پوليتسيا قىزمەتكەرلەرى سپۋتنيكتەردى پايدالانا وتىرىپ, قاراسورا وسىرىلەتىن جەرلەردى انىقتاۋدى قولعا الدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
«جىل سايىن ماۋسىم-قازان ايلارى ارالىعىندا جابايى قاراسورانىڭ ءوسىپ-جەتىلۋى كەزەڭىندە ىشكى ىستەر مينيسترلىگى «قاراسورا» رەسپۋبليكالىق جەدەل-پروفيلاكتيكالىق ءىس-شاراسىن وتكىزەدى. 1 ماۋسىمنان بەرى اتالعان شارا بارىسىندا 820 ەسىرتكى قىلمىسى انىقتالدى. التى ۇيىمداسقان قىلمىستىق توپتىڭ ارەكەتى توقتاتىلىپ, ولاردىڭ جەتەكشىلەرى مەن 54 قاتىسۋشىسى قىلمىستىق جاۋاپكەرشىلىككە تارتىلدى. زاڭسىز اينالىمنان 32 توننا ەسىرتكى تاركىلەندى, ونىڭ ىشىندە 5,3 تونناعا جۋىق ماريحۋانا, 476 كەلىگە جۋىق گاشيش, 241 كەلىدەن استام «سينتەتيكا» جانە 62 كەلىدەن استامى گەروين ءونىمى. قىزىلوردا, تۇركىستان جانە ۇلىتاۋ وبلىستارىندا قاراسورا وسىرىلگەن 65 پلانتاتسيا انىقتالدى. ولاردىڭ جالپى اۋماعى 10 گەكتاردان استى. بۇل رەتتە سالماعى 20 توننادان اساتىن 70 مىڭنان استام قاراسورا بۇتالارى تاركىلەنىپ, جويىلدى. مۇنداي ەسىرتكى وسىمدىكتەرىن انىقتاۋ ءۇشىن پوليتسەيلەر ۇلتتىق ۇلاننىڭ تىكۇشاقتارىن پايدالانىپ, «بۇركىت» ارنايى جاساعىنىڭ قىزمەتكەرلەرىن جۇمىلدىرادى. قىزىلوردا, اقتوبە, تۇركىستان جانە ۇلىتاۋ وبلىستارىنىڭ اۋماعىندا 150 مىڭ شارشى شاقىرىمنان اساتىن جەر تەكسەرىلدى. جالپى 70 رەت اۋەدەن بارلاۋ جۇرگىزىلدى», دەلىنگەن حابارلامادا.
ەسىرتكى وسىمدىكتەرىن وسىرۋشىلەردى انىقتاۋ ءۇشىن «قازاقستان عارىش ساپارى» اق عارىشتىق سپۋتنيكتەرى ارقىلى جەر بەتى قاشىقتىقتان تەكسەرىلىپ, ەسىرتكى پلانتاتسياسى بولۋى مۇمكىن 60 گەوگرافيالىق اۋماقتىڭ كوورديناتى پوليتسياعا جولدانعان. قازىر اتالعان فاكتىگە قاتىستى تەرگەۋ امالدارى جۇرگىزىلىپ جاتىر.