قازاقستاندىق مۋزىكانت يمانبەك زەيكەنوۆ (Imanbek) AtomSound مۋزىكالىق كينوجوباسىنىڭ اياسىندا ءوزىنىڭ جاڭا ترەگىنە اتوم دىبىسىن جازۋ ءۇشىن رەسەيدىڭ لەنينگراد قالاسىنداعى اتوم ەلەكتر ستانتسياسىنا باردى, دەپ حابارلايدى Egemen.kz Gazeta.Ru سايتىنا سىلتەمە جاساپ.
«مۋزىكالىق پروديۋسەر رەتىندە مەن ءۇشىن ءوز جۇمىسىمنىڭ عىلىمي, تەوريالىق بولىگىن ءتۇسىنۋ ماڭىزدى. كوپتەگەن مۋزىكانتتار شابىتپەن جاسايدى, بىراق شابىتتىڭ ارتىندا عىلىم - گارمونيكا, اكۋستيكا دا بار. شابىت تا عىلىمنىڭ ءبىر ءتۇرى دەپ ايتۋعا بولادى», دەدى يمانبەك.
اۆتورلار مۋزىكانىڭ ەنەرگيا تاسىمالداۋشىسى ەكەنىن دالەلدەيتىن دەرەكتى فيلم تۇسىرەدى. اتوم دىبىسىن جازۋ يدەياسى قاراپايىم تەزيستەن تۋىنداعان: دىبىس تولقىندارى - اتومداردىڭ رەتتەلگەن تەربەلىسى. كورەرمەن ديدجەيمەن بىرگە جاعىمدى دىبىستى تابۋ جولىندا ءجۇرىپ, مۋزىكانت جۇمىسىنىڭ تۇپكىلىكتى ناتيجەسىن وي ەلەگىنەن وتكىزە الادى.
«كەز كەلگەن جەتكىلىكتى دامىعان تەحنولوگيا سيقىردان اجىراتىلمايدى. ءبىز بۇل سيقىردى فيلمدە زەرتتەۋگە تىرىسامىز. دىبىستىڭ نەگىزى اتوم بولاتىن دىبىستاردان ترەك جاساسا قالاي بولاتىنىن ەلەستەتىپ كورىڭىز», دەيدى گرەممي يەگەرى.