قىركۇيەكتىڭ 13-17 ارالىعىندا ەلوردانىڭ 25 جىلدىعىنا وراي, استانا قالاسى اكىمدىگىنىڭ قولداۋىمەن «Silk Way Creative Games» XIV ۇلتتىق دەلفي ويىندارى ءوتتى. وعان فورتەپيانو, سكريپكا, اكادەميالىق ءان, حالىق اسپاپتارى, حالىق ءانى, ەسترادالىق ءان, حالىق ءبيى, زاماناۋي بي, فوتوگرافيا, كيىم ديزاينى, كوركەم وقۋ, تەاتر ونەرى, بەينەلەۋ ونەرى, ساندىك-قولدانبالى ونەر, ىم-يشارا تىلىندە ءان ايتۋ سىندى بارلىعى 15 اتالىم بويىنشا 10-25 جاس ارالىعىندا 500-دەن استام ونەرپاز قاتىستى. بۇل 500 ونەرپازدىڭ ارقايسى 30 ءساۋىر مەن 5 قىركۇيەك ارالىعىندا ەلىمىزدىڭ 17 وبلىسىندا ۇلتتىق دەلفي كوميتەتى وتكىزگەن وڭىرلىك ىرىكتەۋ تۋرلارىنىڭ ۇزدىكتەرى.
ۇلتتىق دەلفي كوميتەتى ويىنداردى وتكىزۋ, ەلىمىزدىڭ جاس تالانتتارىنىڭ كاسىبي دامۋىن قولداۋمەن عانا شەكتەلمەي, قوعامنىڭ قالىپتاسۋىن سارالاپ, ەل اۋماعىنداعى جاڭا مادەني ترەندتەردى تالداپ, ناسيحاتتاۋمەن اينالىسادى. بيىل ۇلتتىق دەلفي ويىندارىنىڭ اياسىندا كوميتەت ۇلى ابايدىڭ جيىرما سەگىزىنشى قارا ءسوزىنىڭ نەگىزىندە استانادان, ەلىمىزدىڭ الىس-جاقىن وڭىرلەرىنەن جانە بىرقاتار وزگە مەملەكەتتەردەن كەلگەن ساراپشىلاردى پىكىر الماسۋ الاڭىنا شاقىرىپ, «ادال ازامات. فرانكەنشتەين نەمەسە بولاشاققا نىق قادام با؟» ستراتەگيالىق سەسسياسىن ۇيىمداستىرعانى سونىڭ ايعاعى.
ۇلتتىق ويىندار اياسىندا قازاقستان حالقى اسسامبلەياسىنىڭ دوستىق ۇيىندە وتكەن كەزدەسۋگە مادەنيەت, قوعام قايراتكەرلەرى, حالىقارالىق دەلفي كوميتەتىنىڭ مۇشەلەرى مەن قازىلار القاسى, ىستانبۇل كونسەرۆاتورياسى وكىلدەرى, پارلامەنت دەپۋتاتتارى قاتىستى. اتالعان ستراتەگيالىق سەسسياسىنىڭ نەگىزگى مىندەتى – قازىرگى قوعامدا پرەزيدەنت جولداۋىندا ەسكەرىلگەن ادال ازامات قالىپتاستىرۋ ءۇشىن نە ىستەۋ كەرەكتىگى تۋرالى بىرلەسكەن ۇسىنىستار ازىرلەۋ. مۇندا قوعامدىق قۇندىلىقتارعا يەك ارتا وتىرىپ, ادال ازامات قالىپتاستىرۋ توڭىرەگىندە بىرقاتار پىكىرلەر ورتاعا تاستالدى. «قوعامدىق دامۋعا ىقپال ەتىپ, اتالعان ۇدەرىستى جەدەلدەتۋگە, جوعارى مادەنيەتتى دامىعان قوعام قالىپتاستىرۋعا ءاربىر ازامات جاۋاپتى. بىراق ناقتى باعىت-باعدار مەن تۇجىرىمدى كوزقاراسقا باستايتىن قادامدار بولۋى كەرەك ەمەس پە؟», دەگەن ناقتى شەشىمدەرگە جەتەلەيتىن ۇسىنىس ايتىلدى. سونداي-اق بۇل سەسسيا – ءار ادام كوزقاراسىن كوپشىلىك قاۋىم اراسىنا تاستاپ, پىكىرلەس ادامداردىڭ ورتاق كوزقاراسىنا اينالدىرا الاتىن اۋقىمدى جوبا دەگەندى ايتادى ۇيىمداستىرۋشىلار.
