مەملەكەت باسشىسىنىڭ باستاماسىمەن وڭىرلەردەگى اۋىل حالقىنىڭ احۋالىن جاقسارتىپ, كىرىسىن ارتتىرۋعا قولداۋ كورسەتۋ ماقساتىندا «اۋىل اماناتى» قاناتقاقتى جوباسى قولعا الىنعانى بەلگىلى. جوبا اياسىنداعى تاپسىرمالاردى ورىنداۋ اباي وبلىسىندا دا قارقىن الدى. سونىڭ ىشىندە جەڭىلدەتىلگەن نەسيەلەر بەرۋ ءۇشىن باسىم باعىتتار تاڭدالىپ وتىر.
اۋىل شارۋاشىلىعى ءوندىرىسىن دامىتۋ جانە قىرداعى جۇرتشىلىقتى جاپپاي جۇمىسپەن قامتۋ ماقساتىندا 2023 جىلعا «اۋىل اماناتى» باعدارلاماسى بويىنشا 2,059 ملرد تەڭگە بولىنگەن ەدى. بۇل قاراجاتقا 535 جۇمىس ورنىن اشىپ, 425 شاعىن نەسيە بەرۋ جوسپارلانىپ وتىر.
«اۋىل اماناتى» باعدارلاماسىنا قاتىساتىن اباي وبلىسىنىڭ 6 اۋدانى انىقتالدى. اتاپ ايتقاندا, اباي, اقسۋات, اياگوز, جارما, كوكپەكتى, ءۇرجار اۋداندارىندا اتالعان باعدارلاما تالاپتارىنا ساي جۇمىستار اتقارىلادى.
ەكى باعىت بويىنشا شاعىن نەسيەلەر بەرۋ جۇزەگە اسادى. ياعني مال شارۋاشىلىعى سالاسىندا 1 548 331 000 تەڭگەگە 316 شاعىن نەسيە بەرۋ كوزدەلسە, وسىمدىك شارۋاشىلىعى سالاسىندا 511 ملن 250 مىڭ تەڭگەگە 109 شاعىن نەسيە بەرۋ جوسپارلانىپ وتىر. نەسيەلەۋ جۇمىستارىن ورىنداۋ وتكەن شىلدە ايىنان ورىندالا باستاعان. سەنىم بىلدىرىلگەن اگەنت رەتىندە انىقتالعان «سەمەي» اكك» اق ماۋسىم ايىندا اۋىلدىق وكرۋگ اكىمدەرىنە نەسيە بەرۋ شارتتارى بويىنشا سەمينار وتكىزگەن ەدى. جوعارىدا ايتىلعان 6 اۋداندا شارتتاردى ءتۇسىندىرۋ جانە قۇجاتتاردى قابىلداۋمەن اۋىلدىق اكىمدىك قىزمەتكەرلەرى اينالىسادى.
قازىرگى ۋاقىتتا «سەمەي» اكك» اق اگەنتتىڭ شوتىنا 1 ملرد 245 ملن تەڭگە كولەمىندە بيۋدجەت قاراجاتى اۋدارىلعان ەكەن. قالعان 814,8 ملن تەڭگەنى الداعى قىركۇيەك ايىندا يگەرۋ كوزدەلىپ وتىر. قۇجاتتاردى قابىلداۋ بارلىق 6 اۋداندا باستالدى.
قازىرگى كۇندە 466,2 ملن تەڭگەنى قامتيتىن 77 ءوتىنىم قارالىپ, سول ورايدا قاجەتتى نەسيەلەر بەرۋ تۋرالى وڭ شەشىم قابىلدانعان.
اباي وبلىسى