استانانىڭ 25 جىلدىعىنا وراي ۇيىمداستىرىلعان بوكستان ەرلەر جانە قىزدار اراسىنداعى «ەلوردا كۋبوگى» حالىقارالىق ءتۋرنيرى ءوز مارەسىنە جەتتى. بيىل ەكىنشى رەت جالاۋى جەلبىرەگەن بايراقتى باسەكەدە ەلىمىزدىڭ ەرلەر قۇراماسى 8 التىن, 9 كۇمىس, 15 قولا مەدال, بۇرىمدى بوكسشىلار 8 التىن, 9 كۇمىس, 13 قولا جۇلدە ولجالاپ, «Beeline Arena» سپورت كەشەنىنە جينالعان بارشا بوكس جانكۇيەرىن قۋانىشقا بولەدى.
ءبىر اپتاعا جالعاسقان جارىستا ەرلەر قۇراماسى – 13, əيەلدەر – 12 سالماق دارەجەسىندە كىم مىقتىنى انىقتادى. الىس-جاقىن شەتەلدەن كەلگەن قۇرامالاردىڭ باپكەرلەرى بۇل تۋرنيرگە ءوز ەلدەرىنىڭ ەكىنشى جانە ءۇشىنشى ءنومىرلى بوكسشىلارىن اكەلىپ, شاكىرتتەرىنىڭ شەتەلدەگى تۋرنيردە قالاي ونەر كورسەتەتىنىن بايقاسا, مىرزاعالي ايتجانوۆ جاس بوكسشىلارمەن قاتار, وليمپيادا, əلەم جəنە ازيا چەمپيوناتىنىڭ جەڭىمپازى مەن جۇلدەگەرلەرىن قاتىستىردى. سونىمەن قاتار ۇلتتىق قۇرامانىڭ باپكەرلەر قوسىنى تۋرنير بارىسىندا الداعى ازيا ويىندارىنا باراتىن بىرنەشە سالماقتاعى نەگىزگى بوكسشىلاردى انىقتاپ العانىن دا ايتا كەتكەن ءجون. ماسەلەن, 57, 63,5 جəنە 92 كيلو سالماقتاردا ۇزدىك شىققان سپورتشىلار قىركۇيەك پەن قازان ايى ارالىعىندا قىتايدىڭ حانچجوۋ قالاسىندا ازيا ويىندارىنا قاتىسىپ, پاريج وليمپياداسىنىڭ جولداماسىن يەلەنۋگە تالپىنىپ كورەدى.
ەندى وسى نەگىزگى ءۇش سالماقتىڭ ناتيجەلەرىنە از-كەم توقتالىپ وتسەك. بيىلعى دودادا ناعىز تارتىستى جەكپە-جەكتەر 57 كيلو سالماق دارەجەسىندە وربىگەنى بەلگىلى. ويتكەنى وليمپيا ويىندارىنىڭ باعدارلاماسىنا ەنگەن سالماقتا ەلىمىزدىڭ كىل مىقتى بوكسشىلارى جۇدىرىقتاستى. اتاپ ايتقاندا, وسى سالماقتىڭ ۇزدىگى, 2021 جىلعى الەم چەمپيوناتىنىڭ جانە 2022 جىلعى ازيا بىرىنشىلىگىنىڭ كۇمىس جۇلدەگەرى سەرىك تەمىرجانوۆتان بولەك, جۋىردا عانا تاشكەنتتە وتكەن الەم چەمپيوناتىندا, ونىڭ الدىنداعى 22 جاسقا دەيىنگى جاستار اراسىنداعى ازيا بىرىنشىلىگىندە چەمپيون اتانعان 54 كيلو سالماقتاعى تالانتتى بوكسشى ماحمۇد سابىرحان, ەل چەمپيوناتىنىڭ جۇلدەگەرلەرى ورازبەك اسىلقۇلوۆ, جاستار اراسىنداعى الەم چەمپيوناتىنىڭ كۇمىس جۇلدەگەرى ەربولات سابىر, تاعى باسقا بوكسشىلار دا ونەر كورسەتتى.
22 جاستاعى ماحمۇد سابىرحان جارىس بارىسىندا جاڭا سالماق دارەجەسىندە جۇدىرىقتاسسا دا, 57 كيلونى جاتسىنباي, ءوزىن ەركىن سەزىنىپ, فينالعا دەيىن القىنباي جەتتى. تۇساۋكەسەر كەزدەسۋىندە ول ەل چەمپيوناتىنىڭ جانە حالىقارالىق جارىستاردىڭ جۇلدەگەرى ورازبەك اسىلقۇلوۆتان 4:1 ەسەبىمەن باسىم تۇسسە, ودان كەيىنگى جەكپە-جەگىندە موڭعوليالىق كحاركۋ بيلگۋنسايحاندى 5:0 ەسەبىمەن تىزە بۇكتىردى. ال جارتىلاي فينالدا سەرىك تەمىرجانوۆپەن شەبەرلىك بايقاستى. قوس مىقتىنىڭ كەزدەسۋىن تاماشالاۋعا «Beeline Arena» سپورت كەشەنىنە وتە كوپ جانكۇيەر جينالدى. ماماندار مەن بوكس جانكۇيەرلەرىنىڭ قىزىعۋشىلىعىن تۋدىرعان ايقاستا ماحمۇد ءوز مىقتىلىعىن دالەلدەپ, جارىس جەڭىمپازى اتاندى. تەمىرجانوۆ بۇل كەزدەسۋدە ماحمۇدقا قارسى ەشقانداي ايلا-ءتاسىل قولدانا المادى. ءۇش راۋند بويى سوققى جاساۋعا مۇرشاسى كەلمەي, تەك قورعانۋمەن بولدى. قورىتىندى ەسەپ – 4:1.
