سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز ەلىمىزدەگى سۋ قورىنىڭ 1%-ى عانا تۇرعىنداردى اۋىز سۋمەن قامتۋعا جۇمسالاتىنىن مالىمدەدى, دەپ حابارلايدى Egemen.kz.
جىل سايىن قازاقستان اۋماعىندا 102,3 تەكشە شاقىرىم سۋ قورى جينالادى. ونىڭ ىشىندە 1,2 تەكشە شاقىرىمى, ياعني, جالپى سۋ كولەمىنىڭ 1%-دان استامى تۇرعىنداردى اۋىز سۋمەن قامتۋعا جۇمسالادى.
پارلامەنت ءماجىلىسىنىڭ دەپۋتاتى سەرگەي پونومارەۆپەن ديالوگ بارىسىندا سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز تۇرعىنداردى ساپالى اۋىز سۋمەن قامتاماسىز ەتۋ جۇمىستارى تۋرالى ايتتى.
ەكونوميكانىڭ قاجەتتىلىكتەرى ءۇشىن جىلدىق سۋ تۇتىنۋ شامامەن 25 تەكشە شاقىرىمدى قۇرايدى. ونىڭ 65 پايىزى اۋىل شارۋاشىلىقتىڭ, 25 پايىزى ونەركاسىپتىڭ قاجەتتىلىكتەرىنە باعىتتالادى.
«سول سەبەپتى قازاقستان حالقى اۋىز سۋدان تارىعادى دەپ ايتۋعا بولمايدى. بارلىق نورماتيۆتىك قۇجاتتاردا, سۋ كودەكسىندە ەڭ ءبىرىنشى ورىندا ازاماتتارىمىزدى اۋىز سۋمەن قامتاماسىز ەتۋ ماسەلەسى تۇر. ءبىز الداعى 2 جىلدا ەلىمىزدىڭ بارلىق ءوڭىرىن ورتالىقتاندىرىلعان سۋ جۇيەسىمەن قامتاماسىز ەتۋدى جوسپارلاپ وتىرمىز. قانداي تابيعي جاعداي بولماسىن, كليماتتىڭ وزگەرۋى نەمەسە ترانسشەكارالىق سۋ رەسۋرستارىنىڭ ازايۋى اۋىز سۋ تاپشىلىعىنا اكەلمەيدى. سەبەبى تۇرعىندارعا قاجەتتى اۋىز سۋ كولەمى جالپى سۋ قورىنىڭ 1%-ىن عانا قۇرايدى», دەدى ۆيتسە-مينيستر.