اركىم جاقسىلىق پەن جاماندىقتىڭ قاي-قايسىنان بولسىن وي ءتۇيىپ, قورىتىندى شىعارىپ, وڭ قادامعا يەك ارتسا, قوعامدىق دامۋ قارىشتايتىنىنا سەنىپ ءومىر ءسۇرۋ ءۇشىن دە ۇلكەن جۇرەك يەسى بولۋ كەرەك شىعار. باسپادان («فوليانت») بيىل عانا شىققان, ءتىپتى سياسى كەۋىپ ۇلگەرمەگەن «اركىمنىڭ جولى – ءارتۇرلى ساپار» اتتى كىتاپتى ءبىر قاراپ شىققاندا سولاي ويلادىق.
جازارمان جۇرت پەن وقىرمان قاۋىم كەنجەبولات جولدىباي ەسىمىمەن جاقسى تانىس. قازاقستان باس رەداكتورلار كلۋبىنىڭ پرەزيدەنتى, اقبەرەن جۋرناليست, بىلىكتى ساياساتتانۋشىنىڭ كوزى تىرىسىندە بىرنەشە كىتابى جارىققا شىقتى.
مارقۇم كەنجەكەڭ – كىسىلىكتە كوسەم, قالامگەرلىكتە ساۋاتتى جان ەدى. ارالاسقان ازاماتتار ۇيىمداستىرۋشىلىق قاسيەتىن ەرەكشە باعالايدى. ءبىز ءسوز ەتىپ وتىرعان بۇل ەڭبەگىنە اۆتوردىڭ ءار جىلدا جازعان ماقالالارى مەن سۇحباتتارى ەنگىزىلىپتى. ماقالالارىنىڭ ءبىرسىپىراسى باسىلىمداردا جاريالانسا, كەيبىرى – جەكەلەگەن وي-تولعام, تۇجىرىمدار. كەنجەبولات جولدىبايدىڭ جۋرناليستەرگە بەرگەن سۇحباتتارى ءھام بەلگىلى تۇلعالاردان العان سۇحباتتارى. بۇل كىسىنىڭ باسقا تۇلعالار تۋرالى جازعان ەستەلىكتەرى مەن ەسسە جانرىنداعى ماتەريالدارى جانە بار. ال اۆتور تۋرالى ماتەريالدار كىتاپتىڭ سوڭىنا توپتاستىرىلىپتى.
اۆتوردىڭ ماقالالارى مەن سۇحباتتارىندا تاۋەلسىز ەلىمىز ءۇشىنشى ونجىلدىقتا باسىنان وتكەرگەن ساياسي ءارى رۋحاني قۇبىلىستار ءجىتى ءسوز بولعانىن اڭعارۋ قيىن ەمەس. قوعامدىق, الەۋمەتتىك ماسەلەلەرگە بەيجاي قاراماعانى بايقالادى. «مەنىڭشە, پروبلەمالىق ماسەلەلەردى قوعام بەلسەندىلىك تانىتقان كەزدە, سونداي-اق وپپوزيتسيالىق كۇشتەردى تارتا وتىرىپ, بۇكىل مۇددەلى تاراپتاردىڭ قاتىسۋىمەن عانا شەشۋگە بولادى. سايىپ كەلگەندە بۇعان بيلىكتىڭ ءوزى دە مۇددەلى ەكەندىگىنە سەنىمدىمىن, سەبەبى بيلىككە ءوزىنىڭ ءىس-قيمىلىن باعامداۋعا مۇمكىندىك بەرەتىن دالمە-ءدال ينديكاتور قاجەت», دەپتى 2014 جىلدىڭ 5 اقپانىندا «Egemen Qazaqstan» گازەتىندە جاريالانعان ماتەريالىندا.
وزىنە, ءومىر سۇرگەن ورتاسىنا, ۇرپاق تاربيەسىنە اسا مۇقيات قاراپ, الاڭداۋشىلىق تانىتىپ, سوڭىنا ءىز قالدىرعان ازاماتتىڭ مۇراسى ۇرپاق يگىلىگىنە اينالدى دەپ سەنەمىز.