پارلامەنت سەناتىنىڭ دەپۋتاتتارى اقمارال ءالنازاروۆا مەن رۋسلان رۇستەموۆ قىزىلوردا وبلىسىندا جۇمىس ساپارىمەن بولدى.
دەپۋتاتتار ساپار اياسىندا وبلىستىق, قالالىق ءماسليحاتتاردىڭ دەپۋتاتتارىمەن, دەنساۋلىق ساقتاۋ باسقارمالارىنىڭ باسشىلارىمەن, سونداي-اق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارمالارىنىڭ باسشىلارىمەن كەزدەستى.
كەزدەسۋگە قاتىسۋشىلار ءوڭىر تۇرعىندارىن جۇمىسپەن قامتۋ, الەۋمەتتىك باعدارلامالاردى ىسكە اسىرۋ جانە دەنساۋلىق ساقتاۋدى قارجىلاندىرۋ سالاسىنداعى وزەكتى ماسەلەلەردى تالقىلادى.
«وڭىرلەردەگى پروبلەمالاردى شەشۋ ءۇشىن ءماسليحات دەپۋتاتتارىنا, سونداي-اق اتقارۋشى ورگاندارعا كەلەسى سەسسيادا زاڭ شىعارۋ قىزمەتى بارىسىندا ەسكەرىلەتىن ۇسىنىستار مەن يدەيالار بويىنشا جۇمىس ىستەۋدى ۇسىنامىز. سونىمەن قاتار وڭىرلەرمەن تىعىز قارىم-قاتىناس ورناتقان سەناتتا بىرنەشە جىلدان بەرى ء«وڭىر» دەپۋتاتتىق توبى بار», دەدى اقمارال ءالنازاروۆا.
پارلامەنتشىلەر سەنات قىزمەتىنىڭ قورىتىندىلارى مەن پارلامەنت دەپۋتاتتارىنىڭ باستاماسى بويىنشا ازىرلەنگەن زاڭدار تۋرالى كەزدەسۋگە قاتىسۋشىلارعا ايتىپ بەردى.
* * *
سەنات دەپۋتاتى سۇلتانبەك ماكەجانوۆ الماتى قالاسىنداعى جۇمىس ساپارى اياسىندا ەلىمىزدەگى ەڭ ءىرى رەكرەاتسيالىق تەحنيكا ورتالىعىنىڭ قىزمەتىمەن تانىستى.
كەزدەسۋ بارىسىندا سەناتور قالانىڭ كوممۋنالدىق قىزمەتتەرى پايدالاناتىن كوشەلەر مەن ماگيسترالداردى, اۋەجايلار مەن ەلدى مەكەندەردى تازالاۋعا جانە كۇتىپ ۇستاۋعا ارنالعان ارنايى تەحنيكالاردىڭ جاي-كۇيىنە نازار اۋداردى.
سونىمەن قاتار ءىس-شارا بارىسىندا تۋريستىك كلاستەردى ودان ءارى دامىتۋ ماسەلەلەرى تالقىلاندى. تابيعي لاندشافتتىڭ الەۋەتى مەن بىرەگەيلىگى ەسكەرىلگەن بۇل باعىت الماتى ءۇشىن ەرەكشە ماڭىزعا يە. ساراپشىلاردىڭ ايتۋىنشا, كلاستەردى دامىتۋ ءۇشىن تۋريستىك سالاعا ينۆەستيتسيا تارتۋ مەن مەملەكەت تاراپىنان قولداۋدىڭ ءمانى زور.
دەپۋتات وڭىردە تۋريستىك سالانى دامىتۋ ءۇشىن تۋريستىك باعىتتار مەن نىسانداردىڭ كولىكپەن بارۋعا قولجەتىمدىلىگىن قامتاماسىز ەتۋ, تۋريستەرگە قولايلى جاعداي جاساۋ, ىشكى جانە حالىقارالىق نارىقتاردا ەلدىڭ تۋريستىك الەۋەتىن ىلگەرىلەتۋدىڭ ءتيىمدى جۇيەسىن قالىپتاستىرۋ ماڭىزدى ەكەنىن اتاپ ءوتتى.
«مەملەكەت باسشىسى VIII سايلانعان پارلامەنتتىڭ ءبىرىنشى سەسسياسىندا تۋريستىك سالاداعى ەلەۋلى سەرپىلىس ءۇشىن ءبىرىنشى كەزەكتە ينفراقۇرىلىم ماسەلەسىن كەشەندى تۇردە شەشىپ, قىزمەت ساپاسىن تۇبەگەيلى جاقسارتۋ قاجەت ەكەنىن ايتتى. كاسىپكەرلەر تۋريزم سالاسىنداعى پەرسپەكتيۆالارعا نازار اۋدارۋى ءۇشىن وسىنداي جاعدايلار جاسالۋى كەرەك», دەدى سۇلتانبەك ماكەجانوۆ.
دەپۋتات كەزدەسۋ سوڭىندا سەناتتىڭ ەلىمىزدىڭ ودان ءارى الەۋمەتتىك-ەكونوميكالىق دامۋى جانە حالىقتىڭ تابىسىن ارتتىرۋ جولىنداعى الداعى زاڭ شىعارۋ قىزمەتىن اتاپ ءوتتى.