پاريجدە الاۋى تۇتاناتىن جازعى وليمپيا ويىندارىنىڭ باستالۋىنا دا ءبىر جىلدان ءسال اسا ۋاقىت قالدى. قازىر وليمپيادا باعدارلاماسىنا ەنگەن بىرقاتار سپورت تۇرىنەن جولدامالار ساراپقا سالىنىپ جاتسا, كەي سپورت تۇرىنەن ليتسەنزيالار ەندى تاراتىلا باستايدى. ماسەلەن, كۇنى كەشە حالىقارالىق كۇرەس فەدەراتسياسى (UWW) 2024 جىلعى پاريج وليمپياداسىنىڭ جولدامالارى ساراپقا سالىناتىن بەلدەسۋلەر قاي قالالاردا وتەتىنىن مالىمدەدى. ياعني وليمپياداعا دەيىنگى بالۋاندار باسەكەسىنىڭ ىرىكتەۋى ءۇش كەزەڭگە جالعاسىپ, الەمنىڭ ءۇش قالاسىندا ۇيىمداستىرىلادى.
وليمپياداعا ىرىكتەۋ جارىستارىنىڭ العاشقىسى وسى جىلدىڭ 16-24 قىركۇيەگى كۇندەرى سەربيا استاناسى بەلگرادتا وتەتىن الەم چەمپيوناتى بولماق. كۇزدەگى جاھاندىق دودادا وليمپيا ويىندارىنىڭ باعدارلاماسىنا ەنەتىن ءار سالماقتا 5 ليتسەنزيا ساراپقا سالىنادى. مۇندا قولا مەدال جولىندا جەڭىلگەن ەكى بالۋان ءوزارا كۇرەسىپ, 5-جولداماعا يەلىك ەتەدى. سەربيادا جالپى سانى 90 بالۋان جولداما يەگەرى اتانادى.
ال كەيىنگى ەكى كەزەڭ 2024 جىلعا جوسپارلانعان. ونىڭ العاشقىسى ءساۋىر ايىندا وتەتىن قۇرلىقتىق ىرىكتەۋ جارىستارى بولسا, سوڭعىسى ىستانبۇل قالاسىنداعى شەشۋشى ىرىكتەۋ ءتۋرنيرى. ماسەلەن, ازيا قۇرلىعىنىڭ ىرىكتەۋ جارىستارى 19-21 ءساۋىر كۇندەرى قىرعىزستاننىڭ بىشكەك قالاسىندا وتەدى. سپورتتى دامىتۋ ديرەكتسياسىنىڭ مالىمەتى بويىنشا, مۇندا ءار سالماقتا فينالعا شىققان ەكى بالۋان عانا پاريج جولداماسىن قورجىنعا سالادى. پانامەريكا چەمپيوناتى مەن سول قۇرلىقتاعى ىرىكتەۋ دوداسىن اكاپۋلكو (مەكسيكا) قالاسى قابىلدايدى. سونىمەن قاتار افريكا مەن تىنىق مۇحيتى ايماعىنىڭ ەلدەرى كايردە (مىسىر), ەۋروپانىڭ بوزكىلەم شەبەرلەرى باكۋدە (ازەربايجان) جينالادى. ءار قۇرلىقتاعى تۋرنيردە 36 كۆوتادان بەرىلسە, بارلىعى 144 بالۋان وليمپياداعا بارادى.
ال 9-12 مامىر كۇندەرى ىستانبۇل قالاسىنداعى قورىتىندى ىرىكتەۋ كەزەڭىندە (World Olympic Qualifier) الەم بالۋاندارى ءار سالماقتاعى ەڭ سوڭعى 3 جولداما ءۇشىن تالاسادى. وسى تۇستا قولا جۇلدە العان ەكى سپورتشى تاعى ءوزارا كۇش سىناسىپ, سوڭعى ليتسەنزيانىڭ يەگەرىن انىقتاۋى كەرەك. وسىلايشا, بالۋاندار قالعان 54 جولدامانىڭ تاعدىرى تۇركيا بوزكىلەمىندە شەشەدى.
بۇل جەردە ءبىر ەسكەرە كەتەر جايت, كۇرەس تۇرلەرىنەن وليمپيادانىڭ جولداماسى جەكەلەگەن سپورتشىعا ەمەس, UWW-عا مۇشە ۇلتتىق فەدەراتسيالارعا بەرىلەدى. سايكەسىنشە, وليمپياداعا كىم باراتىنىن سول ەلدىڭ فەدەراتسياسى ءوزى شەشەدى.
پاريج تورىندە توكيو وليمپياداسى سياقتى ءار سالماقتا تاڭداۋلى 16 بالۋان جۇلدەگە تالاسادى. كۇرەس تۇرلەرىنەن وليمپيادا باعدارلاماسىنا بارلىعى 18 سالماق دارەجەسى ەنگەن. ياعني گرەك-ريم كۇرەس بويىنشا: 60, 67, 77, 87, 97, 130 كيلودان جوعارى, ەركىن كۇرەس بويىنشا: 57, 65, 74, 86, 97, 125 كيلو جانە ايەلدەر كۇرەسى بويىنشا: 50, 53, 57, 62, 68, 76 كيلو.