جەتىسۋ جەرىندەگى تابيعي اپات ەلدى ەلەڭ قىلىپ قويدى. قاراپايىم تۇرعىندار كۇز جاقىنداعاندا باسپاناسىنان ايىرىلىپ, الەم-جالەم كۇيگە ءتۇستى. دەگەنمەن وبلىس اكىمدىگى حالىقتىڭ تىلەگىن قالىس قالدىرمايمىز دەپ وتىر.
سوڭعى مالىمەتتەرگە سۇيەنسەك, ەسكەلدى اۋدانىنا قاراستى ەشكىولمەس جانە اباي اۋىلدارىنداعى جاڭبىر سۋى شايىپ كەتكەن ۇيلەر تولىق تەكسەرىلىپ, سوعان ساي جۇمىستار جۇرگىزىلۋدە. قازىر 89 ۇيگە زالال كەلتىرىلگەنى انىقتالىپ وتىر. ونىڭ ىشىندە 22 ءۇي اپاتتى دەپ تانىلىپ, سۇرىلۋگە جاتادى دەگەن قورىتىندى شىعارىلعان. قالعان ۇيلەرگە كۇردەلى جوندەۋ جۇمىستارى جۇرگىزىلەدى. بۇگىندە ەلدى مەكەندەردىڭ كوشەلەرى مەن تۇرعىن ءۇي اۋلالارىن باتپاق پەن قوقىستان تازارتۋ جۇمىستارى اياقتالعان. 200 تۇرعىن ءۇي اۋلالارى تازارتىلىپ, 200 توننا قوقىس شىعارىلدى. تج سالدارىن جويۋ شارالارىنا جالپى سانى 400 ادام, 50-دەن اسا تەحنيكا تارتىلعان. الداعى ۋاقىتتا مۇنداي توتەنشە جاعدايدى بولدىرماۋ ءۇشىن كانال ارنالارىن تازالاۋ, كانالدىڭ وتكىزۋ قابىلەتىن ۇلعايتۋ جۇمىستارى جۇرگىزىلۋدە. سونداي-اق 7 كوشەدە ۇزىندىعى 12,7 شاقىرىم اۆتوكولىك جولىنا ورتاشا جوندەۋ جۇرگىزىلىپ, 4 كوشەدەگى 4 شاقىرىم جولعا كوشەنى جارىقتاندىرۋ تىرەكتەرى ورناتىلادى. ماتەريالدىق شىعىنىن ەسەپتەۋ تولىق اياقتالعاننان كەيىن اتالعان ەلدى مەكەندەردەگى زارداپ شەككەن تۇرعىنداردىڭ بارىنە ءتيىستى ماتەريالدىق كومەك كورسەتىلەدى.
ايتپاقشى, اۋىل حالقى ەسكەلدىدەگى بىرنەشە ماسەلەنى اشىق ايتىپ, جاردەمدەسۋىن سۇراپ وتىر. «قارابۇلاققا تارتىلعان گاز قۇبىرى نەگە سونىڭ ىرگەسىندەگى ەشكىولمەسكە جەتكىزىلمەيدى؟ بىزگە گاز قاشان كەلەدى؟» دەيدى تۇرعىندار. وبلىستىق ەنەرگەتيكا جانە تۇكش باسقارماسىنىڭ باسشىسى اسەت قاناعاتوۆتىڭ ايتۋىنشا, اۋىلعا كوگىلدىر وتىن 2024 جىلى بەرىلەدى, ياعني ەشكىولمەس اۋىلى جوسپاردا بار. سول سياقتى اۋىل كوشەلەرىنىڭ جايى دا ايتىلدى. ەشكىولمەستەگى ۋشاكوۆ, تىنىشباەۆ كوشەلەرى جانە «سانجار» ساۋدا ۇيىنەن كيرزاۆودقا دەيىنگى ۇزىن كوشەگە ورتاشا جوندەۋ جۇمىستارى جاسالادى. قاراجاتى بولىنگەن. تەك مەملەكەتتىك ساتىپ الۋ كونكۋرسىنىڭ قورىتىندىسىمەن كەلىسپەۋشىلىكتەرىنە بايلانىستى مەردىگەر كومپانيالاردىڭ ءوزارا داۋلارىن زاڭ اياسىندا قاراۋ پروتسەستەرى ءجۇرىپ جاتىر. ءبىر شەشىم شىققاننان كەيىن مەردىگەر انىقتالىپ, جوندەۋ جۇمىستارى جۇرگىزىلەدى.
