«قازاقستان تەمىر جولى» ۇلتتىق كومپانياسىن كولىكتىك-لوگيستيكالىق كومپانياعا اينالدىرۋ – مەملەكەت باسشىسىنىڭ ارنايى تاپسىرماسى. تاياۋدا تاپسىرمانى ورىنداۋ اياسىندا جول كارتاسى ازىرلەنىپ, بەكىتىلدى.
قۇجاتتا بىرنەشە باعىتتاعى ءىس-شارالار جۇيەلەنگەن. ولار كومپانيا قۇرىلىمىنداعى وزگەرىستەرگە, تسيفرلاندىرۋعا, جاڭا ونىمدەر مەن قىزمەتتەردى قالىپتاستىرۋعا جانە كومپانيانىڭ قاتىسۋ گەوگرافياسىن كەڭەيتۋگە قاتىستى ءىس-شارالاردان تۇرادى.
ۇلتتىق كومپانيا ستراتەگيالىق ماقساتتاردى جۇزەگە اسىرۋ ءۇشىن لوگيستيكالىق بلوكتى كۇشەيتىپ, كولىك لوگيستيكاسىنىڭ قۇزىرەتتى ورتالىعى مەن مۋلتيمودالدى تاسىمالداۋ دەپارتامەنتىن قايتا قۇردى. سونىڭ نەگىزىندە تەمىرجول اكىمشىلىكتەرىمەن جانە ءىرى حالىقارالىق كولىك-لوگيستيكالىق كومپانيالارمەن كەلىسسوزدەر جۇرگىزىلدى. ءسويتىپ, لوگيستيكالىق كومپانيالارمەن (ADP, DB, Shandong Port Group) ىنتىماقتاستىق تۋرالى مەموراندۋمدارعا قول قويىلدى.
بۇگىنگى تاڭدا قازاقستاندا ساۋدا توراپتارىن قۇرۋ ماسەلەلەرى پىسىقتالۋ ۇستىندە. سونداي-اق جاڭا قۇزىرەت ورتالىقتارىن قالىپتاستىرۋ بويىنشا دا جۇمىستار جالعاسىن تاۋىپ جاتىر. وعان قوسا كەلەشەكتە قىتاي مەن ەۋروپا اۋماقتارىندا لوگيستيكالىق قىزمەت كورسەتۋ ءۇشىن ۇلتتىق كومپانيا بولىمشەلەرىن اشۋ جوسپارلانىپ وتىر. بۇل ءىس-شارالار ەلىمىز ارقىلى وتەتىن ترانزيتتىك جۇكتەردى قايتا باعدارلاۋعا مول مۇمكىندىك بەرەدى.
قازىرگى كۇندە كومپانيا بيزنەس-ۇدەرىستەردى تسيفرلاندىرۋ ماسەلەسىنە ەرەكشە نازار اۋدارىپ وتىر. سوعان وراي PSA International جەتەكشى ترانسۇلتتىق لوگيستيكالىق كومپانياسىمەن بىرلەسىپ, «قازاقستان تەمىر جولى» ۇلتتىق كومپانياسى اقپاراتتىق جۇيەلەرىن جانە Calista جەتكىزۋ تىزبەگىن باسقارۋعا ارنالعان سينگاپۋرلىق ونلاين پلاتفورماسىن بىرىكتىرۋ جۇمىستارىن جۇرگىزىپ جاتىر. تسيفرلىق شەشىمدى ترانسكاسپي حالىقارالىق كولىك باعدارىندا دا قولدانۋ جوسپاردا بار. بۇل جاڭا جۇيە تۇتىنۋشىلار ءۇشىن ساپالى ءارى ىڭعايلى قىزمەت ءتۇرىن كورسەتىپ, حالىقارالىق تاسىمالداۋشىلار ءۇشىن باعىتتىڭ تارتىمدىلىعىن ارتتىرادى دەگەن ءۇمىت زور.
ال «Huawei» كومپانياسى مەن «قازاقستان تەمىر جولى» ۇلتتىق كومپانياسى اراسىندا تسيفرلاندىرۋدى دامىتۋ تۋرالى مەموراندۋمعا قول قويۋى كومپانيانىڭ جەدەل دامۋىنا جول اشادى.