ەلوردادا قالا كۇنى مەرەكەسى قارساڭىندا «استانانىڭ 25 جىلدىعى: استانا – بولاشاق قالاسى» اتتى فورۋم ءوتىپ, ونىڭ اياسىندا «مەديتسينالىق تۋريزم» پانەلدىك سەسسياسى ۇيىمداستىرىلدى. وعان مەديتسينالىق ءتۋريزمنىڭ جاھاندىق نارىعىن دامىتۋعا اتسالىسىپ جۇرگەن بىلىكتى ساراپشىلار قاتىستى. قاتىسۋشىلار قىتاي, تۇركيا, وزبەكستان, يزرايل, ازەربايجان, رەسەي جانە بەلارۋس ەلدەرىنەن كەلدى. سونداي-اق قاتىسۋشىلار اراسىندا رەسپۋبليكالىق جەتەكشى مەديتسينالىق ۇيىمدار, ونىڭ ىشىندە JCI (Joint Commission International) حالىقارالىق ساپا سەرتيفيكاتىمەن اككرەديتتەلگەن مەكەمەلەر بار.
سەسسيا اياسىندا قازاقستانداعى مەديتسينالىق ءتۋريزمنىڭ قازىرگى احۋالى, ونىڭ دامۋ پەرسپەكتيۆاسى مەن پروبلەمالارى جانە اتالعان باعىتتاعى كوشباسشى ەلدەردىڭ تاجىريبەسى تالقىلاندى. قازاقستان مەديتسينالىق تۋريزم قاۋىمداستىعىنىڭ پرەزيدەنتى كريستينا كريۆەتستىڭ ايتۋىنشا, «University Medical Center» (UMC) كورپوراتيۆتى قورى اياسىندا استانادا مەديتسينالىق تۋريزم كلاستەرى قۇرىلدى.
«وعان JCI اككرەديتاتسياسىنان وتكەن كلينيكالار ەندى. ايتا كەتەيىن, JCI – اقش-تا ازىرلەنگەن, دەنساۋلىق ساقتاۋ ساپاسىنىڭ جوعارعى دەڭگەيىن راستايتىن ستاندارت. قازىر استاناداعى مەديتسينالىق تۋريزم كارتيناسى ايتارلىقتاي وزگەردى. بۇرىن بىزگە نەگىزىنەن قىرعىزستان, وزبەكستاننان ادامدار ەم الۋعا كەلسە, قازىر ەمدەلۋشىلەر رەسەيدەن دە كەلە باستادى. الىس شەتەلدەردەن ستوماتولوگيا جانە رەپرودۋكتيۆتى مەديتسينا قىزمەتتەرىن پايدالانعىسى كەلگەن ازاماتتار ات باسىن بۇرادى. بىزگە كەلىپ ەم قابىلداپ جاتقان ەلدەر قاتارىندا شۆەيتساريا, اقش, بىرىككەن اراب امىرلىكتەرى, اۋستراليا جانە افريكا ەلدەرى بار», دەيدى ك.كريۆەتس.
ونىڭ مالىمدەۋىنشە, JCI بويىنشا اككرەديتاتسيا – ايتارلىقتاي قىمبات پروتسەدۋرا. مەديتسينالىق مەكەمەدە بارلىق حالىقارالىق تالاپقا ساي كەلەتىن قىزمەتتى كورسەتە الاتىنداي بيۋدجەت بولۋعا ءتيىس.
«شەتەلدىك ەمدەلۋشىلەر تەك ەم ءۇشىن عانا ەمەس, سونىمەن بىرگە جايلى جاعداي, كۇشتى سەرۆيس ءۇشىن دە كەلەدى. ولار قاۋىپسىزدىك پەن ساپا ستاندارتتارىنا ساي كەلەتىن, سونىمەن قاتار اعىلشىن تىلىندە قىزمەت كورسەتىلەتىن مەملەكەتتىك جانە جەكە كلينيكالاردى تاڭدايدى. استانانىڭ مەديتسينالىق كلاستەرىندە كارديوحيرۋرگيا, نەيروحيرۋرگيا, رەپرودۋكتيۆتى مەديتسينا, بالالاردى ساۋىقتىرۋ سياقتى باعىتتار جاقسى دامىعان. سونداي-اق مەملەكەتتىك سەكتورعا قاتىسسىز ستوماتولوگيا جانە پلاستيكالىق حيرۋرگيا باعىتىن دا اتاپ وتكەن ءجون», دەدى ول.
