قارجىلىق باقىلاۋ اگەنتتىگىنىڭ ءباسپاسوز قىزمەتى حابارلاعانداي, اتالعان اگەنتتىكتىڭ شىمكەنت قالاسى بويىنشا دەپارتامەنتى ءۇشىنشى مەگاپوليستە تانىمال ەنەرگەتيكالىق سۋسىندى جاسىرىن تۇردە شىعارعان تسەحتى انىقتاعان. دەپارتامەنت بيزنەس قۇقىقتارىن قورعاۋ جانە كولەڭكەلى ەكونوميكامەن كۇرەس بويىنشا جۇرگىزىپ جاتقان جۇمىستارى اياسىندا زاڭ بۇزۋشىلىقتىڭ جولىن كەستى.
قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ ماماندارى جانە ساۋدا ماركاسىنىڭ قۇقىق يەلەنۋشىنىڭ وكىلدەرى جۇرگىزگەن جەدەل-ىزدەستىرۋ ءىس-شارالارى بارىسىندا 21 مىڭنان استام قۇتى – كونترافاكتىلىك سۋسىننىڭ دايىن ونىمدەرى, تاۋار بەلگىسى بار 54 مىڭنان استام بوس بانكالار, ەنەرگەتيكالىق سۋسىندى قۇيۋعا ارنالعان جابدىق, سيا بۇرىككىش جاپسىرما, وراۋ قۇرىلعىلارى, قاقپاقتار, قۇرعاق قوسپالار (ليمون قىشقىلى, كوفەين, سودا, بوياعىشتار, قانت, قىشقىلدىقتى رەتتەگىشتەر) تاركىلەندى. كەلتىرىلگەن شىعىن كولەمى 37 ملن تەڭگەدەن اسادى.
ۇلتتىق ساراپتاما ورتالىعىنىڭ ميكروبيولوگيالىق زەرتتەۋ حاتتاماسىنا سايكەس, تاركىلەنگەن سۋسىننىڭ قۇرامىندا رۇقسات ەتىلگەن مولشەردەن ەكى ەسە جوعارى زەڭ مەن اشىتقى انىقتالعان. بۇل ءونىم تۇتىنۋعا جارامسىز, ويتكەنى ول ادام دەنساۋلىعىنا, اسىرەسە جاس اعزاعا زيان كەلتىرەدى. وسى فاكتى بويىنشا سوتقا دەيىنگى تەرگەۋ باستالدى.
شىمكەنت