ەلىمىزدىڭ 20 ميلليونىنشى تۇرعىنى اتانعان بەس ءسابيدىڭ ءبىرى اتىراۋ قالاسىندا ومىرگە كەلدى. جۇماعازيەۆتەر وتباسىنىڭ تۇڭعىش ءسابيىنىڭ ەسىمى - مۋحامماد. بۇگىن اتىراۋ وبلىسىنىڭ اكىمى سەرىك شاپكەنوۆ قالالىق پەريناتالدىق ورتالىعىنا بارىپ, اقجولتاي قۋانىشقا كەنەلگەن وتباسىنى قۇتتىقتادى. ءسابيدىڭ تۋ تۋرالى كۋالىگىن اتا-اناسىنا تابىس ەتتى.
– التى الاش ءۇشىن اق تۇيەنىڭ قارنى جارىلعان بۇل كۇننىڭ استارىندا مەملەكەتتىڭ جاڭا ەكونوميكالىق, ينفراقۇرىلىمدىق سىن-قاتەرلەردى ەڭسەرە الۋى مەن جاc ۇرپاقتىڭ دامۋى ءۇشىن قولايلى جاعداي جاساۋى جاتقانىندا ەش داۋ جوق. مەملەكەتتىك وتباسىلىق ساياساتتىڭ باستى ماقساتى – ءومىردىڭ بارلىق سىناعىنا تويتارىس بەرە الاتىن ۇرپاق تاربيەلەۋ. مىنە, بۇگىن قازاقستان حالقى 20 ميلليون ادامعا جەتتى. بۇل – سۇيىنشىلەيتىن اقجولتاي حابار! بۇل سۇيىنشىلەتەتىن اقجولتاي حابار! «قۇبىلعان الەم جارىسى – اقىلدى جاننىڭ تابىسى» دەپ شاكارىم بابامىز ايتقانداي, بۇل قۋانىش – ەلىمىزدىڭ كوكجيەكتەن كورىنگەن قانداي دا ءبىر داۋىلدىڭ قۋاتىن, ەكپىنىن ەڭسەرىپ, بولاشاققا نىق قادام باسۋىنىڭ بەلگىسى, دەدى سەرىك شاپكەنوۆ.«وتباسى بانك» اق وبلىستىق فيليالىنىڭ ديرەكتورى نۇرجان مۇعالىموۆ جۇماعازيەۆتەر وتباسىنا 2 ملن تەڭگەنىڭ سەرتيفيكاتىن تابىس ەتتى. بۇل قارجىنى بالانىڭ بولاشاقتاعى قاجەتتىلىگى ءۇشىن بانك دەپوزيتىنە سالىپ, مۇحاممادتىڭ وقۋىنا نەمەسە باسپانا الۋىنا پايدالانادى.
مۇحامماد قوساي 14 قاراشادا دۇنيەگە كەلدى. بويى - 54 سم, سالماعى - 3 660 گرامم. اكەسى بەرىك جۇماعازيەۆ, اناسى ايدانا ورازىمبەتوۆا. تاريحي ساتتە قۋانىشىن جاسىرا الماعان اكەسى بەرىك جۇماعازيەۆ كورسەتىلگەن قۇرمەت ءۇشىن ريزاشىلىعىن ءبىلدىردى.
– تاڭەرتەڭ الەۋمەتتىك جەلىدە ەلىمىزدىڭ 20 ميلليونىنشى ازاماتى ومىرگە كەلدى دەگەن جاڭالىقتى وقىدىم. ىشتەي مەنىڭ دە ۇلىم وسىلاردىڭ قاتارىندا عوي دەپ ويلادىم. ءدال سول ساتتە جۇبايىم حابارلاسىپ, قۋانىشتى جاڭالىقتى ايتتى. ءبىزدىڭ ءتورت جىلدان بەرى اڭساپ كۇتكەن ءسابيىمىز ءوزىنىڭ نەسىبەسىن ەلىنىڭ بەرەكەسىمەن بىرگە اكەلدى. بولاشاقتا وتانىن سۇيگەن, ەلىنە, ۇلتىنا, دىنىنە ادال قىزمەت ەتەتىن پەرزەنتتەن بولسا ەكەن دەگەن تىلەگىم بار, دەدى بەرىك جۇماعازيەۆ.
اتىراۋ وبلىسىندا جىل باسىنان بەرى 14 مىڭعا جۋىق ءسابي دۇنيەگە كەلگەن.