ءۇيلى بولۋ – ەل ىشىندەگى ەڭ وزەكتى تاقىرىپ. مۇنى مەملەكەت باسشىسى دا ەسكەرىپ, حالىقتى قولجەتىمدى باسپانامەن قامتۋعا قارەكەت ەتۋگە شاقىرعان. بۇل رەتتە بيىل جەتىسۋدا پاتەر جاۋعان جىل بولدى. جۋىردا ونداعان جىل كەزەكتە تۇرعان 36 وتباسى قونىستويىن تويلادى.
تالدىقورعان قالاسىنداعى 8-شاعىن اۋداندا بەرىلگەن 36 پاتەردىڭ قۋانىشىنا ورتاقتاسقان وبلىس اكىمى بەيبىت يساباەۆ تۇرعىنداردى قۇتتىقتاپ, جاڭا پاتەردىڭ كىلتىن ءوز قولىمەن تابىس ەتتى.
«ساپىرىلىسقان تسيفرلارمەن, پايىزدارمەن مىنانداي نارسەنى تىندىردىق, انانداي جەتىستىككە جەتتىك دەگەن ەمەس, ەڭ نەگىزگىسى – حالىقتىڭ كوزىمەن كورىپ, قولىمەن ۇستايتىن جەتىستىككە يە بولۋىمىزدا. جىل باسىندا ءبىز 2000 وتباسىنا ءۇي بەرەمىز دەپ ايشىقتاپ ايتتىق. سول ۋادەمىزدە تۇرامىز. بۇگىن سول ايتىلعان ءسوزدىڭ جارقىن كورىنىسىنە كۋا بولىپ وتىرسىزدار. 36 وتباسىنا ارنالعان ءۇيدى بەرىپ جاتىرمىز. كەزەكتە بەس جىل بولعانداردىڭ باسپاناعا ەندى قول جەتكىزىپ وتىرعانى ۇيات ەكەنىن دە تىلگە تيەك ەتتىك. مەملەكەت باسشىسىنىڭ جارلىعىمەن ءوز الدىنا جەكە وبلىس بولعان جەتىسۋ ايماعىنىڭ 1 جىلدىعىنا وراي 8-شاعىن اۋدانىنا قاراستى 72 پاتەرلى كوپقاباتتى ۇيدەن 1, 2-توپتاعى مۇگەدەكتىگى بار جاندارعا, اتا-انا قامقورلىعىنسىز قالعان, الەۋمەتتىك وسال توپقا جاتاتىن, پاتەر كەزەگى جەتكەن 36 تۇرعىندى باسپانامەن قامتۋ – ەڭ ماڭىزدى ماسەلە. ءۇي بەرۋ بويىنشا ءبىز 8 ەسە جوعارى كورسەتكىشكە قول جەتكىزىپ وتىرمىز», دەدى ب.يساباەۆ.
ونىڭ ايتۋىنشا, وسى قارقىنمەن جەتىسۋلىقتاردى باسپانامەن قامتاماسىز ەتسەك, شامامەن 3-4 جىلدا كەزەكتە تۇرعانداردىڭ سانى 2 ەسە ازايادى.
وبلىس باسشىسى بارماق باستى, كوز قىستى دۇنيە بولمايتىنىن, ءاربىر ادام كەزەگىمەن پاتەرگە يە بولاتىنىن جەتكىزدى. كەزەكتە تۇرعان 18-19 وتباسىنا پاتەر بەرىلگەن ەدى. بۇگىنگى سالتاناتتى شارادا تۇرعىنداردى قونىستوي قۋانىشىمەن قۇتتىقتاعان وبلىس اكىمى قالعان 36 پاتەردىڭ كىلتىن تابىس ەتتى. ولاردىڭ دەنى 1, 2-توپتاعى مۇگەدەكتەر, اتا-انا قامقورلىعىنسىز قالعاندار مەن پاتەر كەزەگىندە تۇرعاندار. ايتا كەتەرلىگى, پاتەر يەلەرىن قۋانىشىمەن قۇتتىقتاعان ايماق باسشىسى 1700 ادام كەزەكتەن شىعىپ قالعانىن, سول بويىنشا جۇمىس جۇرگىزىلىپ جاتقانىن دا تىلگە تيەك ەتتى.
سونىمەن قاتار جالپى جىل سوڭىنا دەيىن وبلىستا 322 مىڭ شارشى مەتر تۇرعىن ءۇي پايدالانۋعا بەرىلەدى. سونىڭ 50 پايىزى بيۋدجەت ەسەبىنەن سالىنباق. بۇل – وتكەن جىلداعى كورسەتكىشتەن 8 ەسە ارتىق. ءبىر تالدىقورعاننىڭ وزىندە بيىل 51 كوپپاتەرلى تۇرعىن ءۇي قولدانىسقا بەرىلمەك. ال شىلدە ايىندا 3 كوپپاتەرلى ءۇي, تامىزدا 4 ءۇي جەتىسۋلىقتارعا ەسىگىن ايقارا اشپاق. وسىنداي جايدارمان جاڭالىققا كۋا بولىپ, باسپانا باقىتىنا كەنەلگەندەر قاتارىندا بىرقاتار ازامات ءسوز الىپ, لەبىزىن ءبىلدىردى. سولاردىڭ ىشىندە اتا-انا قامقورلىعىنسىز قالعان رادمير چەرنوۆ:
«بۇگىن مەنىڭ ومىرىمدەگى ەڭ مەرەيلى كۇن. باسپانالى بولدىم. ەندى جارقىن ماقساتقا, اسقاق ارمانعا ەركىن قادام باسامىن. ەلىمنىڭ, جەتىسۋىمنىڭ كوركەيۋى جولىندا ماڭداي تەرىمدى توگەتىن بولامىن. وسىنداي قۋانىش سىيلاعان وبلىس باسشىلىعىنا ايتار العىسىم شەكسىز», دەپ مەرەيى اسقان جىگىت مەملەكەتتىك تىلدە تەبىرەنگەن ەدى.
جەتىسۋ وبلىسى