وتان الدىندا بورىشىن وتەپ جۇرگەن ساربازدار ۇلتتىڭ مادەني جاۋھارلارىمەن ءجىتى تانىس بولعانى ءجون. اسىرەسە جەتىسۋ وڭىرىندە ەلدىڭ ايناسىنا اينالعان رۋحاني جادىگەر جەتەرلىك. سونىڭ ءبىرى – مۇحامەتجان تىنىشباەۆ اتىنداعى وبلىستىق تاريحي-ولكەتانۋ مۋزەيى. جاقىندا ۇشتوبە گارنيزونىنداعى 15603 اسكەري ءبولىمنىڭ ساربازدارى رۋحاني شاڭىراققا باس سۇعىپ, تۇڭعىش تەمىرجول ينجەنەرىنىڭ ءومىر دەرەگىنە ءۇڭىلدى.
بيىل كوكتەمدە وتان الدىنداعى بورىشىن وتەۋ ءۇشىن قاراعاندى وبلىسىنان شاقىرىلعان 30-دان استام مەرزىمدى قىزمەتتەگى سارباز ءتۇرلى جادىگەرلەرمەن تولىققان مۋزەي ەكسپوزيتسياسىمەن تانىسىپ, ولاردىڭ تاريحىن سۇراپ ءبىلدى. كونە تاريحتىڭ كۋاسى بولعان قۇندى جادىگەرلەر تۋرالى جان-جاقتى ايتىپ بەرگەن مۋزەي قىزمەتكەرلەرى ساربازدار قويعان سۇراققا تۇشىمدى جاۋاپ قايتاردى.
ء«اربىر سارباز – ۇلتتىڭ ۇستىنى. ونىڭ تەك ەلدىڭ قورعانىس سالاسىنا عانا ەمەس, رۋحاني ومىرىنە دە ارالاسۋعا قۇقىعى بار. ءبىز جاس ساربازدارعا كىتاپ وقۋعا, تەاتر تاماشالاۋعا, مۋزەيلەردى ارالاۋعا مۇمكىندىك بەرەمىز. ءبىر جىل ىشىندە بىرنەشە كىتاپ وقىعان جاستار دا بار. وڭىردەگى مۋزەيلەر الىستان كەلگەن جىگىتتەرگە وسى ولكەدەن شىققان الىپ تۇلعالاردىڭ ومىرىنەن ساباق الۋعا مۇمكىندىك بەرەدى. ءارى جەتىسۋدىڭ تاريحىمەن تانىسۋعا جول اشپاق», دەيدى جەتىسۋ گارنيزونى ءباسپاسوز قىزمەتىنىڭ باستىعى, مايور جانات سەمباەۆ.
قازىرگىدەي جاhاندانۋ كەزەڭىندە مۇراجايلار تاريحي مۇرانى ساقتاۋ, وسكەلەڭ ۇرپاقتى پاتريوتيزم مەن ازاماتتىققا تاربيەلەۋ, جاستاردىڭ تاريحي ساناسىن قالىپتاستىرۋ سىندى اسا ماڭىزدى باعىتتا ەرەكشە رولگە يە. وسىعان وراي اسكەريلەر وزدەرىن تولعاندىرعان پىكىرلەرىن ورتاعا سالىپ, جۇرەكجاردى تىلەكتەرىن ءبىلدىردى. سولاردىڭ ءبىرى – اسكەري ءبولىمنىڭ ساربازى, قاتارداعى جاۋىنگەر تەمىرلان قۋاتبەك. «مۋزەيگە جاسالعان ەكسكۋرسيا قاتتى ۇنادى. ءبىز بۇل جەردەن كونە تاريحي ەسكەرتكىشتەردى كوردىك. وسىنداي ءىس-شارالار ساربازداردىڭ رۋحتارىن كوتەرىپ, تانىمدىق دەڭگەيىن ارتتىراتىنىنا سەنىمدىمىن», دەيدى ول.
م.تىنىشباەۆ اتىنداعى وبلىستىق تاريحي-ولكەتانۋ مۋزەيىندە ساربازدار ەكىنشى دۇنيەجۇزىلىك سوعىستا قولدانىلعان مىلتىق, زەڭبىرەك, گراناتا سەكىلدى قارۋ-جاراق پەن سول كەزدەگى اسكەري كيىم ۇلگىلەرىن تاماشالادى.
«بۇگىنگى كۇنى قوعامدا مۋزەيدىڭ الاتىن ورنى ەرەكشە. مۋزەي – كەشەگى تاريح, بۇگىنگى عىلىمي-زەرتتەۋ ورتالىعى, ەرتەڭگى كەمەل بولاشاعىمىز. مۋزەي – تاريحي-مادەني جانە عىلىمي قۇندىلىقتاردى ساقتاۋعا, جادىگەر زاتتار ارقىلى مالىمەتتەردى جيناقتاپ تاراتۋعا, وسكەلەڭ ۇرپاققا اتا-بابامىزدان قالعان مۇرالار جونىندە ءتالىم-تاربيە بەرۋگە ارنالعان, تاريحي قالىپتاسقان كوپقىرلى الەۋمەتتىك اقپاراتتار ينستيتۋتى», دەگەن 15603 اسكەري ءبولىم كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى, ءبولىم باستىعى, مايور بەكەن اسىلبەكوۆ مەرزىمدى قىزمەتتەگى ساربازداردىڭ دۇنيەتانىمىن كەڭەيتىپ, ءبىلىمىن جەتىلدىرۋ ءۇشىن وسىنداي ەكسكۋرسيالار ۇدايى ۇيىمداستىرىلىپ تۇراتىنىن ايتتى.
جەتىسۋ وبلىسى