امانگەلدى اۋدانىندا تورعايداعى ۇلت-ازاتتىق كوتەرىلىسىنىڭ باس ساردارى امانگەلدى يمانوۆتىڭ 150 جىلدىعى اياسىندا وليمپيادالىق جانە ۇلتتىق سپورت تۇرلەرىن ناسيحاتتاۋعا دا كوپ كوڭىل ءبولىنىپ وتىر. شالعاي اۋدانداعى سپورت جارىستارى سۋعا جۇزۋدەن 2013-2016 جىلى تۋعان بالالار مەن قىزدار اراسىندا وتكەن وبلىس چەمپيوناتىنان باستالدى.
مۇنداي وبلىستىق دەڭگەيدەگى ءىرى جارىستىڭ ءوتۋى وسى اۋداننىڭ تاريحىندا ءبىرىنشى رەت بولىپ وتىر. امانگەلدى اۋىلىنداعى جابىق ءجۇزۋ باسسەينى 2021 جىلى پايدالانۋعا بەرىلگەن. سودان بەرى جاز بويى وزەن جاعاسىنان شىقپايتىن ويىن بالاسى قىسى-جازى ارنايى جاتتىقتىرۋشىنىڭ تاربيەسىندە بولىپ, سۋ سپورتىمەن شىنداپ اينالىسۋعا مۇمكىندىك الىپ وتىر. وسىنىڭ ناتيجەسىندە اۋداننىڭ جاس سپورتشىلارى بىلتىرعى وبلىس بىرىنشىلىگىندە ەستافەتالىق ءجۇزۋ جارىستارىنان جۇلدەلى ءۇشىنشى ورىنعا يە بولدى.
بۇل باسسەيندى كاسىپكەر ساپار ىسقاق ۇلى 125 ملن تەڭگەگە سالىپ بەردى. قازىرگى تاڭدا 70-كە تارتا بالا جۇزۋمەن شۇعىلدانادى. شتاتتا 13 ادام جۇمىس ىستەيدى, ەكى باپكەر بار. ءجۇزۋ كەشەنى وبلىس بيۋدجەتىنەن قارجىلاندىرىلادى. بالالار ەكى جىلدىڭ ىشىندە سۋعا جۇزۋمەن كاسىبي تۇردە اينالىسىپ, بۇگىندە ۇلكەن جارىستارعا قاتىسۋعا جاراپ قالدى. مۇنداي زاماناۋي ءجۇزۋ كەشەنى باسقا اۋدانداردا جوق.
حالىقارالىق ستاندارتقا ساي زاماناۋي جابدىقتالعان جابىق باسسەيندە ۇزىندىعى 100 مەترلىك ءتورت ءجۇزۋ جولاعى بار. باپكەردىڭ ايتۋىنشا, بالانىڭ نەعۇرلىم ۇزاققا ءجۇزىپ جاتتىققانى جاقسى. ويتكەنى مۇنداي باسسەيندە شىنىققان بالا ۇلكەن جارىستاردا ەنتىكپەيدى.
وبلىس كولەمىندە ءجۇزۋ جولاعىنىڭ ۇزىندىعى 100 مەترگە دەيىن جەتەتىن سۋ سپورتى كەشەنى قوستاناي قالاسى مەن وسى امانگەلدى اۋىلىندا عانا بار ەكەنىن ايتا كەتۋ كەرەك.
باتىر تويى اياسىنداعى وبلىستىق چەمپيوناتقا امانگەلدى اۋدانىنىڭ جاس جۇزۋشىلەرى مەن وسى سپورت ءتۇرى دامىعان قوستاناي, رۋدنىي, ليساكوۆ سياقتى قالالاردان كەلگەن سپورتشىلار قاتىستى. قالادا جاتتىققان بابى مىقتى جاس سپورتشىلاردان قالىسپاي, جۇلدەلى ورىندارعا ىلىگىپ جاتقان اۋىل بالالارىنىڭ تالابى جان سۇيسىنتەدى.
قوستاناي وبلىسى