جالپى, 2022 جىلى ەلىمىزگە 5 مىڭ ادام ەم الۋ ءۇشىن جانە دياگنوستيكادان ءوتۋ ءۇشىن كەلگەن. بيىل شامامەن 8 مىڭ ادام كەلەدى دەپ كۇتىلىپ وتىر.
«ەگەر ءبىز نەيروحيرۋرگيا تۋرالى ايتار بولساق, ءبىرىنشى بولىپ «Vanadis» تەحنولوگياسى – ورتالىق ازياداعى جالعىز گامما-پىشاق اۋىزعا ىلىگەدى. بۇل دەگەنىمىز – ءينۆازيۆتى ەمەس پرەناتالدى سكرينينگ, ول جەردە انالار پلاتسەنتانى تەسپەي-اق گەنەتيكالىق اۋىتقۋلاردىڭ بار-جوعىن انىقتاي الادى. ال دياگنوستيكا, قىزمەت قۇنى تۋرالى ايتار بولساق, وندا رەسەيگە قاراعاندا 1,5 ەسە تومەن باعادا قىزمەت كورسەتە الامىز. گەرمانيا, يزرايلمەن سالىستىرعاندا بىزدە دياگنوستيكادان ءوتۋ, ەمدەلۋ 3 ەسە ارزانعا شىعادى», دەدى ك.كريۆەتس.
جالپى العاندا, ماماندار استانانىڭ مەديتسينالىق تۋريزم ورتالىعىنا اينالىپ كەلە جاتقانىن جانە وعان تولىققاندى مۇمكىندىگى بار ەكەنىن دە ايتادى. قازىر باس شاھاردا جەتكىلىكتى الەۋەت بار – جوعارى تەحنولوگيالىق قۇرىلعىلارمەن جابدىقتالعان, حالىقارالىق ستاندارتتارعا ساي, باعاسى قولجەتىمدى, قىزمەت سپەكترى اۋقىمدى جانە قىزمەت كورسەتۋ دەڭگەيى جوعارى كلينيكالار سانى كوبەيىپ كەلەدى.
«قازاقستان ارقاشان ءبىزدىڭ ماڭىزدى سەرىكتەسىمىز بولدى. مەنىڭشە, مۇنىڭ ءبىر سەبەبى حالىقتىڭ وسىندا ساپالى مەديتسينالىق كومەك الۋى جانە سونىڭ ناتيجەسىندە مەديتسينالىق تۋريستەردى تارتۋ ءۇشىن مەملەكەت تاراپىنان كادرلارعا ينۆەستيتسيا قۇيۋى دەپ ويلايمىن. مۇندا ماماندار ەۋروپادان, ءتىپتى امەريكادان كەلىپ جاتىر. نەگە, سەبەبى – مۇندا ايتارلىقتاي ارزان, ونىڭ ۇستىنە مەديتسينا تۇسىنىكتى, بەلگىلى, JCI اككرەديتاتسياسى بار, بۇل – ەڭ ماڭىزدى الەمدىك اككرەديتاتسيا. سوندىقتان قازاقستاننىڭ مەديتسينالىق تۋريزم ورتالىعى اتانباۋىنا ەشقانداي كەدەرگى كەلتىرەرلىك سەبەپ جوق», دەپ پىكىرىن ءبىلدىردى يزرايلدەگى مەديتسينالىق ورتالىقتىڭ باس ديرەكتورى ناتاليا مەلەح.
قازىر ەلىمىزدە JCI ستاندارتىمەن جۇمىس ىستەيتىن 9 كلينيكا بار. تەك سونىڭ بىرەۋى عانا – جەكەمەنشىك. ك.كريۆەتستىڭ ايتۋىنشا, قازىر وتاندىق مەديتسيناعا جاقسى پروموۋشەن جەتىسپەي تۇر. الداعى ۋاقىتتا قاۋىمداستىق مەديتسينالىق ۇيىمدارمەن تىزە قوسىپ جۇمىس ىستەپ, ەلدەگى مەديتسينالىق قىزمەت ساپاسىن ودان ءارى ارتتىرۋعا, اقپاراتتى مەيلىنشە كەڭىنەن تاراتىپ, شەتەلدىكتەردىڭ دە سەنىمىن وياتۋعا كۇش سالماق.