ۇشۋ گەوگرافياسىن كەڭەيتۋ جانە حالىقارالىق رەيستەر سانىن ۇلعايتۋ جونىندەگى جۇمىس شەڭبەرىندە قر يدم ازاماتتىق اۆياتسيا كوميتەتى قازاقستان مەن باشقۇرتستان اراسىنداعى اۋە قاتىناسىن كەڭەيتۋ ماسەلەسىن پىسىقتادى, دەپ حابارلايدى Egemen.kz.
«Red Wings» اۋە كومپانياسى 2023 جىلعى 25 شىلدەدەن باستاپ استانا – ۋفا باعىتى بويىنشا تۇراقتى جولاۋشىلار رەيستەرىن قايتا باستايدى. تاسىمالداۋ «Sukhoi Superjet-95» ءتيپتى اۋە كەمەلەرىندە سەيسەنبى جانە جۇما كۇندەرى اپتاسىنا 2 رەيس جيىلىگىمەن ورىندالادى.
«اۋە قاتىناسىن جاڭعىرتۋ ەلدەر اراسىنداعى ساۋدا-ەكونوميكالىق, ىسكەرلىك, تۋريستىك جانە مادەني ىنتىماقتاستىقتى ودان ءارى دامىتۋعا ىقپال ەتەدى», دەلىنگەن ازاماتتىق اۆياتسيا كوميتەتىنىڭ حابارلاماسىندا.