استانادا بىلتىردان باستاپ ءداستۇرلى تۋرنيرگە اينالعان بوكستان ەرلەر مەن ايەلدەر اراسىنداعى ءىى حالىقارالىق «ەلوردا كۋبوگى» جارىسى باستالدى. ەلوردانىڭ 25 جىلدىعىنا وراي ۇيىمداستىرىلعان بوكس باسەكەسى استاناداعى «Beeline Arena» سپورت كەشەنىندە ءوتىپ جاتىر. بيىلعى دودادا الەمنىڭ 10 ەلىنەن كەلگەن 200-دەن اسا بىلعارى قولعاپ شەبەرى باس جۇلدەگە تالاستى باستاپ كەتتى. ولاردىڭ ىشىندە وزبەكستان, قىتاي, ءۇندىستان, موڭعوليا جانە باسقا مەملەكەتتەردىڭ وكىلدەرى بار. ال قازاقستان قۇراماسى ساپىندا وليمپيا ويىندارىنىڭ جەڭىمپازدارى, الەم, ازيا جانە باسقا دا حالىقارالىق جارىستاردىڭ چەمپيوندارى مەن جۇلدەگەرلەرى دە قاتىسىپ جاتىر.
ءتۋرنيردىڭ اشىلۋ سالتاناتىنا استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, Sport Qory سپورتتى قولداۋ قورىنىڭ باس ديرەكتورى اسحات سەيسەمبەك, سپورتشىلار وداعى تورالقاسىنىڭ توراعاسى سەرىك ساپيەۆ, ازيا بوكس كونفەدەراتسياسىنىڭ ۆيتسە-پرەزيدەنتى ءازيز قوجامبەتوۆ جانە باسقا دا سپورت وكىلدەرى قاتىسىپ, بوكسشىلارعا ساتتىلىك تىلەدى.
«قۇرمەتتى بوكسشىلار, جاتتىقتىرۋشىلار جانە تۋرنير قوناقتارى. قازاقستان بوكس فەدەراتسياسىنىڭ اتىنان مادەنيەت جانە سپورت مينيسترلىگى, ەلوردا اكىمدىگى, Sport Qory جانە ت.ب. اتىنان بارلىق سەرىكتەسىمىزگە العىس ايتقىم كەلەدى. جاقىندا تاشكەنتتە وتكەن الەم چەمپيوناتىندا ءبىزدىڭ جىگىتتەر 4 التىن جانە 1 كۇمىس مەدال جەڭىپ الىپ, بۇكىل قازاقستاندى كەرەمەت ناتيجەمەن قۋانتقانىن ءبارىڭىز جاقسى بىلەسىزدەر. استانا رينگىندە ءبىزدى قىزىقتى ءارى تارتىستى جەكپە-جەكتەر كۇتىپ تۇر دەپ ويلايمىن. سپورتشىلارعا ساتتىلىك پەن ادەمى جەڭىستەر تىلەيمىن», دەدى ءازيز قوجامبەتوۆ.
جارىستىڭ العاشقى ەكى كۇندەگى جەكپە-جەكتەرىنە توقتالار بولساق, ءبىرىنشى كۇنگى باسەكەلەر توسىن ناتيجەلەرگە تولى بولدى. جانكۇيەرلەر ء«ا» دەگەننەن بىردەن 71 كيلوداعى ەكى قازاق-وزبەك بوكسشىلارىنىڭ تارتىستى كەزدەسۋلەرىن تاماشالادى. ءبىرىنشى جەكپە-جەكتە نۇردان امانگەلدى نۋريسلوم يسمويلوۆتان تورەشىلەردىڭ ءبىراۋىز شەشىمىمەن باسىم تۇسسە, ەكىنشى ايقاستا 2021 جىلعى جاستار اراسىنداعى الەم چەمپيونى سابىرجان اققالىقوۆ حاۆاسبەك اسادۋللاەۆتان تورەشىلەردىڭ ارالاس شەشىمىمەن جەڭىلىپ قالدى. سونىمەن قاتار ءدال وسى سالماقتا ونەر كورسەتكەن ەرماحان جاقپەكوۆ پەن تالعات شايكەن جانە 80 كيلوداعى ەراسىل جاقپەكوۆ تاجىكستاندىق بوكسشىلاردان باسىم ءتۇستى.
