سوڭعى ۋاقىتتا جايدارمانشىلار تارازدا ءجيى باس قوسا باستادى. كوڭىلدى تاپقىرلار كلۋبىنىڭ ويىندارىنا قىزىعاتىن جاستار از ەمەس. سودان دا بولسا كەرەك, جەرگىلىكتى بيلىك ءبىر جىلدارى ۇمىت بولا باستاعان جايدارمانشىلاردىڭ جارىسىن جانداندىرۋعا دەن قويىپ وتىر.
بۇل جولى تاجىريبەلى كوماندالار تاراز قالاسى اكىمىنىڭ كۋبوگى ءۇشىن باق سىنادى. وڭتۇستىكتەگى «نوماد» ليگاسىنىڭ فينالدىق سايىسى قاي كەزدە دە تارتىسقا تولى جاعدايدا وتەدى. قىزىلوردا, تۇركىستان وبلىستارىنان جانە شىمكەنت قالاسىنان كەلگەن مىقتى ونەر ۇجىمدارى مەن تارازدىق كوماندالار استارى تەرەڭ ازىلدەرىمەن بالاساعۇن اتىنداعى ورتالىق كونتسەرت زالىنا جينالعان جۇرتشىلىقتىڭ ەزۋىنە كۇلكى ءۇيىردى.
ادەمى ازىلدەرمەن ادىپتەلگەن ويىن قورىتىندىسىندا تارازدىق «OIY» كومانداسىنىڭ ەڭبەگىن قازىلار القاسى جوعارى باعالاپ, ءبىرىنشى ورىنعا لايىق دەپ تاپتى. ءۇشىنشى مەگاپوليس سانالاتىن شىمكەنت قالاسىنان كەلگەن «Mademuazel» ۇجىمىنا جۇلدەلى ەكىنشى ورىن بۇيىرسا, تاعى ءبىر تارازدىق توپ «قاراساز» كومانداسى ۇزدىك ۇشتىكتى قورىتىندىلادى.
ۇيىمداستىرۋشىلار باسەكەگە تولى جاعدايدا وتكەن فينالدىق كەزەڭدە ەرەكشە ازىلىمەن دارالانعان جەكە ويىنشىعا دا جۇلدە تاعايىنداپتى. ناتيجەسىندە, قىزىلوردالىق «سۇراپ المادىق» كومانداسىنىڭ مۇشەسى ءادىلجان داۋلەتوۆ فينالدىق كەزەڭنىڭ «ۇزدىك ويىنشىسى» اتاندى.
جوعارى دەڭگەيدە ۇيىمداستىرىلعان فينالدىق كەزەڭ قورىتىندىسىندا جەڭىمپازدار مەن جۇلدەگەرلەردى تاراز قالاسى اكىمىنىڭ ورىنباسارى ءداۋىر داۋلەتوۆ قۇتتىقتاپ, قالا اكىمىنىڭ كۋبوگى ءۇشىن وتكەن سايىسقا ارنايى كەلگەن كورشى وڭىرلەردىڭ كوماندالارىنا العىس ءبىلدىردى. جۇلدە العان ۇجىمدارعا قوماقتى قارجىلاي سىيلىق تابىستادى.
«قالا كۇنى مەرەكەسى اياسىندا تارازدا بىرنەشە ءىس-شارا جوعارى دەڭگەيدە ۇيىمداستىرىلدى. جايدارمانشىلار اراسىنداعى جارىس كورەرمەننىڭ كوڭىلىنەن شىققانى ءسوزسىز. قاتىسۋشى كوماندالاردىڭ ادەمى ازىلدەرى جۇرتتىڭ كوڭىلىن كوتەردى. كوپشىلىكتىڭ كوڭىلىنەن شىعاتىن ءتۇرلى ءىس-شارا الداعى ۋاقىتتا دا ۇيىمداستىرىلادى», دەيدى تاراز قالاسى اكىمىنىڭ ورىنباسارى د.داۋلەتوۆ.
تاراز