باتىسقازاقستاندىق ءداستۇرلى ءانشى, مادەنيەت قايراتكەرى ساعادات راحمەتجانوۆ باستاعان شاعىن توپ «مۇحيت جۇرگەن جولدارمەن» اتتى عىلىمي تاريحي سازدى ەكسپەديتسياعا اتتاندى.
– بۇل كوپتەن ويىمىزدا جۇرگەن جوبا ەدى. بۇل ساپاردىڭ نەگىزگى ماقساتى – ايگىلى ءانشى مۇحيت سال ءجۇرىپ وتكەن جەرلەرمەن جۇرە وتىرىپ, ەل ىشىندەگى كونەكوز قارتتاردان, ولكەتانۋشى ازاماتتاردان مۇحيت سال تۋرالى قۇندى دەرەك جيناۋ. بارعان جەرىمىزدە سول ءوڭىردىڭ زيالى قاۋىمىمەن كەزدەسىپ, ءانشىنىڭ ونەرىمەن, اندەرىنىڭ شىعۋ تاريحىمەن تانىستىرىپ, ءدارىس-كونتسەرتىمىزدى ۇسىنامىز. سونىمەن قاتار سول ولكەدەگى مۇحيت مەكتەبىنىڭ انشىلەرىمەن تانىسىپ, تاجىريبە الماسۋ ويىمىزدا بار, – دەيدى مۇحيت مەراليەۆ اتىنداعى قوعامدىق قوردىڭ توراعاسى ساعادات راحمەتجانوۆ.
ەكسپەديتسيا ەكى اپتا ىشىندە اتىراۋ, ماڭعىستاۋ, اقتوبە, قىزىلوردا, تۇركىستان, قاراعاندى وبلىستارىندا بولىپ, ساپاردىڭ نۇكتەسىن 15 قازان كۇنى استانا قالاسىندا قويماق. توپ قۇرامىندا رەسپۋبليكالىق بايقاۋلاردىڭ جۇلدەگەرى, جاس ءانشى نۇرالى ايتۋعانوۆ, جەرگىلىكتى «Aqjaiyq» تەلەارناسىنىڭ وپەراتورى بار. ساپاردىڭ ناتيجەسىندە دەرەكتى فيلم, جيناق كىتاپ شىعارۋ جوسپارلانعان.
«سال مۇحيت – باتىسقازاقستاندىق ءان مەكتەبىن قالىپتاستىرعان ايگىلى ءانشى ەكەنىن بىلەمىز عوي. سوندىقتان ەلىمىزدىڭ باتىس وبلىستارىن تۇگەل ارالايمىز. ال قاراعاندى وبلىسىنداعى قارقارالى ءوڭىرىن كىرگىزگەن سەبەبىمىز – مۇحيت بابامىز كەزىندە وسى جەردە وتكەن قوياندى جارمەڭكەسىنە دە قاتىسىپ, اقان سەرى, ءبىرجان سالدارمەن كەزدەسىپ, بىرگە ءان سالعان ەكەن» دەيدى ءانشى.
ونەرپازدار اۋەلى باتىس قازاقستان وبلىسىنىڭ قاراتوبە اۋدانى سارالجىن اۋىلدىق وكرۋگىندە جاتقان مۇحيت مەرالى ۇلىنىڭ كەسەنەسىنە زيارات ەتىپ, ۇلكەن ساپارعا اتتانىپ تا كەتتى. ساعادات راحمەتجانوۆ وسى ساپارعا قولداۋ بىلدىرگەن وبلىس باسشىلارىنا راحمەت ايتادى.
باتىس قازاقستان وبلىسى