سونداي-اق ازيا ويىندارىنا ىرىكتەۋ سالماعى بولعان 63,5 كيلودا دا جەكپە-جەكتەر وتە شيەلەنىستى ءوتتى. 60 پەن 63,5 كيلونىڭ ەڭ مىقتىلارى جينالعان باسەكەدە 2021 جىلى 63 كيلودا ەل چەمپيونى اتانعان ەرتۋعان زەينۋللينوۆتىڭ باعى جاندى. فينالدا ول تايلاند بوكسشىسى حۋناتيپ پيدنۋحتەن باسىم ءتۇستى. بۇل سالماقتا ءۇشىنشى ورىندى مۇحاممەدسابىر بازارباي ۇلى مەن سۇلتان مۋسينوۆ يەلەندى. جارىس سوڭىندا باس باپكەر بۇل سالماقتا ءالى دە ىرىكتەۋ جۇرەتىنىن, ازيا ويىندارىنا ناقتى كىم باراتىنى تامىز ايىندا بەلگىلى بولاتىنىن ايتتى.
ال 92 كيلو سالماقتا جاستار اراسىنداعى وليمپيا ويىندارىنىڭ جەڭىمپازى, جاستار اراسىنداعى الەم چەمپيوناتىنىڭ كۇمىس جۇلدەگەرى, ەرەسەكتەر اراسىنداعى ازيا جانە ەل چەمپيونى ايبەك ورالباي كوپشىلىك كۇتكەندەي جۇدىرىقتاسا الماي, جارىستى قولا جۇلدەمەن تۇيىندەدى. ال «ەلوردا كۋبوگىندە» بۇعان دەيىن 86 كيلودا باق سىناعان ساعىندىق توعامباي توپ جاردى. «بۇل سالماقتىڭ ۇزدىگى سانالعان ايبەك العاشقى جەكپە-جەگىن تاجىكستان بوكسشىسىمەن وتكىزىپ, ءوز دەڭگەيىندە ونەر كورسەتە المادى. جارتىلاي فينالدا سالماعى اسىپ كەتىپ, جارىس جولىنان شىعىپ قالدى. بۇل – ەرەجەنى بۇزۋ, ءتارتىپ ساقتاماعاندىقتى بىلدىرەدى. بوكسشىلارىمىز ەلىمىزدەگى جارىستاردا ۇقىپتىلىق تانىتپاسا, ۇلكەن جارىستاردا جاعدايدىڭ قالاي بولارىن باعامداي بەرىڭىز. سوندىقتان الداعى ۋاقىتتا بۇل ماسەلەنى كەڭىنەن تالقىلاپ, بوكسشىعا شارا قولدانامىز», دەيدى م.ايتجانوۆ.
وزگە سالماقتاعى ناتيجەلەرگە توقتالار بولساق, 48 كيلودا ەل چەمپيوناتىنىڭ التى دۇركىن جەڭىمپازى تەمىرتاس ءجۇسىپوۆ باعى جانسا, 51 كيلودا سəكەن بيبوسىنوۆقا تەڭ كەلەر ەشكىم تابىلمادى. سونىمەن قاتار «ەلوردا كۋبوگىندە» تيمۋر قابدەشەۆ (54 كگ), ديلشود ابدۋمۋرودوۆ (وزبەكستان, 60 كگ), شامشەر سايدوۆ (تاجىكستان, 67 كگ), حاۆاسبەك اسادۋللاەۆ (وزبەكستان, 71 كگ), نۇرقانات رايىس (75 كگ), توقتاربەك تاڭاتحان (قىتاي, 80 كگ), ابزال قۇتتىبەكوۆ (86 كگ), ساعىندىق توعامباي (92 كگ) جانە دجاحونگير زوكيروۆ (+92 كگ) ۇزدىك شىقتى.
جارىس قورىتىندىسى بويىنشا, ەرلەر اراسىندا تۋرنيردە ماحمۇد سابىرحان (57 كگ) ۇزدىك بوكسشىسى اتانسا, قىزدار اراسىندا بۇل اتاق قىتايلىق يانگ چەنگۋگە (63 كگ) بۇيىردى.