اۋىل بالالارىنىڭ قارابۇلاققا بارىپ وقۋى دا قيىندىق تۋعىزادى دەيدى تۇرعىندار. جانە قارابۇلاقپەن ەكى اراعا جۇرەتىن قوعامدىق كولىكتىڭ كۇنىنە ەكى رەت قاتىنايتىنى دا ازدىق ەتەدى ەكەن. وسى ورايدا وبلىس اكىمى بۇل اۋىلعا 200 ورىندى جاڭا مەكتەپ سالۋ تۋرالى شەشىم قابىلدانعانىن جەتكىزدى. جاڭا نىسان 2024-2025 جىلدارى ىسكە قوسىلادى. ال قوعامدىق كولىك وبلىس اكىمىنىڭ تاپسىرماسى بويىنشا ەندى كۇنىنە ەكى رەت ەمەس, ءتورت رەت جۇرەدى.
ەسكەلدى اۋدانىندا ورىن العان توتەنشە جاعدايدىڭ سالدارىن جويۋ شارالارىنا جاستار دا قولعابىس ەتتى. ەرىكتىلەر ۇيىمدارى العاشقى كۇننەن-اق كومەك قورىن اشىپ, ەۆاكۋاتسيالانعان ازاماتتارعا جانە ءوز ۇيىندە قالعان زارداپ شەگۋشىلەرگە دە ازىق-ت ۇلىك, كيىم-كەشەك اپارىپ, جاردەم جاسادى. سول سياقتى اۋلالاردان سۋ مەن باتپاق شىعارۋ, كوشە تازارتۋ, قوقىس شىعارۋ جۇمىستارىن اتقارعان جەكە قۇرام مەن ەڭبەك ۇجىمدارىنا اس ازىرلەۋ ىسىنە اتسالىستى. «Jetisu jastary» ورتالىعىنىڭ «Eskeldi jastary» فيليالىنىڭ جەتەكشىسى سەرىك جولدىباەۆتىڭ ايتۋىنشا, فيليال ارنايى كومەك قورىن اشىپ, زارداپ شەككەندەرگە قولداۋ كورسەتكەن. سول سياقتى اباي, ەشكىولمەس اۋىلدارىندا سۋ باسقان ۇيلەردى تازالاۋ جۇمىستارىنا كومەككە كەلگەن ازاماتتارعا, اتاپ ايتقاندا ءۇش كۇننىڭ ىشىندە جالپى سانى 1 200-دەي ادامعا يمام اعزام مەشىتىندە تاماق ازىرلەۋگە كومەك ەتتى, بۇل جۇمىس ءالى دە جالعاسىپ جاتىر. سول سياقتى Lider.kz «ادال» ەرىكتىلەر ۇيىمى دا يگى ىسكە قول ۇشىن سوزدى.
جالپى, ەسكەلدى اۋدانىندا سۋ باسقان اۋلالاردان 6 024 تەكشە مەتر سۋ شىعارىلىپ, ۇزىندىعى 450 مەتر ارىق جۇيەسى تازارتىلعان. 120 ءۇيدىڭ اۋلاسى تازارتىلىپ, 360 تەكشە مەتر باتپاق شىعارىلعان. ەشكىولمەس جانە اباي اۋىلدارىنداعى اۋلا اۋماقتارى مەن تۇرعىن ۇيلەردى قالپىنا كەلتىرۋ جۇمىستارىمەن بۇدان ءارى ءوز رەتىمەن ەسكەلدى اۋدانىنىڭ اكىمدىگى اينالىسادى.
جەتىسۋ وبلىسى