بۇگىن اباي وبلىسى, ءۇرجار اۋدانىندا تۇڭعىش رەت اسەت نايمانباي ۇلى اتىنداعى ء«ىنجۋر-مارجان» رەسپۋبليكالىق ءداستۇرلى انشىلەر بايقاۋى باستالدى, دەپ حابارلايدى Egemen.kz.
قازاقتىڭ ۇلتتىق قۇندىلىعىن تانىتاتىن ءداستۇرلى ءاندى دارىپتەيتىن بۇل مادەني ءىس-شارانى اباي وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسى ۇيىمداستىرىپ وتىر.
قازاقتىڭ ءان ونەرىندە قايتالانباس ورنەگىن قالدىرعان ءانشىنىڭ تۋعان توپىراعى قاراعاندى وبلىسى, اقتوعاي ءوڭىرى بولعانىمەن, ءتۇرلى تاعدىر تولقىنىمەن, ماقانشى وڭىرىنە سايا تاپقانى جايلى دەرەكتەر ەل ىشىندە ءجيى ايتىلادى. ايگىلى ء«ىنجۋ-مارجان», «قىسمەت», «ماقپال» سياقتى اندەرىمەن قاتار تالانت يەسىنىڭ سوڭىندا ءىز قالدىرعان اقىندىق مۇراسى دا جەتەرلىك.ء«بىراز عۇمىرى قىتاي جەرىندە وتكەن اسەت نايمانباي ۇلىنىڭ اندەرىن بۇگىنگە جەتكىزۋدەن ءداستۇرلى ءان ونەرىنە قۇبىلىس اكەلگەن دانەش راقىشەۆتىڭ ەڭبەگى زور. ونىڭ ورىنداۋى ارقىلى ەل اسەت ءانشىنىڭ 14 ءانىن ەستىپ, ءتانتى بولدى. قىنجىلتارلىعى سول, اسەتتىىڭ ءوز داۋىسى ساقتالعان جوق. تەك ونىڭ كوزىن كورگەن كەنەن ازىرباەۆتىڭ ءوزى كۋا بولعانداعى باعاسىنا عانا ءتانتىمىز. «اسەت ءان سالعاندا كيىز ءتۇيدىڭ تۇڭلىگى جەلپىلدەپ كەتەتىن. مەن مۇنداي داۋىستى بۇرىن-سوڭدى ەستىگەن ەمەسپىن» دەگەن ءبىر اۋىز ءسوزىنىڭ وزىنەن ونىڭ قانداي تالانت يەسى بولعاندىعىن تانۋعا بولادى», دەيدى قازىلار القاسىنىڭ توراعاسى ن. جامپەيىسوۆ.
ء«ان سالساڭ اسەتتەي سال اۋەلەتىپ» دەگەندەي, ءۇرجار ءوڭىرىنىڭ اسپانىن ءداستۇرلى ءاننىڭ داڭقىنا بولەگەن بايقاۋعا استانا, الماتى, ۇلىتاۋ, جامبىل وبلىستارىنان 19 ءانشى باق سىناۋ ۇستىندە.
قىركۇيەك ايىنىڭ 22-23-ءى كۇندەرىن ەنشىلەگەن ءداستۇرلى ءان بايقاۋىنا قاتىسۋشىلاردىڭ ونەرىنە نۇرجان جامپەيىسوۆ, ارداق يساتاەۆا, ەرلان رىسقالي, تولعانباي سەمباەۆ, بەرىك وماروۆ سىندى ءداستۇرلى ءاننىڭ دۇلدىلدەرى ەنگەن قازىلار القاسى باعا بەرىپ, قورىتىندىسىن ەرتەڭگى گالا-كونتسەرتتەن سوڭ جاريالايتىن بولادى.