پارلامەنت سەناتىنىڭ توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ اتالعان پاراليمپيادالىق سپورت تۇرىنەن العاش رەت وتكىزىلىپ جاتقان قازاقستان كۋبوگى جولىنداعى جارىستىڭ اشىلۋ راسىمىنە قاتىستى. سايىسقا ەلىمىزدىڭ 10 وڭىرىنەن كەلگەن 11-14 جاس ارالىعىنداعى 64 ءجاسوسپىرىم قاتىسىپ جاتىر. ولاردىڭ قاتارىندا دەبيۋتانتتار دا بار ەكەنىن اتاپ وتكەن ءجون, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
جارىسقا قاتىسۋشىلارعا ساتتىلىك تىلەگەن ماۋلەن اشىمباەۆ قازىرگى تاڭدا بوچچا ەلىمىز بويىنشا ازاماتتارعا قولجەتىمدى سپورت تۇرىنە اينالىپ كەلە جاتقانىن اتاپ ءوتتى. سپورتشىلاردىڭ دا كاسىبي دەڭگەيى ارتىپ كەلەدى. بۇعان قازاقستان بوچچا فەدەراتسياسىنىڭ رەسمي تۇردە حالىقارالىق بوچچا فەدەراتسياسىنىڭ مۇشەسى بولىپ تىركەلۋى جانە ەل چەمپيوناتىنىڭ وتكىزىلۋى ايقىن دالەل. سونداي-اق قازاقستان قۇراماسىنىڭ ازيا پاراليمپيادا ويىندارىنا قاتىسىپ, جالپىكوماندالىق ەسەپتە سەگىزىنشى ورىن العانىن دا اتاپ وتكەن ءجون. پالاتا سپيكەرى بۇل جەتىستىكتەر سپورتشىلاردىڭ ەرىك-جىگەرىنىڭ جانە ەلىمىزدە جۇرگىزىلىپ جاتقان ينكليۋزيۆتى ساياساتتىڭ ناتيجەسى ەكەنىن ايتتى. وسىعان بايلانىستى مەملەكەت باسشىسىنىڭ تاپسىرماسى بويىنشا ەلىمىزدە ەرەكشە قاجەتتىلىكتەرى بار ازاماتتاردى قولداۋ جانە ولارعا قولايلى جاعداي جاساۋ باعىتىندا اۋقىمدى جۇمىس اتقارىلىپ جاتىر.
«پرەزيدەنتىمىز قاسىم-جومارت كەمەل ۇلى توقاەۆ بارلىق سالادا ينكليۋزيۆتىلىك قاعيداتىن ىسكە اسىرۋعا باسا ءمان بەرىپ كەلەدى. وسى ورايدا مەملەكەت باسشىسىنىڭ تاپسىرماسىنا سايكەس ينكليۋزيۆتى سپورت تۇرلەرىن دامىتۋ ءۇشىن ءتيىستى جاعداي جاسالىپ جاتىر. بۇل رەتتە بوچچا سياقتى سپورت تۇرلەرىنە دە ۇلكەن قولداۋ كورسەتىلىپ وتىر. بۇگىندە استانادا جانە ءىرى قالالاردا عانا ەمەس, ەلىمىزدىڭ وزگە دە وڭىرلەرىندە بوچچاعا دەگەن قىزىعۋشىلىق ارتىپ كەلە جاتىر. سوندىقتان الداعى ۋاقىتتا وبلىستاردا جاڭا فەدەراتسيالار اشىلادى دەپ سەنەمىز. وسىنداي ناقتى قادامدار بوچچاشىلارىمىزدى پاراليمپيادا ويىندارىنىڭ جەڭىس تۇعىرىنا جەتەلەيتىنى انىق», دەدى ماۋلەن اشىمباەۆ.
فەدەراتسيا پرەزيدەنتىنىڭ ايتۋىنشا, قازىرگى تاڭدا پاۆلودار, قاراعاندى, ماڭعىستاۋ, اتىراۋ, قوستاناي, اباي جانە جەتىسۋ وبلىستارىندا بوچچادان وڭىرلىك فەدەراتسيالار اشۋ جۇمىستارى جۇرگىزىلىپ جاتىر.
بوچچادان قازاقستان كۋبوگى جولىنداعى جارىستى تۋريزم جانە سپورت مينيسترلىگىنىڭ قولداۋىمەن قازاقستان بوچچا فەدەراتسياسى ۇيىمداستىردى. سونداي-اق سايىسقا استانا قالاسى دەنە شىنىقتىرۋ جانە سپورت باسقارماسى, «سامۇرىق-قازىنا» اق جانە «Sport Qory» تۋريزم جانە سپورت يندۋسترياسىن قولداۋ قورى قولداۋ كورسەتتى.