مەملەكەت باسشىسى قاسىم-جومارت توقاەۆ پارلامەنتتىڭ VIII شاقىرىلىمداعى ءبىرىنشى سەسسياسىنىڭ اشىلۋىندا بيىل ەلىمىزدە العاش رەت 45 اۋدان جانە وبلىستىق ماڭىزى بار قالا اكىمدەرىنىڭ سايلاۋى وتەتىنىن اتاپ وتكەن بولاتىن. اكىمدەرى سايلانعالى وتىرعان 45 ءوڭىردىڭ 2-ەۋى اباي وبلىسىنا تيەسىلى.
وسىعان وراي وتكەن اپتادا اباي وبلىسى ءماسليحاتىنىڭ كەزەكتەن تىس جەتىنشى سەسسياسى ءوتتى. سەسسيا جۇمىسىنا اباي وبلىسىنىڭ اكىمى نۇرلان ۇرانحاەۆ, اباي وبلىستىق ءماسليحاتىنىڭ حاتشىسى قۋانىش سۇلەيمەنوۆ جانە مەملەكەتتىك مەكەمەلەردىڭ باسشىلارى مەن باق وكىلدەرى قاتىستى.
اباي وبلىسى ءماسليحاتىنىڭ شەشىمىمەن پيلوتتىق وڭىرلەر – كۋرچاتوۆ قالاسى مەن اباي اۋدانى اكىمدەرىنىڭ سايلاۋى 5 قاراشا كۇنى وتەدى دەپ بەكىتىلدى. سەسسيا بارىسىندا ايتىلعانداي, بۇل سايلاۋ – پرەزيدەنت تاپسىرماسىنىڭ ورىندالۋىنىڭ ايقىن كورسەتكىشى, سونداي-اق ەل تاريحىنداعى جەرگىلىكتى اۋدان (قالا) اكىمدەرىنىڭ سايلاۋ راسىمدەرىن وتكىزۋدەگى العاشقى تاجىريبە بولىپ سانالادى.
بۇدان وزگە سەسسيانىڭ كۇن تارتىبىندە اباي وبلىسىنىڭ اۋدان جانە وبلىستىق ماڭىزى بار قالا اكىمدەرىن سايلاۋىن وتكىزۋ بويىنشا قاناتقاقتى وڭىرلەردىڭ تىزبەسىن بەلگىلەۋ, اياگوز اۋدانىنىڭ اكىمشىلىك-اۋماقتىق قۇرىلىسىنا وزگەرىستەر ەنگىزۋ, اباي وبلىسى ءماسليحاتىنىڭ 2022 جىلى 18 قاراشاداعى «اباي وبلىسى بويىنشا جەر كوميسسياسى قۇرامىن بەكىتۋ تۋرالى» شەشىمىنە (№10/63-VII) وزگەرىستەر ەنگىزۋ, اباي وبلىسىنىڭ قورشاعان ورتانى قورعاۋ جونىندەگى 2023-2025 جىلدارعا ارنالعان ءىس-شارالار جوسپارىن بەكىتۋ تۋرالى ماسەلەلەرى قارالدى.