وبلىستىڭ شالعاي ەلدى مەكەندەرىنىڭ وقۋشىلارىن مەكتەپكە تاسىمالداۋ ءۇشىن قوسىمشا 23 اۆتوبۋس ساتىپ الىنادى, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا وبلىس اكىمى سەرىك شاپكەنوۆ ايماقتاعى ءبىلىم بەرۋ ۇيىمدارىنىڭ جاڭا 2023-2024 وقۋ جىلىنا دايىندىعى تۋرالى بايانداما جاسادى.
ايماق باسشىسىنىڭ ايتۋىنشا, وبلىستا جاڭا وقۋ جىلىنا 143 مىڭ وقۋشىنى قابىلداۋ جوسپارلانعان. بيىل ءبىلىم بەرۋ ۇيىمدارىنىڭ ماتەريالدىق-تەحنيكالىق بازاسىن نىعايتۋعا 4 544 527,0 ملن تەڭگە بولىنگەن. وعان قوسا جاڭا وقۋ جىلىندا شالعاي اۋىلدا تۇراتىن 4 561 وقۋشىنى تاسىمالداۋ ءۇشىن جاڭا اۆتوبۋستار ساتىپ الىنادى.
«وتكەن جىلى وبلىستا وقۋشىلاردى 49 اۆتوكولىك تەگىن تاسىمالدادى. ەندى جاڭا وقۋ جىلىندا 60 ەلدى مەكەندە 4 561 وقۋشىنى تاسىمالداۋ جوسپارلانىپ, قوسىمشا 23 اۆتوبۋس ساتىپ الۋ ءۇشىن 1,1 ملرد تەڭگە ءبولىندى. كولىكتەر قىركۇيەك ايىندا پايدالانۋعا بەرىلەدى. وقۋلىق جانە وقۋ-ادىستەمەلىك كەشەندەرمەن قامتۋ ءۇشىن 1 676 370,0 مىڭ تەڭگە ءبولىندى. وقۋلىقتار 25 تامىزعا دەيىن تولىقتاي جەتكىزىلىپ, تاراتىلادى. وبلىستاعى تۇپكىلىكتى شەشىلگەن ماسەلەلەردىڭ ءبىرى - 1-4 سىنىپ وقۋشىلارىن تولىق, 5-11 سىنىپتاعى الەۋمەتتىك از قامتىلعان وتباسى بالالارىن تەگىن ىستىق تاماقپەن قامتۋ. اتالعان شارا جاڭا وقۋ جىلىنان باستاپ جۇزەگە اسىرىلادى. بيىل 21 مەكتەپتە ينتەرنەت جىلدامدىعىن ارتتىرۋ جوسپارلانىپ, 108 332,1 مىڭ تەڭگە ءبولىندى. ناتيجەسىندە 20 مبيت/س جانە ودان جوعارى جىلدامدىقتاعى ينتەرنەتپەن قامتاماسىز ەتۋ پايىزى 43,3% قۇرايتىن بولادى», دەدى وبلىس باسشىسى.
ايتا كەتەيىك, اتىراۋ وبلىسىندا مودەرنيزاتسيالاۋ جۇمىستارىنا جاتاتىن 25 مەكتەپتىڭ بۇگىنگى كۇنى 5-ەۋى تولىقتاي اياقتالعان. قالعان 20 مەكتەپتە بىرنەشە باعىتتا جۇمىستار جۇرگىزىلىپ جاتىر. مودەرنيزاتسيالاۋ باعىتىنداعى جۇمىستار جىلدىڭ اياعىنا دەيىن ىسكە اسىرىلادى.
ۇكىمەت وتىرىسىنان كەيىن وبلىس اكىمى جاۋاپتى سالا باسشىلارىنا مودەرنيزاتسيالاۋدان ءوتىپ جاتقان مەكتەپتەردىڭ جۇمىس قارقىنىن جەدەلدەتۋدى تاپسىردى. سونداي-اق اتىراۋ قالاسى اكىمىنە 25 تامىزعا دەيىن بارلىق مەكتەپكە وقۋلىقتار جەتكىزۋ قاجەتتىگىن باستى نازاردا ۇستاۋدى مىندەتتەدى.