وزگە ەتنوس وكىلدەرى دە جاپپاي اتسالىستى

جالپى, وبلىس بويىنشا اۋدان اكىمدەرىنىڭ سايلاۋىنا بارلىعى 94 سايلاۋ ۋچاسكەسى بەكىتىلدى. ونىڭ 60-ى كەربۇلاق اۋدانىندا بولسا, قالعانى سار­قان اۋدانىنا تيەسىلى. ءتۇرلى سەبەپكە بايلانىستى 5 سايلاۋ ۋچاسكەسى جۇمىس ىستەمەدى. ودان بولەك 2 اۋداندىق اۋماق­تىق كوميسسيالاردىڭ 21 مۇ­شەسى, ۋچاسكەلىك سايلاۋ كو­ميس­­سيالارىنىڭ 538 مۇشەسى جۇ­مىلدىرىلدى. ەكى اۋداننىڭ سايلاۋشىلار سانى 54 634 ادامدى قۇرايدى. كەربۇلاقتا – 27 787, سارقاندا 26 847 ادام تاڭداۋ جاساۋعا قۇقىلى.

جايناق باتىر اۋى­لىندا №211 سايلاۋ ۋچاسكەسىنە اتتىڭ قۇلاعىندا وينايتىن «جايناق» كوكپار قۇراماسىنىڭ شاباندوزدارى داۋىس بەردى.

«كونستيتۋتسيالىق قۇقىعى­مىز­دى پايدالانىپ, داۋىسىمىزدى بەردىك. اۋدانىمىز حا­لىق تاڭداعان اكىم كومەگىمەن گۇل­دەنەرى انىق», دەيدى كوك­پارشىلار. ولار جاڭا اكىم ۇلت­تىق ويىندارىمىزدى ۇلىق­­تاسا دەگەن ۇسىنىسىن دا ءبىل­دىردى. سونىمەن قاتار وزگە ەتنوس وكىلدەرى دە بەلسەندىلىك تانىتتى. التىنەمەل اۋىلدىق وكرۋگىندە – 317, ال تاستىباستاۋ اۋىلىندا 35 چەشەن ۇلتى ءومىر سۇرەدى. سولاردىڭ بارلىعى ءوز تاڭداۋىن جاساپ, اۋداننىڭ جاندانۋىن تىلەدى.

كەربۇلاق اۋدانى سايلاۋ كوميسسياسىنىڭ توراعاسى جانات بۋراحانوۆ زاڭ اياسىندا ەشقانداي قۇقىق بۇزۋشىلىق بولماعانىن جەتكىزدى. «اۋدا­نىمىزداعى 60 سايلاۋ ۋچاس­كەسىنىڭ 59-ى جۇمىس ىستەپ وتىر. قازىرگى ۋاقىتتا ولكە تۇر­عىن­دارىنىڭ دەنى ءوز داۋىسىن بەردى. ناۋقان بايقاۋشىلاردىڭ قا­تىسۋىمەن, زاڭ اياسىندا ءوتىپ جاتىر», دەيدى ج.بۋراحانوۆ.

ايتا كەتەيىك, جەتىسۋ وڭى­رىندەگى ەكى اۋداننىڭ اكى­مىن سايلاۋ دوداسىنا 14 كانديدات ۇسىنىلدى. ون كانديداتتى التى ساياسي پارتيا ۇسىن­سا, قالعانى ءوزىن-ءوزى ۇسىنعان. ۇمىت­كەر­لەردىڭ كوبى – مەم­لە­كەتتىك قىزمەتكەرلەر. ولاردىڭ ورتاشا جاسى – 46, ونىڭ ىشىندە بىرەۋى – ايەل. ال ەڭ كەن­جەسى 36 جاستاعى «رەس­پۋب­لي­كا» پارتياسىنىڭ سار­قان اۋدا­نىن­داعى كانديداتى. ءتۇرلى سە­بەپ­پەن ون كانديدات سايلاۋ دودا­سىنان شىعىپ قالدى. وسى­لايشا, ءار وبلىستا جەر­گى­لىكتى تۇرعىندار «Amanat» جانە «Respublica» پارتيالارى ۇسىن­عان ەكى كانديداتتىڭ ىشىنەن جاڭا اكىمدى تاڭدادى.

جەتىسۋ وبلىسى