ال 63,5 كيلوعا دەيىنگى سالماقتاعى بوكسشىلاردىڭ جەكپە-جەكتەرىن «Beeline Arena» سپورت كەشەنىنە جينالعان كورەرمەندەر دە, باپكەرلەر مەن بوكس ماماندارى دا اسا ىجداعاتپەن تاماشالادى. سەبەبى وسى تۋرنيردە جەڭىمپاز اتانعان بوكسشى الداعى ازيا ويىندارىندا 63,5 كيلودا ەل نامىسىن قورعايدى. سوندىقتان ەلىمىزدەگى ەڭ مىقتى بوكسشىلاردىڭ ءبارى وسى سالماقتا توپتاسىپ, ءوزارا كىم مىقتىنى انىقتاپ جاتىر. ماسەلەن, جۋىردا عانا تاشكەنتتەگى الەم چەمپيوناتىندا 60 كيلودا ونەر كورسەتكەن تالعات سىرىمبەتوۆ «ەلوردا كۋبوگىنىڭ» العاشقى اينالىمىندا تاعى ءبىر مىقتى بوكسشى مۇحامەدسابىر بازارباي ۇلىمەن جۇدىرىقتاستى. بۇل جەكپە-جەك سىرىمبەتوۆتىڭ جاراقاتىنا بايلانىستى مەرزىمىنەن بۇرىن اياقتالىپ, جەڭىس مۇحامەدسابىردىڭ ەنشىسىندە كەتتى. ەكىنشى جۇپتا 2021 جىلى 60 كيلودا ەل چەمپيونى اتانعان ۆاسيلي سامچۋك تاجىريبەلى ءدىلمۇرات ميجيتوۆپەن ايقاسىپ, تورەشىلەردىڭ شەشىمىمەن جەڭىسكە جەتتى. سونىمەن قاتار ءدال وسى سالماقتاعى 2020 جىلعى قازاقستان چەمپيونى ەرتۋعان زەينۋللينوۆ ءبىرىنشى راۋندتا قارسىلاسى ەراسىل تانقايدى نوكاۋتقا ءتۇسىرىپ, ماسەلەنى ەرتە شەشىپ تاستادى. سوڭعى جۇپتا داڭقتى رۋسلان ءمۋسينوۆتىڭ ۇلى سۇلتان مۋسينوۆ ۇندىستاندىق انكيت نارۆالمەن كەزدەسىپ, قارسىلاسىنان ايلاسىن اسىردى.
حالىقارالىق ءتۋرنيردىڭ ەكىنشى كۇنىندە بوكسشىلار جەتى سالماقتا جۇدىرىقتاسىپ, بوكس جانكۇيەرلەرىنە تارتىستى جەكپە-جەكتەر ۇسىندى. بۇل جارىستا 63,5 كيلومەن قاتار, 57 كيلو سالماقتا دا ازيا ويىندارىنا ىرىكتەۋ ءجۇرىپ جاتىر. تاشكەنتتەگى الەم چەمپيوناتىندا 54 كيلودا توپ جارعان ماحمۇد سابىرحان وليمپيا ويىندارىنىڭ باعدارلاماسىنا ەنگەن 57 كيلو سالماققا كوتەرىلىپ, جارىس كورىگىن قىزدىردى. العاشقى اينالىمدا ول ەل چەمپيوناتىنىڭ جانە حالىقارالىق جارىستاردىڭ جۇلدەگەرى ورازبەك اسىلقۇلوۆپەن كەزدەسىپ, 4:1 ەسەبىمەن جەڭىسكە جەتسە, 57 كيلونىڭ كوشباسشىسى سەرىك تەمىرجانوۆ نۇرسۇلتان التىنبەكتى ايقىن باسىمدىقپەن ۇتتى. ال 2021 جىلعى جاستار اراسىنداعى الەم چەمپيوناتىنىڭ كۇمىس جۇلدەگەرى ەربولات سابىر تاعى ءبىر جەرلەسىمىز اسىلجان سەرىكبايدان باسىم ءتۇسىپ, كەلەسى اينالىمعا جولداما الدى.
وزگە سالماقتاعى بوكسشىلاردىڭ ناتيجەسىنە توقتالار بولساق, 51 كيلو سالماقتا كەنجە مۇرات ۇلى, دامير ابدىقادىر, 54 كيلودا تيمۋر قابدەش, 67 كيلودا تەمىرحان تەزەك, ەلنۇر ءسۇيىنباي, راحات سەيىتجان, 80 كيلودا يليا كيسەلەۆ, 86 كيلودا ابزال قۇتتىبەكوۆ, بەكزات تاڭاتار, شايمۇرات قۇسايىنوۆ جانە 92 كيلودان جوعارى سالماقتا دامير تويباي العاشقى ايقاستارىندا جەڭىسكە جەتىپ, ەكىنشى كەزەڭگە جولداما الدى.
«ەلوردا كۋبوگىندە» ەرلەر 13 سالماق دارەجەسىندە (46-48 كگ, 51 كگ, 54 كگ, 57 كگ, 60 كگ, 63,5 كگ, 67 كگ, 71 كگ, 75 كگ, 80 كگ, 86 كگ, 92 كگ, +92 كگ), ال ايەلدەر 12 سالماق دارەجەسىندە (45-48 كگ, 50 كگ, 52 كگ, 54 كگ, 57 كگ, 60 كگ, 63 كگ, 66 كگ, 70 كگ, 75 كگ, 81 كگ, +81 كگ) جۇدىرىقتاسىپ جاتىر.
جارىس جەڭىمپازدارى مەن جۇلدەگەرلەرى ءتيىستى دارەجەدەگى مەدال, ديپلوم جانە اقشالاي جۇلدەمەن ماراپاتتالادى. اتاپ ايتقاندا, باس جۇلدە يەلەنگەن بوكسشىعا – 700, كۇمىس جۇلدەگەرگە – 400 جانە قولا مەدال يەگەرىنە 200 (ارقايسىسىنا) اقش دوللارى بەرىلەدى.