بۋبليكتىڭ العاشقى بەلەسى

گەرمانيانىڭ گاللە قالاسىندا ۇيىم­داس­تىرىلعان «Terra Wortmann Open» جارى­سى­نىڭ فينالىندا الەكساندر بۋبليك ATP سانا­تىنداعى 17 جارىستىڭ جەڭىمپازى, توكيو وليم­پياداسىنىڭ چەمپيونى, الەمنىڭ 7-راكەتكاسى 25 جاستاعى رەسەيلىك اندرەي رۋبلەۆپەن باس جۇلدەنى ساراپقا سالدى. وسىعان دەيىن الەك­ساندر جەتى رەت ATP جارىستارىنىڭ في­نا­­لىنا شىقسا دا, سونىڭ تەك بىرەۋىندە عانا جە­ڭىسكە جەتكەن بولاتىن. وتانداسىمىز بىل­تىر­­ مونپەلەدەگى ATP 250 تۋرنيرىندە دارا شىق­­تى. ەندى, مىنە, بيىل العاش رەت ATP 500 دەڭ­گەيىندە فينالعا شىعىپ, ءبىرىنشى ۇمتى­لى­سىن­دا-اق چەمپيوندىق اتاققا قول جەتكىزدى.

اندرەي رۋبلەۆتىڭ ەسىمى بارشا تەننيس جانكۇيەرلەرىمەن قاتار, الەكساندر بۋبليكتىڭ وزىنە دە جاقسى تانىس. بوزبالا شاعىنان باستاپ ەكەۋى تەننيس سپورتىنىڭ الىپپەسىن بىرگە ۇيرەنىپ, تالاي مارتە كورتتا شەبەرلىك بايقاسقان. ءبىر-ءبىرىنىڭ قىر-سىرىن وتە جاقسى بىلەدى. ەرەسەكتەر جارىسىندا دا ولار بۇگىنگە دەيىن ءتورت مارتە كەزدەسىپ, سونىڭ ۇشەۋىندە رۋبلەۆتىڭ, بىرەۋىندە بۋبليكتىڭ باعى جانعان. كەشەگى ماتچتان كەيىن ەكى تەننيسشى اراسىنداعى جەكە ەسەپ 3:2-گە دەيىن قىسقاردى.

گاللەدەگى ورتالىق كورتتا وتكەن فينالدىق ماتچتى الەكساندر ء«ا» دەگەننەن برەيكپەن باس­تاپ, سول باسىمدىعىن ءبىرىنشى پارتيانىڭ سوڭىنا دەيىن ساقتاپ قالدى – 6:3. ەكىنشى پارتيادا ەسەپ 3:2 بولعان مەزەتتە رەسەيلىك سپورتشى برەيك جاساپ, 4:2 ەسەبىمەن العا ۇزاپ كەتتى. كەيىنگى گەيمدەردە بۋبليك ەسە قايتارۋعا تىرىسقانىمەن, رۋبلەۆ توعىزىنشى گەيمدە ەكىنشى پارتيانى ءوز پايداسىنا اياقتادى – 6:3. ەكى سەتتەن كەيىن تارازى باسى تەڭەسكەن سوڭ, بار ماسەلە ءۇشىنشى پارتيادا شەشىلدى. بۋبليك سوڭعى سەتتى دە برەيكپەن باستادى. ەكىنشى گەيمدە وتانداسىمىز ءۇش برەيكپوينتتىڭ ءۇشىنشىسىن ءتيىمدى پايدالانىپ, 2:0 ەسەبىمەن ويىنداعى باسىمدىقتى وزىنە اۋداردى. ال دوپتى ماتچقا قوسقان توعىزىنشى گەيمدە بۋبليك ءۇش مارتە قوس قاتەلىك جاساپ, قارسىلاسىنا برەيكپوينت جاساۋعا مۇمكىندىك بەرىپ قويعانىمەن, سوڭعى ساتتە ويىن تىزگىنىن ءوز قولىنا الىپ, 6:3 ەسەبىمەن قارسىلاسىن قاپى قالدىردى. 1 ساعات 36 مينۋتقا جالعاسقان ماتچتا بۋبليك 21 ەيس جاساپ, 6 برەيك-پوينتتىڭ ەكەۋىن پايدالاندى. وسىلايشا, 26 جاستاعى الەكساندر بۋبليك ءوزىنىڭ سپورتتىق جولىندا العاش رەت ATP 500 دوداسىنىڭ چەمپيونى اتاندى.

جەرلەسىمىزدىڭ تاماشا جەڭىسىنەن كەيىن قازاقستان تەننيس فەدەراتسياسىنىڭ پرە­زي­­دەنتى بولات وتەمۇراتوۆ الەكساندر بۋب­ليك­تى جەتىستىگىمەن قۇتتىقتاپ, ونىڭ تابىسى­نا­ قاتىستى پىكىر ءبىلدىردى. «الەكساندر بۋب­ليكتى تەننيس مانسابىنداعى كەزەكتى قادا­مى­مەن – اتر-500-دەگى ءبىرىنشى تيتۋلىمەن قۇت­تىقتايمىن. ساشا ءوزى ءۇشىن جانە ەلىمىزدە تەن­نيستىڭ دامۋى ءۇشىن ۇلكەن جەڭىسكە قول جەت­كىزىپ, جاس ۇرپاققا ۇلگى كورسەتتى. فينالعا با­رار جولدا مىقتى قارسىلاستاردى ۇتتى. ال في­نال­دا بار كۇشىن سالىپ, الەمنىڭ 7-راكەتكاسى اندرەي رۋبلەۆتى جەڭدى. ەرلەر قۇراماسىنىڭ كوش­باسشىسىنا جاڭا تابىستار تىلەيمىن!», دەدى ب.وتەمۇراتوۆ.

ا.بۋبليك گاللەدەگى تۋرنيردە بىرقاتار مىق­تى تەننيسشىنى جارىس جولىنان ىعىس­تى­ردى. اتاپ ايتار بولساق, ءبىرىنشى كەزەڭدە ول ATP ساناتىنداعى ءۇش ءتۋرنيردىڭ جەڭىمپازى جانە حورۆاتيا قۇراماسىمەن بىرگە دەۆيس كۋ­بو­گىن­دە توپ جارعان الەمدىك رەيتينگتە 14-ورىندا تۇر­عان حورۆاتيالىق بورنا ءچوريچتى ەكى سەتتە 6:3, 6:1 ەسەبىمەن جەڭسە, ەكىنشى اينالىمدا گەر­مانيالىق يان-لەننارد شترۋففتەن باسىم ءتۇستى – 6:3, 6:7, 6:3. ال شيرەك فينالدا الەمنىڭ 8-راكەتكاسى يتاليالىق ياننيك سين­نەردى (7:5, 2:0), جارتىلاي فينالدا توكيو وليم­پياداسىنىڭ چەمپيو­نى, اقش اشىق چەمپيوناتىنىڭ ءفيناليسى گەرمانيالىق الەكساندر زۆەرەۆتى (6:3, 7:5) قاپى قالدىرىپ, فينالعا جولداما الدى.

ەلىمىزدىڭ ءبىرىنشى راكەتكاسى بۇل جەڭىسىنەن كەيىن كاسىبي تەننيسشىلەر قاۋىمداستىعىنىڭ (ATP) دۇيسەنبى كۇنى جاڭارتقان رەيتينگىندە 22 ساتىعا جوعارىلاپ, 48-دەن 26-ورىنعا ءبىر-اق كوتەرىلدى. بۇل – بۋبليكتىڭ الەمدىك رەيتينگتەگى جەكە رەكوردى.