رەسەيدەگى قازاقستاننىڭ ەلشىلىگىندە «شاكارىم – اباي مۇراسىنىڭ ءىزباسارى» اتتى دوڭگەلەك ۇستەل ءوتتى. اباي اماناتىنا ادالدىق تانىتىپ, كوكجيەگىن كەڭەيتكەن قازاق ويشىلىنىڭ 165 جىلدىق مەرەيتويى رەسەيدە وتۋىنە قازاقستاننىڭ ەلشىلىگى مۇرىندىق بولدى.
شاكارىمتانۋدىڭ ءتۇبى ار ءىلىمى عانا ەمەس, قازاقتانۋ, مۇسىلمانتانۋ بولىپ كەتە بەرەتىنى بەلگىلى. سەمەيدەگى شاكارىم ۋنيۆەرسيتەتى اقىن مۇرالارىنىڭ دامۋىنا ايتارلىقتاي ۇلەس قوسىپ كەلە جاتقانى جانە بار. دوڭگەلەك ۇستەلگە ارنايى شاقىرىلعان ۋنيۆەرسيتەت جانىنداعى «شاكارىم» مۋزەيىنىڭ باسشىسى تۇردىقۇل شاڭباي «شاكارىم فەنومەنى» تاقىرىبىندا ءسوز سويلەگەندە وسىعان توقتالدى. وتاندىق عىلىمنىڭ ولجاسىنا اينالماق «شاكارىمتانۋ ماسەلەلەرى» اتتى ىرگەلى سەريالىق عىلىمي جيناقتى دا اتالعان ۋنيۆەرسيتەت شىعارۋ ۇستىندە.
سەمەيدەگى شاكارىم ۋنيۆەرسيتەتىنىڭ تۇلەگى ايجان امان-جول دايىنداعان «شاكاريم. يزبراننوە» جيناعىمەن قاتار, «شاكارىم» تۇلعالىق ەنتسيكلوپەدياسى مەن مۇحتار ماعاۋيننىڭ دايىنداۋىمەن 1978 جىلى لەنينگرادتا جارىق كورگەن «پوەتى كازاحستانا» جيناعىن ەلشىلىككە سىيعا تارتتى.
مادەني-عىلىمي ءىس-شارا بارىسىندا تۇردىقۇل شاڭباي شاكارىم شىعارمالارىن ورىس تىلىندە ماسكەۋدەن شىعارۋ تۋرالى باستاما كوتەردى. قازاقستاننىڭ رەسەيدەگى توتەنشە جانە وكىلەتتى ەلشىسى داۋرەن اباەۆ قولدايتىنىن جەتكىزدى. «حۋدوجەستۆەننايا ليتەراتۋرا» باسپاسىنىڭ باس رەداكتورى گ.پرياحينمەن بىرلەسە اقىن شىعارمالارىن شىعارۋ جونىندە كەلىسىم جاسالدى.
قازاق مادەنيەتى مەن ونەرىن ناسيحاتتاۋدا رەسەيدەگى قازاقستان ەلشىلىگى بىرقاتار جوبانى ىسكە اسىرىپ جاتىر. وسى دوڭگەلەك ۇستەل ۇستىندە «تريستا كازاحسكيح سكازوك» اتتى ەكى تومدىقتىڭ تۇساۋكەسەر ءراسىمى ءوتتى. اتالعان ءىس-شاراعا جازۋشى, حالىقارالىق جۋرناليست ۆ.سنەگيروۆ, ادەبيەتتانۋشى عالىم ۆ.وگرىزكو, جازۋشى گ.پرياحين سىندى ءبىر توپ رەسەيلىك زيالى قاۋىم وكىلدەرى قاتىستى.