كەشە ازيا ويىندارىن ۇيىمداستىرۋ كوميتەتىنىڭ ۇيىتقى بولۋىمەن جۋرناليستەرگە ارنالعان مەديا تۋر ءوتتى. ءىس-شاراعا قاتىسۋعا بىرنەشە ەلدىڭ باق وكىلدەرى نيەت ءبىلدىرىپتى. ونىڭ ىشىندە وسى جولدىڭ اۆتورى دا بار.
العاشقىدا قالاي بولادى ەكەن, ۋاقىتتى قۇر وتكىزىپ المايمىز با, دەپ الاڭدادىق. سەبەبى كەشە جارىس جولىنا ۆەلوشاباندوز قىزدارىمىز, گرەك-ريم شەبەرلەرى, بوكسشى قىزدار ونەرلەرىن كورسەتەتىن ەدى. سول سايىستارعا ۇلگەرمەي قالمايمىز با, دەگەن وي دا بولدى. جوق, بارلىعىنا ۇلگەردىك. تاڭەرتەڭ ۆەلوشاباندوزدار سايىسىن تاماشالادىق, ۆەلوسپورتتاعى قىزدارىمىزعا ريزامىز. سەبەبى ازيا ويىندارىنا تۇڭعىش قاتىسىپ وتىرعان ريناتا سۇلتانوۆا مەن ماحاببات ءۇمىتجانوۆا جالپى توپپەن بىرگە ءجۇرىپ ءوتتى. الداعى ۋاقىتتا وسى ەكى قىز ەل ابىرويىن اسقاقتاتادى دەپ سەنەمىز.
سونىمەن ۇيىمداستىرۋشىلار تۇسكى 13:00-دە باق وكىلدەرى باس قوساتىن مرس ورتالىعىنان 30-عا جۋىق ءجۋرناليستى ارنايى اۆتوبۋسپەن قالاداعى قىتاي «Desing» مۋزەيى مەن «Art» اكادامياسىنا الىپ باردى. يران, قاتار, موڭعوليا, ءۇندىستان تىلشىلەرى مەن جەرگىلىكتى باق وكىلدەرى مەديا تۋردا الدىمەن حانچجوۋدىڭ تاريحىن تانىسۋمەن باستادى. ءارى قاراي مۋزەي ديرەكتورى شينيانگ جانگ قىتاي يەروگليفتەرىنىڭ شىعۋ تاريحى جانە دامۋ كەزەڭدەرى تۋرالى ايتتى.
ونىڭ ايتۋىنشا, قىتاي يەروگليف-تەرى الەم حالىقتارى جازبالارىنىڭ ىشىندە وزىندىك ەرەكشەلىگىمەن كوزگە تۇسەدى. قىتاي تىلىندە شامامەن 60 مىڭعا جۋىق يەروگليف بار دەسەك, سونىڭ ىشىندە 47 مىڭنان استامى ايگىلى كانسي سوزدىگىنە ەنگىزىلگەن. ونىڭ ىشىندە 3 مىڭنان استامى بۇقارالىق قولدانىستا. وسى جەردە ەڭ كونە سوزدەر جازىلعان.
سونداي-اق مۋزەيدە مىڭداعان جادىگەر بارىن, ونىڭ ىشىندە وسىعان دەيىن وتكەن بارلىق وليمپيا ويىندارى مەن قىتايدا ۇيىمداستىرعان كوپتەگەن سپورتتىق ءىس-شارانىڭ لوگوتيپتەرى مەن سيمۆولدىق سۋرەتتەرىن كەزدەستىرۋگە بولادى. ءتىپتى ماسكەۋ وليمپياداسىنىڭ بارلىق فوتولارى مەن ۇراندارى جازىلعان گازەتتەر دە بار.
ازيا ويىندارى لوگيتيپىنىڭ اۆتورى «Song Jianming» بارلىق سپورت تۇرلەرىنىڭ لوگوتيپى قالاي جاسالعانى جونىندە اقپارات بەرىپ, ولاردىڭ تۇپنۇسقاسى وسىندا ساقتالعانىن ايتتى.