ازەربايجان پرەزيدەنتى سپەكا سامميتىنە قاتىسۋعا كەلگەنى ءۇشىن قاسىم-جومارت توقاەۆقا العىس ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
يلحام اليەۆ قازاقستان پرەزيدەنتىن كەلەسى جىلى ازەربايجانعا مەملەكەتتىك ساپارمەن كەلۋگە شاقىردى. كەزدەسۋ بارىسىندا مەملەكەتتەر باسشىلارى كاسپي تەڭىزىنىڭ تابانىمەن تالشىقتى-وپتيكالىق بايلانىس جەلىسىن تارتۋ, ازەربايجان اۋماعى ارقىلى قازاقستان مۇنايىن تاسىمالداۋ كولەمىن ۇلعايتۋ, ترانسكاسپي حالىقارالىق كولىك ءدالىزىن دامىتۋ, سونداي-اق ەنەرگەتيكا مەن جاڭارتىلاتىن ەنەرگيا كوزدەرى سالالارىنداعى پەرسپەكتيۆتى جوبالاردى جۇزەگە اسىرۋ سياقتى ماڭىزدى باعىتتاردا بىرلەسكەن جۇمىستاردى جانداندىرۋ مۇمكىندىكتەرىن تالقىلادى.
باۋىرلاس حالىقتار اراسىنداعى مادەني-گۋمانيتارلىق بايلانىستاردى ودان ءارى نىعايتۋعا باسا ءمان بەرىلدى. جۋىق ارادا قازاقستاندا ازەربايجاننىڭ, ال ازەربايجاندا قازاقستاننىڭ مادەنيەت كۇندەرى ۇيىمداستىرىلادى.