مادەنيەت جانە اقپارات ءمينيسترى, ۇلتتىق قۇرىلتاي حاتشىسى ايدا بالاەۆا ۇلتتىق قۇرىلتاي مۇشەلەرىمەن كەزدەستى.
مەملەكەت باسشىسىنىڭ باستاماسىمەن قۇرىلعان ۇلتتىق قۇرىلتاي قىزمەتى «قوعامدىق ديالوگتىڭ بىرىڭعاي ينستيتۋتسيونالدىق مودەلىن» قالىپتاستىرۋعا, بيلىك پەن ازاماتتاردىڭ ءوزارا ءىس-قيمىلىن نىعايتۋعا باعىتتالعان.
تۇركىستان قالاسىندا وتكەن ۇلتتىق قۇرىلتاي وتىرىسىندا پرەزيدەنت «ادىلەتتى قازاقستاندى قۇرۋ ءۇشىن ءاربىر وتانداسىمىز ادال ازامات بولۋى» قاجەتتىگىن اتاپ ءوتتى. قوعامدا وتانشىلدىق, ادامگەرشىلىك, بىلىمپازدىق, ناعىز مامان بولۋ, ۇنەمشىلدىك, ەڭبەكقورلىق, ەل مەن جەرگە جاناشىرلىق سياقتى اسىل قاسيەتتەر بارىنەن بيىك تۇرۋعا ءتيىس. وسىلايشا, ءبىز جاس ۇرپاقتى ادال ازامات ەتىپ تاربيەلەۋ, ۇلتتىق بىرەگەيلىكتى نىعايتۋ, جاڭا قۇندىلىقتاردى ورنىقتىرۋ ءۇشىن جۇيەلى جۇمىس ىستەۋىمىز قاجەت. ەلىمىزدە بەلسەندى ساراپشىلاردىڭ ۇلتتىق قۇرىلتاي قۇرامىنا ەنۋى قوعامنىڭ ەلىمىزدىڭ قوعامدىق-ساياسي ومىرىنە قاتىسۋ مۇمكىندىگىن كەڭەيتتى جانە ازاماتتاردىڭ زاڭدى قۇقىقتارى مەن مۇددەلەرىن قورعاۋعا مۇمكىندىك جاسادى.
كەزدەسۋدە مادەنيەت جانە اقپارات ءمينيسترى ايدا بالاەۆا ۇلتتىق قۇرىلتاي مۇشەلەرىنىڭ ۇسىنىستارىن تىڭداپ, ەلىمىزدە جاڭا قوعامدىق ەتيكا قالىپتاستىرۋ, ەلدىڭ بىرلىگى مەن تۇراقتىلىعى, ازاماتتاردىڭ ءوزارا تىلەكتەستىگى, ادىلدىك, زاڭ مەن ءتارتىپ, سەنىم جانە جاۋاپكەرشىلىك سياقتى قۇندىلىقتاردى ىلگەرىلەتۋ ماسەلەلەرىن تالقىلادى.
سونداي-اق ايدا بالاەۆا مەملەكەت باسشىسىنىڭ تۇركىستان قالاسىندا وتكەن ۇلتتىق قۇرىلتايدا بەرگەن تاپسىرماسى اياسىندا مادەني مۇرانى ساقتاۋ جانە زەردەلەۋ, ەلدىڭ وزىندىك ەرەكشەلىگىن كورسەتەتىن جانە ۇلتتىق مۇددەلەرگە سايكەس كەلەتىن كىتاپتاردىڭ شىعارىلىمىن ۇلعايتۋ ماسەلەلەرى بويىنشا اقپارات بەردى.