قىزىلوردادا كۇزگى جيىن-تەرىنمەن قاتار الداعى جىلۋ بەرۋ ماۋسىمىنا دا دايىندىق ءجۇرىپ جاتىر. ماماندار ەسەبىنشە, الداعى قىسقا 238 مىڭ توننا كومىر قاجەت, بۇگىندە وسىنىڭ ءبىراز بولىگى جەتكىزىلدى. تونناسى 16-21 مىڭ تەڭگە ارالىعىندا ساتىلادى. جالپى, وبلىس بويىنشا 41 وڭىرلىك وپەراتور جانە 11 كومىر قويماسى بار.
جۋىردا وبلىس اكىمى نۇرلىبەك نالىباەۆتىڭ توراعالىعىمەن كومىر قورىن جاساقتاۋعا ارنالعان جيىندا كەيبىر اۋدانداردىڭ جاۋاپتى كەزەڭگە دايىندىعى كەمشىن ەكەنى ايتىلدى. ايماق باسشىسى جىلۋ بەرۋ ماۋسىمىنا دايىندىق بارىسىندا قاجەتتى كومىر قورىن جيناقتاۋدىڭ ويداعىداي بولماي تۇرعانىن اتاپ ءوتتى.
– بۇل – مەملەكەت باسشىسى مەن ۇكىمەتتىڭ تىكەلەي باقىلاۋىنداعى ماسەلە. كومىر قورىن دايىنداۋدى جاز ايلارىنان باستاۋ قاجەتتىگىن ەسكەرتكەنىمىزبەن كەيبىر اكىمدەر جۇمىستى ءالى دە دۇرىس ۇيىمداستىرماعان. بۇعان دەيىنگى جينالىستاردا دا ءتيىستى اۋدان اكىمدەرىنە قاتاڭ ەسكەرتۋ جاسالعان بولاتىن. الايدا وسى كۇنگە دەيىن ارال, قازالى, جالاعاش اۋداندارىنا قاجەتتى كومىر قورىنىڭ 30 پايىزى عانا جەتكىزىلگەن. قارماقشى, جالاعاش, سىرداريا اۋداندارىنىڭ كومىر قويمالارىنداعى كورسەتكىش تە كوڭىلدەن شىقپاي تۇر. جىلۋ بەرۋ ماۋسىمىندا كومىرگە قاتىستى ەشقانداي ماسەلە تۋىنداماۋعا ءتيىس. مۇنداي سىلبىرلىقتىڭ زاردابىن حالىق تارتپاۋى كەرەك, – دەدى وبلىس اكىمى.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى بولاتبەك ىسماعۇلوۆ جەتكىزىلگەن وتىن قورى, قالا, اۋدانداردىڭ قامتىلۋى تۋرالى باياندادى.
جيىندا بارلىق جاۋاپتى باسشىعا جىلۋ بەرۋ ماۋسىمىنا دايىندىق بارىسىن قاتاڭ باقىلاۋ تاپسىرىلدى. وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى جەتكىزىلگەن وتىن قورىنا كۇندەلىكتى مونيتورينگ جۇرگىزىپ وتىرۋى كەرەك. ال قىزىلوردا قالاسى جانە اۋدان اكىمدىكتەرى جىلۋ بەرۋ ماۋسىمى جوسپارىنا سايكەس قاجەتتى كومىردى جەتكىزۋ, قويمالاردا قور جيناۋدى ۇيىمداستىرۋعا ءتيىس. سونداي-اق كومىردىڭ تۇرعىندارعا دەلدالسىز تىكەلەي ساتىلۋى, ونىڭ باعاسى دا باقىلاۋعا الىنۋى قاجەت.