سونىمەن, 15-16 قىركۇيەك كۇندەرى ەلىمىزدىڭ بارلىق وڭىرىنەن جينالعان دارىندى جاستار ۇلتتىق دەلفي ويىندارى قازىلارىنىڭ الدىندا استانانىڭ ءار جەرىندەگى مادەني ورىنداردا ونەر كورسەتىپ, باقتارىن سىناپ جاتتى. اتاپ ايتقاندا «فورتەپيانو», «سكريپكا», «اكادەميالىق ءان ايتۋ», «بەينەلەۋ ونەرى», «ساندىك-قولدانبالى ونەر», «فوتوگرافيا», «كيىم ديزاينى» اتالىمدارى ە.راحماديەۆ اتىنداعى مەملەكەتتىك اكادەميالىق فيلارمونيا كونتسەرت زالى مەن فويەسىندە; «حالىق اسپاپتارى», «حالىق ءانى», «حالىق ءبيى», «زاماناۋي بي» اتالىمدارى ءال-فارابي اتىنداعى وقۋشىلار سارايىنىڭ باستى, كىشى ساحنالارىندا; «تەاتر», «كوركەمسوز وقۋ», «فوتوگرافيا» اتالىمى م.وتەمىس ۇلى اتىنداعى وقۋشىلار سارايىندا; «ىم-يشارا تىلىندە ءان ايتۋ», «ەسترادالىق ءان» اتالىمى «جاستار» سارايىندا ءوتتى. ءار اتالىم بويىنشا ۇزدىك شىققان ونەرپازدار 16 قىركۇيەك كۇنى كەشكىسىن راحماديەۆ اتىنداعى مەملەكەتتىك اكادەميالىق فيلارمونيانىڭ «استانا» كونتسەرت زالىندا «Silk Way Creative Games» XIV ۇلتتىق دەلفي ويىندارى جەڭىمپازدارىنىڭ گالا-كونتسەرتىندە كوپشىلىككە ونەرلەرىن كورسەتتى. بۇلاردىڭ ارقايسىسى الداعى ۋاقىتتا قىرعىز رەسپۋبليكاسىندا وتەتىن حالىقارالىق دەلفي ويىندارى وليمپياداسىنىڭ بيىك شىڭىن باعىندىرۋعا اتتانادى. ولاردىڭ قاتارىندا ۇلتتىق اسپاپتار بويىنشا دومبىرادان اتىراۋلىق ورالبەك ابىلايحان (10-15 جاس) مەن اليدان جادەنوۆ (16-21 جاس), 10-15 جاستا قوبىزدان قاراعاندىلىق سەرىكباي راۋان, اتىراۋلىق دانا وتار (16-21 جاس), سىرنايدان 16-21 جاس ارالىعىندا استانالىق رۋسلان گالكەەۆ, حالىق ءانىن ورىنداۋدان 10-15 جاس ارالىعىندا اتىراۋلىق ايسانا ىلياسقىزى, 16-21 جاستا استانالىق ديدار شۋناەۆ, ال حالىق ءانىن انسامبلمەن ورىنداۋدان استانالىق «نازقوڭىر» ءداستۇرلى انشىلەر ءانسامبلى بار. سونداي-اق فورتەپيانودان قاراعاندىلىق الەكساندر ۆولوكيتين (10-15 جاس) مەن الماتىلىق اشوت محيتاريان ءبىرىنشى ورىننان كورىندى.
سكريپكادان انەل دانيار (10-15 جاس) مەن ديلناز جانكۋشۋكوۆا (16-21 جاس) وزىپ كەلدى.
حالىق بيىنەن 10-15 جاس اراسىندا الماتىلىق «Gami» بي مەكتەبى, 16-21 جاستا «سالتانات ءانسامبلى جەڭىمپاز تانىلدى.
زاماناۋي بيلەۋدەن بايگەنى 10-15 جاس ارالىعى بويىنشا تاعى دا سول الماتىلىق «Gami» بي مەكتەبى, 16-21 جاستا اقمولا وبلىسىنان كەلگەن حورەوگرافيالىق «Polyanka» ۇجىمى يەلەندى.
ەسترادالىق ءان ورىنداۋدا 10-15 جاس ارالىعىندا استانالىق ءادىل كۇنەدىلوۆ, 16-21 جاستا اقمولالىق التىناي ايتەن قارا ءۇزدى.
ىمداپ ءان سالۋدان 10-15 جاس ارالىعىندا قىزىلوردالىق جاڭاگۇل قادىر, 16-21 جاستا قاراعاندىلىق ەرنۇر سامەن توپ جاردى.
اكادەميالىق اننەن 16-21 جاس اراسىندا قاراعاندىلىق جاينا جۇما, 22-25 جاستا استانالىق قادىربەك قالدار ۇزدىك شىقتى.
دەكوراتيۆتى قولدانبالى ونەردە 10-15 جاس اراسىندا جامبىلدىق ارۋجان جومارتبەك, پاۆلودارلىق ولگا پانافيدينا (16-21 جاس) جەڭىسكە جەتتى.
تەاتر ونەرى بويىنشا 14-21 جاس ارالىعىندا اقمولالىق «Infinity laboratory» جەڭىمپاز بولدى.
كوركەمسوز وقۋدان پاۆلودارلىق اينارا دوسىمجانوۆا (16-21 جاس) جەكە كەلدى.
بەينەلەۋ ونەرىنەن 10-15 جاس ارالىعىندا پاۆلودارلىق اناستاسيا زەلەنكەۆيچ, تارازدىق نۇربول وسپان (16-21 جاس) وزىق كورىندى. اتالعان جەڭىمپازدار حالىقارالىق دودادا ەل نامىسىن قورعايدى.