قاتارىنان وزا شاپقاندار قاشاندا قوشەمەتكە لايىق. اسىرەسە بالالارعا بۇل – تاپتىرماس موتيۆاتسيا. كەلەسى ءبىر باسپالداقتىڭ باستاۋحاتى دەسە دە بولادى. وسى رەتتە اقشي اۋىلىنداعى «جالىن» جازعى ساۋىقتىرۋ لاگەرى رەسمي تۇردە اشىلدى. ۇزدىك وقۋشىلارعا سىي-قۇرمەت كورسەتىلىپ, دۋماندى كەش ۇيىمداستىرىلدى.
لاگەردىڭ اشىلۋىنا قاتىسقان وبلىس اكىمى بەيبىت يساباەۆ الدىمەن ونداعى شىعارماشىلىق ءۇيىن ارالاپ, دارىندى بالالاردىڭ قولونەر جانە سۋرەت كورمەسىمەن تانىستى. نىساننىڭ ىشكى جاعدايىن باعامداپ, جاتىن بولمەلەرىن, اسحاناسىن ارالاپ كوردى, بالالارمەن تىلدەستى. سالتاناتتى شارادا بالالاردى قۇتتىقتاعان ايماق باسشىسى وڭىردە وقۋشىلاردىڭ جازعى دەمالىسىن ۇيىمداستىرۋعا ەرەكشە كوڭىل ءبولىنىپ وتىرعانىن ايتتى.
– حالىقارالىق, رەسپۋبليكالىق باسەكەلەردە توپ جارعان ونەرلى, ءبىلىمدى 100 بالا «جالىن» لاگەرىنە جينالىپ وتىر. ءبىز بالالاردىڭ زامانعا ساي ءبىلىم الۋىنا, پايدالى دەمالىسىنا ەرەكشە باسىمدىق بەرەمىز. قازىر عىلىم مەن تەحنيكانىڭ زامانى. ءبىلىمدى, تەحنولوگيانى جاقسى مەڭگەرگەن جاستارى بار مەملەكەت قانا وزىق بولادى. الداعى ۋاقىتتا دا ءبىلىم مەن ونەر جارىستارىندا قازاقستاننىڭ, جەتىسۋ وبلىسىنىڭ مارتەبەسىن كوتەرىپ, جەتىستىكتەرگە جەتە بەرىڭىزدەر. جازعى دەمالىستى تاماشا وتكىزىپ, وقۋ جىلىنا جاڭا سەرپىنمەن, كۇش-جىگەر جيناپ كەلۋلەرىڭىزگە تىلەكتەسپىن, – دەدى ب.يساباەۆ.
اقجارما تىلەكتەن كەيىن وبلىس باسشىسى حالىقارالىق جانە رەسپۋبليكالىق زياتكەرلىك شارالار جەڭىمپازدارىن ماراپاتتادى. سونىڭ ىشىندە رەسپۋبليكالىق «باستاۋ» وليمپياداسىندا ءى ورىن العان كوكسۋ اۋدانى ق.جالايىري اتىنداعى مەكتەپتىڭ 3-سىنىپ وقۋشىسى جانبوتا بولاتقا جانە حالىقارالىق «تۋيماادا» وليمپياداسىنىڭ ءىIى ورىن يەگەرى, م.ارىن اتىنداعى №24 مامانداندىرىلعان ليتسەيىنىڭ 10-سىنىپ وقۋشىسى اقبوتا جۇمابەكوۆاعا 300 مىڭ تەڭگە تابىستادى. بۇدان بولەك, حالىقارالىق «ايبىن – 2023» اسكەري-پاتريوتتىق جاستار جيىنىندا جۇلدەگەرلەر تۇعىرىنان كورىنگەن تالدىقورعان قالاسىنداعى ب.جولبارىس ۇلى اتىنداعى №18 ورتا مەكتەپ-ليتسەيىنىڭ اسكەري-پاتريوتتىق «جاس دەسانتشىلار» كلۋبىنا 500 مىڭ تەڭگە تارتۋ ەتتى. سونداي-اق وزبەكستاندا وتكەن حالىقارالىق حورەوگرافيالىق ونەر بايقاۋىنىڭ باس جۇلدەسىن جەڭىپ العان كوكسۋ اۋدانىنداعى «ونەر» مەكتەبىنىڭ «كەربەز» جوعارى بي توبىنا جانە قىزدار ۆولەيبول كوماندالارىنىڭ اراسىنداعى رەسپۋبليكالىق ۇلتتىق مەكتەپ ليگاسىنىڭ جۇلدەگەر اتانعان كومانداسىنا 1 ملن تەڭگە بەرىلدى. تىنىعۋشى وقۋشىلار اتىنان نۇراسىل ءشارىپوۆ قۇتتىقتاۋ ءسوزىن جەتكىزىپ, بالالار فلەشموب بيلەدى.
ءوڭىر اكىمى ءباسپاسوز قىزمەتىنىڭ مالىمەتىنشە, «جالىن» جازعى ساۋىقتىرۋ لاگەرى ارقايسىسى 20 ورىنعا ارنالعان 5 كورپۋستان تۇرادى. نىساننىڭ قۇرىلىسىنا 1 ملرد 15 ملن تەڭگە ءبولىنىپ, قۇرىلىس جۇمىستارىن «داۋلەت-سەرپىن» جشس جۇرگىزدى. عيماراتتىڭ جالپى الاڭى 11 709 شارشى مەتر. ءبىر اۋىسىمدا 100 بالا قابىلداي الاتىن لاگەردە 100 ورىندىق مادەنيەت ءۇيى, 60 ورىندىق اسحانا, 5 بالالار ويىن الاڭى, 1 جاتتىعۋعا ارنالعان سپورت الاڭى, 10 دەمالىس ورنى بار. ماتەريالدىق-تەحنيكالىق بازاسى جاساقتالىپ, ينتەراكتيۆتى تاقتا, كومپيۋتەرلەر, سپورتتىق ويىندارعا ارنالعان جابدىقتار, مۋزىكالىق اسپاپتار قويىلعان. قازىر مۇندا 13 ادام جۇمىس ىستەيدى, سونىڭ ىشىندە ءجۇزۋ جەتەكشىسى, دەنە شىنىقتىرۋ مامانى, تاربيەشى, مۋزىكا جەتەكشىسى سياقتى ارنايى ماماندار بار.
لاگەردىڭ ءبىرىنشى اۋىسىمىندا وبلىستاعى حالىقارالىق, رەسپۋبليكالىق وليمپيادا, عىلىمي جوبا بايقاۋلارىنىڭ جەڭىمپازدارى مەن سپورت, ونەر باعىتىنداعى دارىندى بالالار دەمالىپ جاتىر. كەلەسى اۋىسىمدا وبلىستاعى اسكەري پاتريوتتىق كلۋبتار, كادەت سىنىپتارى, «جاس سارباز» قوزعالىسى جانە رەسپۋبليكالىق دەبات قوزعالىسىنىڭ جەڭىمپازدارى قامتىلادى. ال كەلەسى جىلى جاز مەزگىلىندە مۇندا 1 200 بالا دەمالىسپەن قامتىلادى دەپ جوسپارلانعان. جالپى, بيىل جەتىسۋ وبلىسىندا 10 مىڭنان اسا بالا وسىنداي قالا سىرتىنداعى لاگەردە دەمالادى.
جەتىسۋ وبلىسى