استانا قالاسىندا «كونستيتۋتسيانىڭ ۇستەمدىگى – مەملەكەتتىك ەگەمەندىكتىڭ, تۇراقتى دامۋدىڭ, زاڭدىلىق پەن قۇقىقتىق ءتارتىپتىڭ, ادام قۇقىقتارىن قورعاۋدىڭ نەگىزى» تاقىرىبىندا كونستيتۋتسيالىق باقىلاۋ ورگاندارىنىڭ ەۋرازيالىق قاۋىمداستىعىنىڭ I كونگرەسى ءوتتى.
كونستيتۋتسيوناليزم يدەياسىنا ارنالعان باسقوسۋدى ەلىمىزدىڭ كونستيتۋتسيالىق سوتى ۇيىمداستىردى. قاۋىمداستىققا مۇشە مەملەكەتتەر – ازەربايجان, ارمەنيا, بەلارۋس, قىرعىزستان, موڭعوليا, رەسەي, تاجىكستان, وزبەكستاننىڭ كونستيتۋتسيالىق سوتتارىنىڭ باسىن بىرىكتىرگەن كونگرەسس جۇمىسىنا ەۋرازيالىق ەكونوميكالىق وداق سوتىنىڭ سۋديالارى, ەلىمىزدىڭ ادام قۇقىقتارى جونىندەگى ۋاكىلى, پارلامەنت قوس پالاتاسىنىڭ دەپۋتاتتارى, باس پروكۋراتۋرا, ادىلەت مينيسترلىگىنىڭ, حالىقارالىق قاۋىمداستىقتىڭ وكىلدەرى, وتاندىق جانە شەتەلدىك عالىمدار قاتىستى.
جيىن بارىسىندا كونستيتۋتسيالىق سوتتىڭ توراعاسى ەلۆيرا ءازىموۆا, پرەزيدەنت جانىنداعى ادام قۇقىقتارى جونىندەگى كوميسسيانىڭ توراعاسى يگور روگوۆ, پارلامەنت سەناتىنىڭ دەپۋتاتى اندرەي لۋكين, ءماجىلىس دەپۋتاتى سنەجاننا يماشەۆا ءسوز سويلەدى.
«كونستيتۋتسيوناليزم يدەياسىنا ارنالعان كونگرەسس ادام قۇقىقتارىنىڭ جالپىعا بىردەي دەكلاراتسياسىنىڭ 75 جىلدىعىن جانە ەلىمىزدىڭ كونستيتۋتسياسى كۇنىن مەرەكەلەۋ قارساڭىندا ءوتىپ جاتىر. ەلىمىز بۇل كۇندى العاش رەت وتكەن جىلدىڭ ماۋسىم ايىنداعى جالپىحالىقتىق رەفەرەندۋمنىڭ ناتيجەلەرى بويىنشا جاڭارتىلعان كونستيتۋتسيامەن اتاپ وتۋدە. قازاقستان كونستيتۋتسياسىنىڭ جاڭا رەداكتسياسى قوعام مەن مەملەكەتتى ودان ءارى جاڭعىرتۋ ءۇشىن قاجەتتى قۇقىقتىق نەگىزدەردى قالادى. كونستيتۋتسيالىق رەفورمانىڭ نەگىزگى باعىتى – پرەزيدەنتتىك وكىلەتتىكتەردى قىسقارتۋ جانە پارلامەنتتىڭ ىقپالى مەن ازاماتتاردىڭ شەشىم قابىلداۋ ۇدەرىستەرگە كەڭىنەن قاتىسۋىن, قۇقىق قورعاۋشى تەتىكتەردىڭ الەۋەتىن كۇشەيتۋ», دەيدى ە.ءازىموۆا.
جيىنعا قاتىسۋشىلار كونستيتۋتسيانىڭ ۇستەمدىگى, ادام قۇقىقتارىن قورعاۋ, سونداي-اق قازىرگى جاعدايدا كونستيتۋتسيالىق باقىلاۋدى جۇزەگە اسىرۋدىڭ تيىمدىلىگى ماسەلەلەرىن كەڭىنەن تالقىلادى. ەلدىڭ كونستيتۋتسياسى مەملەكەتتى ۇيىمداستىرۋدىڭ نەگىزدەرىن انىقتاپ قانا قويماي, ءار ازاماتتىڭ كۇندەلىكتى ومىرىنە اسەر ەتەتىن زاڭدىلىقتى قامتاماسىز ەتۋدىڭ كەپىلى بولىپ سانالادى.
باسقوسۋ بارىسىندا ەلىمىزدىڭ كونستيتۋتسيالىق سوتى I كونگرەسكە قاتىسۋشىلارعا ەۋرازيالىق قاۋىمداستىقتىڭ «كونستيتۋتسيالىق سوت تورەلىگى» جارشىسىنىڭ كەزەكتى شىعارىلىمىن تانىستىردى. باسىلىمعا ەۋرازيالىق كەڭىستىكتەگى كونستيتۋتسيالىق سوتتار سۋديالارىنىڭ ماقالالارى, كونستيتۋتسيالىق ءىس جۇرگىزۋ قورىتىندىلارى بويىنشا قىزىقتى شەشىمدەر, سونداي-اق كونستيتۋتسيالىق سوتتار قىزمەتىنىڭ سوڭعى جاڭالىقتارى ەنگىزىلدى.
ەلىمىزدىڭ كونستيتۋتسيالىق باقىلاۋ ورگانى 2017 جىلدان باستاپ كونستيتۋتسيالىق باقىلاۋ ورگاندارىنىڭ ەۋرازيالىق قاۋىمداستىعىنا توراعالىق ەتەدى. قاۋىمداستىقتىڭ نەگىزگى ماقساتى – جالپىعا بىردەي تانىلعان كونستيتۋتسيالىق قۇندىلىقتاردى ناسيحاتتاۋ, مۇشە مەملەكەتتەردىڭ كونستيتۋتسياسىنىڭ ۇستەمدىگىن قامتاماسىز ەتۋ ماسەلەلەرى بويىنشا تۇراقتى ديالوگ پەن تاجىريبە الماسۋدى قولداۋ.