ازەربايجان استاناسىندا نىسانا كوزدەۋدەن 53-ءشى الەم چەمپيوناتى ءوتىپ جاتىر. بۇگىن مۇندا ساراپقا سالىنعان پاريج وليمپياداسىنىڭ 48 جولداماسى تولىق تاراتىلدى, دەپ حابارلايدى Egemen.kz قر مسم سپورت جانە دەنە شىنىقتىرۋ ىستەرى كوميتەتى سپورتتى دامىتۋ ديرەكتسياسىنىڭ ءباسپاسوز قىزمەتىنە سىلتەمە جاساپ.
دۇنيەجۇزىلىك باسەكەدە جوعارى اتالعان ليتسەنزيالاردى 31 مەملەكەت ءوزارا ءبولىستى. بۇل قاتاردا قازاقستان قۇراماسى دا بار. ەلىمىزگە جالعىز جولدامانى پنەۆماتيكالىق ۆينتوۆكامەن 10 مەتردەن نىسانا كوزدەۋدىڭ فينالىنا شىعىپ, 4-ورىن العان يسلام ساتپاەۆ الىپ بەردى. ايتا كەتەيىك, بۇل نىسانا كوزدەۋدەن ءبىزدىڭ مەرگەندەر قول جەتكىزگەن العاشقى وليمپيادا ليتسەنزياسى. وسىعان دەيىنگى توكيوداعى ويىنداردا ەل نامىسىن يۋري يۋركوۆ جالعىز ءوزى قورعاعان. سپورتتىڭ بۇل تۇرىندە الەم چەمپيوناتىنىڭ جولداماسى جەكەلەگەن اتلەتكە ەمەس, ۇلتتىق فەدەراتسياعا بەرىلەدى. الايدا ءار مەملەكەتتىڭ فەدەراتسياسى كۇتپەگەن جاعداي بولماسا, وليمپيا ويىندارىنا جولداماعا قول جەتكىزگەن سپورتشىنى اپارادى. فرانتسياداعى ويىنداردا بارلىعى 340 مەرگەن جۇلدەگە تالاسادى دەپ جوسپارلانعان.
باكۋ تورىندە ەڭ كوپ جولدامانى قىتاي جەڭىپ الدى. ولار 12 باعدارلامانىڭ جەتەۋىندە قازىردەن باستاپ كىمدى اپاراتىنىن ويلاستىرا بەرسە بولادى. سارى قۇرلىقتان سوڭعى بولىپ كەشە تراپ باعدارلاماسىندا كۋۆەيت سپورتشىسى جۇلدەگەر اتانىپ, قۇراماسىنا جولداما سىيلادى.
بۇگىنگى مالىمەت بويىنشا نىسانا كوزدەۋدەن (تاپانشا, ۆينتوۆكامەن وق اتۋ جانە ستەند اتۋ) 45 ەلدە جولداما بار. جارىس قوجايىنى رەتىندە فرانتسيا بىردەن 12 ليتسەنزياعا يە بولعان.
«كەلە جاتقان پاريجدەگى ويىنداردا توكيومەن سالىستىرعاندا نىسانا كوزدەۋدەن از سپورتشى قاتىسادى (جاپونيادا 360 ليتسەنزيا بولعان). سىزدەردىڭ سپورتشىلارىڭىز ءالى قۇرلىق چەمپيوناتى مەن الەم كۋبوگىنىڭ فينالدى كەزەڭىندە جاقسى ناتيجە كورسەتىپ, ليتسەنزيا جەڭىپ الا الادى. جالپى ازيادا نىسانا كوزدەۋ قارقىندى دامىعان. بۇعان باكۋدەگى جارىس كەزىندە تاعى كۋا بولدىق», دەدى ISSF-ءتىڭ باس حاتشىسى ۆيللي گريل مىرزا.
قازىر ماريا دميتريەنكو, ايجان دوسماعامبەتوۆا, نارگيزا سارمانوۆا, دانيل پوچيۆالوۆ, الىشەر ايسالباەۆ پەن ۆيكتور حاسيانوۆ ستەند اتۋدىڭ تراپ باعدارلاماسىندا ارالاس كوماندالىق سىندا ونەر كورسەتىپ جاتىر. ەرتەڭنەن باستاپ جىلجىمالى نىسانا كوزدەۋدەن قازاقستاندىقتاردان باقتيار يبراەۆ, اندرەي حۋدياكوۆ, اسادبەك نازيركۋلەۆ, يليا زوتەەۆ, فاتيما يرنازاروۆا, زۋحرا يرنازاروۆا, الەكساندرا سادۋاكاسوۆا جۇلدەگە تالاستى باستايدى. ازەربايجان استاناسىنداعى دودا 1 قىركۇيەكتە مارەسىنە جەتەدى. بيىلعى دوداعا 101 مەملەكەتتەن 1250 مەرگەن كەلدى.