ماحامبەت جىرى شىرقالدى

جىر سايىسىنا ەلىمىزدىڭ ءار وڭىرىنەن 7 جىرشى-تەرمەشى قاتىستى. ەكى كەزەڭ بويىنشا باق سىناعان ونەرپازدارعا قۇرامىندا قازاقستاننىڭ ەڭبەك سىڭىر­گەن قايراتكەرى, جىراۋ ۇلجان باي­بو­سىنوۆا, قازاقستاننىڭ ەڭبەك سىڭىرگەن قايراتكەرى, ءداستۇرلى ءانشى, جىرشى-تەرمەشى حاتيموللا بەر­دىعاليەۆ, فيلولوگيا عىلىمدارىنىڭ دوكتورى, پروفەسسور مۇرات سابىر, حالىقارالىق, رەسپۋبليكالىق جىرشى-تەرمەشىلەر كونكۋرستارىنىڭ لاۋرەا­تى فارحات ورازوۆ, باتىس قازاقستان وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى قۋانىشبەك مۇحانعاليەۆ بار قازىلار القاسى تورەلىك جاسادى. اۋەلگى كەزەڭدە ماحامبەتكە ارناعان جىر-تولعاۋدى ورتاعا سالعان جىرشىلار داڭقتى باتىردىڭ ءوز شىعارمالارىن دا ورتاعا سالدى. سونىڭ ىشىندە «كۇن قايدا؟», ء«اي, ماحامبەت, جولداسىم!», «تارلانىم», «سوعىس», «ەمەننىڭ ءتۇبى – سارى بال», «نارىندا», «ماحامبەتتىڭ بايماعامبەت سۇلتانعا ايتقان ءسوزى», «ادىرا قالعان نارىننىڭ», «ەڭسەلىگىم ەكى ەلى», «ارعىماق, سەنى ساقتادىم» سىندى تولعاۋلارىن جاتقا ايتۋ مىندەتتەلدى. ال ەكىنشى كەزەڭدە سايىسقا قاتىسۋشىلار ىعىلمان شورەك ۇلىنىڭ «يساتاي-ماحامبەت» داستانىنان 20-30 مينۋتتىق ءۇزىندى ورىندادى.

اسا تارتىستى وتكەن سايىستىڭ باس جۇلدەسىنە تىگىلگەن 1 000 000 تەڭگە قىزىلوردا وبلىسىنان كەلگەن نۇرايىم ەرتالاپقا بۇيىردى.

I ورىن جانە 800 مىڭ تەڭگە جۇلدەنى اقتوبەلىك باقىت ارىستانعاليەۆا جە­ڭىپ الدى. II ورىن (700 مىڭ تەڭگە) باتىس­قازاقستاندىق ءساتجان عالىمجانوۆقا تيسە, ءىII ورىن مەن 500 مىڭ تەڭگە قىزىلوردا وبلىسىنىڭ تاعى ءبىر وكىلى ۇلدانا نۇرتۋعاننىڭ قانجىعاسىنا بايلاندى.

وزگە قاتىسۋشىلار دا قۇر قالمادى. ماحامبەت وتەمىس ۇلى اتىنداعى ارنايى جۇلدە مەن 220 مىڭ تەڭگە – ماڭعىستاۋ وبلىسىنىڭ جىرشىسى ايسۇلتان ەسەن­عاليەۆكە, يساتاي تايمان ۇلى اتىنداعى ارنايى جۇلدە مەن 220 مىڭ تەڭگە – اتىراۋ وبلىسىنان كەلگەن امانجول داۋىل­باەۆقا, ال كاسىپكەر ەرمەك مالىك­ ۇلىنىڭ ارنايى جۇلدەسى (200 مىڭ تەڭگە) – باتىس قازاقستان وبلىسىنىڭ وكىلى تەمىرلان اكىمجانوۆقا تابىستالدى.

قازىلار القاسىنا جانە بارشا قاتى­سۋشىعا وبلىس اكىمى ناريمان تورە­عاليەۆتىڭ اتىنان العىسحات تابىستالدى.

باتىس قازاقستان وبلىسى