىزگە بەلگىلى «الپامىس مەكتەپكە بارادى» دەگەن كينونى ول دا ۇنەمى قىزىعىپ كورەتىن. جاساعان جوباسىنىڭ نەگىزگى يدەياسى – ءبىلىم الۋشىلاردىڭ بويىندا سىبايلاس جەمقورلىققا قارسى مىنەز-ق ۇلىق داعدىلارىن, كۇندەلىكتى ومىردە سىبايلاس جەمقورلىق كورىنىستەرىنە توزبەۋشىلىكتى قالىپتاستىرۋ. سونى جۇزەگە اسىرۋداعى ويلارىن وسى فيلمنەن تاپتى», دەيدى ن.ەلۋباەۆا.
سىبايلاس جەمقورلىققا قارسى ويىن ەلىمىزدەگى سىبايلاس جەمقورلىقتىڭ ناقتى جاعدايلارى نەگىزىندە كوركەم شىعارما فورماتىندا ازىرلەنگەن, بۇل ويىنشىعا اتالعان ماسەلەنىڭ سالدارىن تەرەڭىرەك تۇسىنۋگە كومەكتەسەدى. ءار ەپيزودتىڭ سوڭىندا ويىنشىعا قىلمىستىق كودەكسكە تۇسىنىكتەمە بەرىلەدى. ويىننىڭ سوڭعى ميسسياسى – سىبايلاس جەمقورلىققا قارسى ءىس-قيمىل تۋرالى زاڭناما سالاسىنداعى ءبىلىمىن وسى باستان كەڭەيتە ءتۇسۋ. ويىننىڭ سوڭىندا كوپ ۇپاي جيناعان ويىنشى جەڭىمپاز اتانادى.
كومپيۋتەرلىك ويىندى مەكتەپتە ورتا جانە جوعارى بۋىن وقۋشىلارىنا ويناتىپ, تاجىريبە جاساپ كورگەن. سونداي-اق شىعىس قازاقستان وبلىستىق سىبايلاس جەمقورلىققا قارسى ءىس-قيمىل دەپارتامەنتى ۇيىمداستىرعان وسكەمەن قالاسىنداعى ء«ۇمىت» بالالار لاگەرىنىڭ تاربيەلەنۋشىلەرى دە قىزىعا ويناپتى.
جەتەكشىسىنىڭ ايتۋىنشا, نۇرالي ويىندى ۆيرتۋالدى شىندىقتى پايدالانۋعا بەيىمدەۋدى جوسپارلاپ وتىر. بۇل وزگەرىستەر ويىنعا دەگەن قىزىعۋشىلىقتى ودان ءارى ارتتىرادى. سونىمەن قاتار ويىننىڭ قولجەتىمدىلىگىن ارتتىرۋ جانە كەڭ اۋديتوريا تارتۋ ءۇشىن ونى مەملەكەتتىك تىلگە اۋدارۋدى دا قولعا الماق. ونىڭ بۇل ماقساتىنا اياگوز اۋدانى مىڭبۇلاق اۋىلىندا تۋىپ, اقشاۋلى اۋىلىنان تۇلەپ ۇشقان اناسى ناتاليا گەنناديەۆنا قۋانا قولداۋ كورسەتەرى ءسوزسىز. ويتكەنى جەزكەنتتەگى ءبىلىم وشاعىندا ءدارىس بەرىپ جۇرگەن ۇستاز پاتريوتتىق تۇرعىدا قازاق تىلىنە ءار كەز قۇرمەتپەن قارايتىنىن شىنايى ريزاشىلىعىمەن جەتكىزدى.
اباي وبلىسى