قاشان دا قازاق رۋحانياتىنىڭ قاينار كوزى سانالاتىن سەمەي شاھارىنداعى شاكارىم ۋنيۆەرسيتەتى جانىنان م.اۋەزوۆ اتىنداعى ادەبيەت جانە ونەر ينستيتۋتىنىڭ فيليالى اشىلدى.
ۇلت رۋحانياتىنا ءىز قالدىرعان تۇلعالاردىڭ مۇرالارىن, تاريحتاعى تاعدىر جولىن تۇگەندەپ, تۇبەگەيلى زەرتتەۋ جولىندا ۇلكەن ءىس اتقارىپ كەلە جاتقان بۇل ينستيتۋتتىڭ ورنى ايرىقشا. ال ونىڭ وڭىرلەردە فيليالدارىنىڭ اشىلۋىنىڭ العاشقى قادامى اباي وبلىسىنان باستاۋ العانى دا كوپ جايدى اڭعارتسا كەرەك. ويتكەنى سەمەي ەرتەدەن ۇلىلار مەكەنى رەتىندە تانىمال.
ايتۋلى وقيعاعا سەمەيدەگى زيالى قاۋىم وكىلدەرى, ءتىل جانە ادەبيەتتانۋ, ونەر سالاسىنداعى اتى بەلگىلى عالىمدار, باق وكىلدەرى مەن م.اۋەزوۆ اتىنداعى ادەبيەت جانە ونەر ينستيتۋتىنىڭ ۇجىمى قاتىستى.
تاريحقا جۇگىنسەك, م.اۋەزوۆ اتىنداعى ادەبيەت جانە ونەر ينستيتۋتى مەن شاكارىم ۋنيۆەرسيتەتىنىڭ ىرگەتاسى ءبىر جىلدا, 1934 جىلى قالانىپتى. قۇتتىقتاۋ ءسوز سويلەگەن شاكارىم ۋنيۆەرسيتەتىنىڭ باسشىسى دۋمان ورىنبەكوۆ ءىس-شارانىڭ ەرەكشەلىگى مەن ماڭىزىن اتاپ ءوتتى.
– سەمەي ەلى – ونەردىڭ قايناعان ورتاسى. العاشقى اۋەسقويلار تەاتردىڭ نەگىزى دە سەمەي جەرىندە قالانعانى ايتىلادى. وڭىرىمىزدەگى تەاترتانۋ عىلىمىنىڭ دامۋى, ونداعى ماسەلەلەر دە وسى فيليالدىڭ نەگىزگى زەرتتەۋ نىسانى بولماق, – دەدى رەكتور.
ءوز كەزەگىندە م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ شاكارىم ۋنيۆەرسيتەتىنىڭ باسشىلىعىنا فيليالدىڭ اشىلۋىنا قولداۋ كورسەتكەنى ءۇشىن العىسىن ءبىلدىردى.
فيليالدىڭ اشىلۋى ءارى قاراي «سەمەي فيليالى: وڭىردەگى ادەبيەتتانۋ, ونەرتانۋ سالالارىنىڭ وزەكتى ماسەلەلەرى» اتتى تاقىرىپتاعى دوڭگەلەك ۇستەل وتىرىسىمەن جالعاستى. وندا قازاقستاننىڭ ەڭبەك سىڭىرگەن قايراتكەرى, فيلولوگيا عىلىمدارىنىڭ دوكتورى, پروفەسسور اراپ ەسپەنبەتوۆ «عىلىمي مەكتەپ, ونىڭ قالىپتاسۋ, دامۋ جولدارى», فيلولوگيا عىلىمدارىنىڭ كانديداتى, دوتسەنت اقمارال سماعۇلوۆا «جاس ادەبيەتشىلەر كلۋبى», PhD قارلىعاش اۋباكىروۆا «قازىرگى قازاق ادەبيەتىنىڭ وزەكتى ماسەلەلەرى» تاقىرىپتارى نەگىزىندە تولىمدى بايانداما جاسادى.
م.اۋەزوۆ اتىنداعى ادەبيەت جانە ونەر ينستيتۋتىنىڭ سەمەي فيليالى ديرەكتورى قىزمەتىنە تاعايىندالعان فيلولوگيا عىلىمدارىنىڭ دوكتورى, پروفەسسور باۋىرجان ەردەمبەكوۆ ءوز جۇمىستارىنىڭ نەگىزگى باعىتتارىمەن تانىستىرىپ, الداعى جوسپارى مەن ماقسات-مىندەتتەرىنەن حاباردار ەتتى.
– شاپاعاتى جالپاق قازاق جۇرتىنا جەتكەن تۋعان ولكەمىزدەگى تۇلعالاردى دارىپتەۋ, ولاردىڭ رۋحاني مۇراسىن بۇگىنگى ۇرپاق يگىلىگىنە جاراتۋ ماقساتىندا 2021 جىلدان باستاپ شاكارىم ۋنيۆەرسيتەتىندە «سەمەي رۋحى» كەشەندى جوباسىن ىسكە قوستىق. بۇل جوبانىڭ ءبىر تارماعى ادەبي ولكەتانۋ, تاريح پەن ونەر, تاريحي ولكەتانۋ ماسەلەلەرىن قامتيدى. بولاشاقتا بۇل فيليال شىعىس قازاقستان, پاۆلودار, اباي وبلىستارىندا ادەبيەتتانۋ, ونەرتانۋ عىلىمىنىڭ دامۋىنا ىقپال جاساپ, ادەبيەت, ونەر بويىنشا وزەكتى ماسەلەلەردىڭ شەشىمىن تاپپاقشى, – دەدى ب.امانكەلدى ۇلى.
فيليال جۇمىسى ءوڭىر بويىنشا وزەكتى تاقىرىپتاردى قاراستىرۋدى قولعا الماق. اتاپ ايتقاندا, ادەبي, مادەني, تاريحي ولكەتانۋ ماسەلەلەرى, ابايدىڭ «تولىق ادام», شاكارىمنىڭ «ار ءبىلىمى» كونتسەپتسيالارى, جاڭا تۇركى داۋىرىندەگى قازاق ادەبيەتىنىڭ ءرولى, سولتۇستىك-شىعىس ءوڭىرى اقىن-جازۋشىلارىنىڭ ادەبي تىنىسى, م.اۋەزوۆتىڭ سەمەيدەگى كەزەڭى سياقتى سۇبەلى زەرتتەۋلەرىمەن ۇلت رۋحانياتىنىڭ قورجىنىن تولىقتىرا تۇسپەك.