تالدىقورعانداعى زياتكەرلىك مەكتەپتىڭ كومانداسى روبوتتەحنيكادان ۇيىمداستىرىلعان وليمپيادانىڭ جەڭىمپازى اتاندى. الماتى قالاسىندا وتكەن باسەكەدە جەتىسۋلىق ورەندەر ەرەكشە كوزگە ءتۇستى. روبوتتەحنيكادان رەسپۋبليكالىق وليمپيادا بىرىككەن ۇلتتار ۇيىمىنىڭ تۇراقتى دامۋ ماقساتتارىن ورىنداۋعا باعىتتالعان. ءىس-شارا لوگيستيكا مەن تسيفرلىق ينفراقۇرىلىمعا كومەكتەسەتىن روبوتتاردى جاساۋ ءۇشىن قاتىسۋشىلاردى ءبىر الاڭعا جينايدى.
بايقاۋدىڭ باستى مىندەتى – كۇندەلىكتى ومىردە ادامعا قامقورلىق تانىتىپ, قىزمەت كورسەتەتىن روبوتتاردى ازىرلەۋ.
ينفورماتيكا ءپانىنىڭ مۇعالىمى نيكولاي ءاۆديۋنيننىڭ جەتەكشىلىگىمەن تالدىقورعاندىق كوماندا ەكى جوبانى ۇسىندى. ەكەۋى دە «Future Innovators» اتالىمى بويىنشا (ۇلكەن جانە ورتا توپ) ءبىرىنشى ورىندى جەڭىپ الدى. 9-سىنىپ وقۋشىلارى ديانا حاسيموۆا مەن يليا ستاسيۋكوۆ كونتەينەرلەردى سۇرىپتاۋعا جانە قايتا تيەۋگە ارنالعان تەڭىز لوگيستيكالىق تەرمينالىنىڭ ءپروتوتيپىن جاسادى.
– ساۋدا-ساتتىقتىڭ 80 پايىزى مۇحيتتار ارقىلى جۇزەگە اسادى. ساۋدانىڭ دامۋىن شەكتەيتىن دۇنيەلەر دە بار. سونىڭ ءبىرى – جونەلتۋ پورتىنا كەلەتىن كونتەينەرلەردى ۇزاق كۇتۋ. تەرمينالدى تەڭىز ساۋدا جولدارىنىڭ قيىلىسىنا ورناتاتىن بولساق, كونتەينەرلەردى جەتكىزۋ جىلدامدىعى ارتادى. تەڭىز تەرمينالىندا جاساندى ينتەللەكت جۇيەسى ورنالاسقان. نەيروندىق جەلى كونتەينەرلەردىڭ تاڭبالارىن انىقتاپ, اۆتوماتتاندىرىلعان كراننىڭ كومەگىمەن جۇكتەردى جۇكتەي دە, تۇسىرە دە الادى, دەيدى ديانا.
9-سىنىپ وقۋشىلارى رانونا جالەلقىزى مەن كاريما ماقاننىڭ بىرەگەي جوباسىنىڭ اتاۋى – «ورمەكشى انا». Spider Mom – ادام قولى جەتپەيتىن جەرلەرگە سىمداردى ءوز بەتىنشە توسەۋگە قابىلەتتى روبوت.
– ينتەرنەتكە قولجەتىمدىلىك – ەلىمىزدىڭ تسيفرلىق دامۋىنداعى ستراتەگيالىق ماڭىزدى ماسەلە. بۇل اسىرەسە پاندەميا كەزىندە, الەم ونلاين رەجىمگە كوشكەن كەزدە انىق بايقالدى. دەگەنمەن اۋىلدىق ەلدى مەكەندەردىڭ بارلىعى ينتەرنەتكە قول جەتكىزە المايدى. ءبىزدىڭ زەرتتەۋىمىز بويىنشا, ەلىمىزدە 1 432 اۋىلدىڭ 200 مىڭنان اسا تۇرعىنى ينتەرنەت ينفراقۇرىلىمىنسىز وتىر. تسيفرلىق تەڭسىزدىكتى جويىپ, ازاماتتاردى ساپالى بايلانىسپەن قامتاماسىز ەتۋ ماڭىزدى, – دەيدى جاس ونەرتاپقىشتار.
جوبا اۆتورلارىنىڭ ايتۋىنشا, روبوت جوعارى جىلدامدىقتى وپتيكالىق كابەلدى بەكىتۋگە, تىرەكتەردىڭ تۇرلەرىن, ءتىپتى اۋا-رايىن انىقتاۋعا قابىلەتتى.
وليمپيادا «RoboMission», «Future Innovators», «Future Engineers» ساناتتارى بويىنشا وتكىزىلدى. ءار ساناتتا جوعارى ۇپاي جيناعان جەڭىمپاز كوماندالار الداعى 7-9 قاراشادا پانامادا وتەتىن حالىقارالىق چەمپيوناتتا ەل نامىسىن قورعايدى.
جەتىسۋ وبلىسى