بۇگىندە ءبىلىم بەرۋ سالاسىنىڭ قاي ساتىسىن بولسىن, جەڭ ۇشىنان جالعاسقان جەمقورلىق جايلاپ العانى بەلگىلى. ەلىمىزدىڭ قاي وبلىسىن الىپ قاراساق تا سىبايلاس جەمقورلىق فاكتىلەرى نەگىزىنەن وسى سالاعا جاۋاپتى باسشىلاردىڭ اتىن كۇن سايىن ايگىلەپ جاتىر.
ولاردىڭ قاتارىنا قۇرىلعانىنا جىلدان اسقان اباي وبلىسىنىڭ ءبىلىم سالاسى دا ىلىككەنى وكىنىشتى-اق. وبلىستىڭ 6 اۋدانى بويىنشا ءبىلىم سالاسىن دامىتۋعا باعىتتالعان بيۋدجەت قارجىسىنىڭ تالان-تاراجعا تۇسكەنى اشكەرەلەنىپ وتىر. بۇل تۋرالى اباي وبلىسى بويىنشا سىبايلاس جەمقورلىققا قارسى دەپارتامەنت باسشىسىنىڭ ءبىرىنشى ورىنباسارى رۇستەم توقبەرگەنوۆ مالىمدەدى. بەلگىلى بولعانداي, بۇل سالاداعى بىلىقتىڭ ەتەك الۋىنا كوبىنە مەكتەپ ديرەكتورلارى مەن ەسەپشىلەرى, بالاباقشا مەڭگەرۋشىلەرى, ءبىلىم بولىمدەرىنىڭ باسشىلارى مەن ماماندارى جول بەرىپ وتىر. بارماق باستى, كوز قىستى ارەكەتتەر نەگىزىنەن كادرلىق ماسەلەلەردى شەشۋ, جالاقىنى ەسەپتەۋ, جالعان اتتەستاتتار بەرۋ, تاعى دا باسقا قاراجات جىمقىرۋدىڭ قۇلاعى قىلتياتىن سەبەپتەردەن شىعادى.
رۇستەم توقبەرگەنوۆتىڭ ايتۋىنشا, ءبىلىم سالاسىنداعى جەمقورلىق فاكتىلەرى انىقتالعان اباي وبلىسىنىڭ 6 اۋدانى بويىنشا 3 ديرەكتور, 6 ەسەپشى, 1 ەكونوميستىڭ ءىسى اشكەرەلەنىپ وتىر. اتاپ ايتقاندا, سەمەي قالاسىندا, اباي, اياگوز, جارما, كوكپەكتى جانە ءۇرجار اۋداندارىندا ورىن العان. مەملەكەت قارجىسىن تالان-تاراجعا سالۋدىڭ جالپى سوماسى 19,7 ملن تەڭگەگە جەتكەن.
ماسەلەن, جارما اۋداندىق سوتىنىڭ ۇكىمىمەن مەكتەپكە دەيىنگى مەكەمە ەسەپشىسى 2,4 ملن تەڭگە مولشەرىندە بيۋدجەت قاراجاتىن قۇمعا سىڭگەن سۋداي ەتكەنى ءۇشىن ايىپتالىپ وتىر. وعان 2,5 جىل مەرزىمگە باس بوستاندىعىنان ايىرۋ تۇرىندەگى جازا تاعايىندالعانىمەن, جاس بالانى تاربيەلەپ وتىرعانى ەسكەرىلىپ, جازانى وتەۋ مەرزىمى 5 جىلعا شەگەرىلدى. بىراق سوت ۇكىمى ءالى زاڭدى كۇشىنە ەنگەن جوق. ءبىلىم سالاسىندا سىبايلاس جەمقورلىق فاكتىلەرىنىڭ تامىر جايۋىنا مەكەمە باسشىلارىنىڭ سالعىرتتىعى دا سەبەپ بولىپ وتىر. قارجىلىق قيتىرقىلىقتاردى ونىڭ قول استىنداعى ەسەپشىلەرى جۇزەگە اسىراتىندىعى سونىڭ ءبىر دالەلى. تاعى دا سول, جارما اۋدانىندا ءبىلىم بەرۋ مەكەمەسىنىڭ ەسەپشىسى باسشىسىنىڭ ەلەكتروندىق قولتاڭباسى ارقىلى ۇيدە جۇمىس ىستەپ, بيۋدجەت قاراجاتىن «جۇتىپ قويعانىنا» نە دەرسىز؟
جالپى, ءبىلىم سالاسىنداعى جەمقورلىقتىڭ ودان ءارى دە جالعاسا بەرمەۋى ءۇشىن قانداي قادامداردى قولدانعان دۇرىس؟ رۇستەم توقبەرگەنوۆ بۇل تۇرعىدا بىرنەشە ۇسىنىستى ورتاعا سالدى. الدىمەن بيۋدجەتتىك وتىنىمدەردى قالىپتاستىرۋ ۇدەرىسىن اۆتوماتتاندىرۋ قاجەت. «سونىمەن قاتار بارلىق ءبىلىم بەرۋ مەكەمەسىنە ارنالعان بۋحگالتەرلىك ەسەپتى جۇرگىزۋدىڭ بىرىڭعاي جۇيەسىن قولدانىسقا ەنگىزۋ كەرەكتىگى بايقالىپ تۇر. تاعى ءبىر وزەكتى ماسەلە – «جالعان ورىنداردى» بولدىرمايتىن جۇمىسشى پەرسونالىن باقىلاۋدى اۆتوماتتاندىرۋ. ءبىلىم باسقارماسىنىڭ جانىنان ىشكى اۋديت قىزمەتىن قۇرۋدى قولعا الساق, سالاداعى سىبايلاستىققا توسقاۋىل قويا الاتىنىمىز انىق», دەيدى ر.توقبەرگەنوۆ.
اباي وبلىسى