ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «قازاق ليريكاسى جانە مارفۋعا بەكتەمىروۆا پوەزياسى» اتتى حالىقارالىق عىلىمي-تاجىريبەلىك كونفەرەنتسيا ءوتتى. بەلگىلى اقىن ءھام اۋدارماشى, پۋبليتسيست مارقۇم مارفۋعا بەكتەمىروۆانىڭ شىعارماشىلىعىنا ارنالعان رۋحاني ءىس-شارادا قازاق جىرىنىڭ ءورىسى, تاربيەلىك ءمانى مەن تانىمدىق سيپاتى تۋرالى تاقىرىپتار قوزعالدى.
كونفەرەنتسيادا ۋنيۆەرسيتەتتىڭ الەۋمەتتىك-مادەني دامۋ جونىندەگى پرورەكتورى ءلاززات نۇرقاتوۆا ءسوز سويلەدى, زيالى قاۋىم وكىلدەرى مەن عالىمدار بايانداما جاسادى. عىلىم جانە جوعارى ءبىلىم ءمينيسترى ساياسات نۇربەك پەن «amanat» پارتياسىنىڭ اتقارۋشى حاتشىسى داۋلەت كارىبەكتىڭ اقىن شىعارماشىلىعىنىڭ ءمانى مەن ماڭىزىن ەرەكشەلەگەن قۇتتىقتاۋ حاتتارى وقىلدى. فيلولوگيا عىلىمدارىنىڭ دوكتورى, پروفەسسور, اقىن جانات ايمۇحامبەت بايانداماسىندا اقىن شىعارماشىلىعىنا جان-جاقتى توقتالدى.
«مارفۋعانىڭ سىرشىل دا نازىك جاندى اقىن ساناسىندا ورنىققان اياۋلى ۇعىمدار ونىڭ ولەڭدەرىنىڭ تامىرى بولىپ بۇلكىلدەپ, ارمانى مەن اڭسارىن, ومىرلىك ۇستانىمىن, وزىندىك بولمىسىن ايقىندايدى. اسىرەسە تازالىقتى, مەيىرىمدى, ادالدىقتى توعىستىرعان مولدىرلىك – مارفۋعانىڭ اقىندىق تابيعاتىن اڭعارتاتىن پوەتيكالىق بەينەگە اينالعان. اقىننىڭ الەمى ەلەۋسىز عانا اققانىمەن, وزگەلەردى وزىنە ەرىكسىز تارتاتىن ءموپ-ءمولدىر بۇلاق ءتارىزدى», دەپ تۇيىندەدى ول بايانداماسىن.
جازۋشى, پۋبليتسيست باقىت رۇستەموۆ, ءتىل ساياساتى كوميتەتىنىڭ توراعاسى ەربول تىلەشوۆ جىلى لەبىز ءبىلدىرىپ, جازۋشىلار وداعى استانا فيليالىنىڭ ديرەكتورى, اقىن داۋلەتكەرەي كاپ ۇلى اقىننىڭ ولەڭ ولكەسىندەگى ورنەگىنە نازار اۋدارسا, قىرعىز رەسپۋبليكاسىنىڭ ي.اراباەۆ اتىنداعى مەملەكەتتىك ۋنيۆەرسيتەتىنىڭ پروفەسسورى ايدا ەگەمبەرديەۆا ونلاين قاتىسىپ, بايانداما جاسادى.
اقىن شىعارماشىلىعىن كەزىندە اقسەلەۋ سەيدىمبەك: «جاي سەزىم ەمەس, پوەزياعا اينالعان سەزىم. ازاپتى اقىلعا جەڭدىرۋ, اقىلدى اللا اتىمەن ۇشتاستىرۋ پوەزيا مارتەبەسىن ودان سايىن بيىكتەتىپ تۇر. مۇنداي پوەزيا جانىڭدى جادىراتادى, رۋحىڭدى اسقاقتاتادى. مارفۋعا ءۇشىن اياۋلى سەزىم مەن اسقاق رۋحتىڭ تۇعىرى تۋعان جەر, اتامەكەن, قازاقتىڭ قادىر-قاسيەتى», دەپ باعالاعانى بەلگىلى.
اقمولا وبلىسىندا دۇنيەگە كەلگەن مارفۋعا بەكتەمىروۆا سوڭىنا از مۇرا قالدىرماعان. «جانارى ءجاۋدىر دۇنيە», «ايدىنىم مەنىڭ», «عاشىق جۇرەك», «ەڭلىكگۇل», «مەنىڭ اتلانتيدام», «اققۋىم, مەنىڭ قايداسىڭ؟», «وزەرا دۋشي», «بەلىي پارۋس مەچتى» جىر جيناقتارىنىڭ اۆتورى. شىعارمالارى بىرنەشە ۇجىمدىق جيناقتار مەن انتولوگيالارعا ەنگەن. ورىس اقىنى اننا احماتوۆانىڭ ولەڭدەرىن اۋدارعان.
ءىس-شارا اقىننىڭ جارى, قازاقستان جۋرناليستەر وداعى سىيلىعىنىڭ لاۋرەاتى ەسەنگەلدى ءسۇيىنوۆتىڭ سوزىمەن قورىتىندىلاندى.