ەسىلدىڭ بويىندا ەڭسە كوتەرگەن ەلوردا از عانا ۋاقىت ارالىعىندا ەلدىگىمىزدىڭ ەڭسەلى ورداسىنا اينالدى. ارقانىڭ اجارىن اشىپ, كەلبەتىن نۇرلاندىرعان كورىكتى كوشەلەر, ساۋلەلى ساۋلەتتەر مەن ءزاۋلىم عيماراتتاردىڭ قۇرىلىسىنا كوز ىلەسپەيدى. باس شاھاردىڭ بۇگىنگىسى ەرتەڭىنە ۇقسامايدى.
ارىگە بارماي-اق ۇيىڭىزدەن بەس-التى ادىم باسساڭىز بولعانى, قىزۋ-قىزۋ قايناپ جاتقان قۇرىلىس, ماڭداي تەر, تازا ەڭبەكتى كورەسىز. وسىناۋ جانكەشتى ەڭبەكقورلىقتىڭ ارقاسىندا نەبارى 25 جىلدا ەلوردامىز ءوزىمىز تۇگىلى شەتەلدىكتەر قىزىعا قارايتىن شاھار بۇگىن. الەمدىك رۋحانيات پەن مادەنيەتتىڭ ورتالىعىنا اينالعان قالادا مۇمكىندىك كوپ. قالاعا قونىس اۋدارۋشىلار سانى جىل سايىن ارتىپ كەلەدى. باستاپقى ساتتە قالا تۇرعىندارى 200 مىڭداي عانا بولسا, بۇگىندە 1 ملن 371 مىڭ ادام وسى قالانىڭ تۇرعىنى. قالا حالقى وسكەن سايىن ءتۇرلى قاجەتتىلىك كولەمى ۇلعاياتىنى انىق. جاقىندا اكىم جەڭىس قاسىمبەك قالاداعى وزەكتى بوپ تۇرعان سۋ تاپشىلىعى ماسەلەسىن وسى قالا حالقىنىڭ ارتۋىمەن تۇسىندىرگەن ەدى.
«قازىرگى ۋاقىتتا قالادا تاۋلىگىنە 25 مىڭ كۋبومەتر سۋ جەتىسپەيدى. حالىق سانى كۇن ساناپ ءوسىپ جاتىر. جىلىنا كەم دەگەندە 60-70 مىڭ جاڭا تۇرعىن قوسىلادى, ال سوڭعى 3 جىلدىڭ ىشىندە قالامىزدا تۇراتىن ازاماتتاردىڭ سانى 200 مىڭ ادامعا ارتتى», دەپ ايتقان ەدى جاقىندا ج.قاسىمبەك Instagram پاراقشاسىندا.
اكىمدىك سۋ ماسەلەسىن رەتتەۋ ءۇشىن وسىدان 2 جىل بۇرىن ەكى جاڭا نىساننىڭ قۇرىلىسىن باستادى. ءبىرىنشى نىسان – سورعى ستانتسياسى. بۇل نىساننىڭ قۇرىلىسى ماۋسىم ايىنىڭ سوڭىنا دەيىن تولىعىمەن بىتەدى. ناتيجەسىندە قالاعا قاجەتتى كۇنىنە 25 مىڭ كۋبومەتر سۋ بەرىلەدى. ەكىنشى نىسان – استانا سۋ قويماسىنان قالاعا كەلەتىن سۋ قۇبىرى. بۇل نىسانداعى جۇمىستار دا اياقتالۋعا جاقىن. ال تامىز ايىندا ستانتسيانىڭ ەكىنشى كەزەڭىنىڭ قۇرىلىسى اياقتالىپ قالۋ كەرەك. بۇدان سوڭ, قالاعا كۇنىنە قوسىمشا 85 مىڭ كۋبومەتر سۋ بەرىلە باستايدى. بۇل الداعى 3-4 جىلعا جەتكىلىكتى بولادى.
سونداي-اق استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى سۋ بەرۋ قۇبىرىن سالۋدان بولەك رەكونسترۋكتسيالاۋ جانە قۇبىرلاردى تازالاۋ جۇمىستارى جۇرگىزىلىپ جاتقانىن ايتتى.
«كوپپاتەرلى تۇرعىن ءۇي كەشەندەرىندە سۋدىڭ بولماۋى كوبىنەسە ىشكى سۋمەن جابدىقتاۋ جۇيەلەرىنىڭ, ياعني, بىتەلگەن سۇزگىلەر, رەتتەلمەگەن سورعى جابدىقتارى, جابىق ىسىرمالار جۇمىسىنىڭ بۇزىلۋىمەن دە بايلانىستى بولۋى مۇمكىن», دەپ جاۋاپ بەردى ۆەدومستۆوداعىلار رەسمي ساۋالىمىزعا.
«قىستىڭ قامىن جاز ويلا» دەگەن ءتامسىلدى ەسكەرگەن اكىمدىك جىلۋ بەرۋ ماسەلەسىن دە پىسىقتاپ قويعان. بۇگىنگى تاڭدا قولدانىستاعى ستانتسيالارداعى جىلۋ قۋاتىنىڭ تاپشىلىعى 432 گكال قۇرايدى. وسى تاپشىلىقتى بولدىرماۋ ماقساتىندا اكىمدىك قۋاتتىلىعى 440 گكال بولاتىن جەو-3-ءتىڭ 1-كەزەگىنىڭ جانە ەكى گاز جىلۋ ستانتسياسىنىڭ («وڭتۇستىك-شىعىس» جانە «تۇران» گتق, جالپى قۋاتتىلىعى 690 گكال) قۇرىلىسىن جالعاستىرىپ جاتىر. اتالعان نىساندار جىلىتۋ ماۋسىمى باستالار ۋاقىتتا ىسكە قوسىلادى. بۇل قالاداعى جىلۋمەن جابدىقتاۋ تاپشىلىعى ماسەلەسىن بولدىرماۋعا مۇمكىندىك بەرەدى. جوسپار بويىنشا 12 مىڭ جەكە مەنشىك ۇيگە گاز تارتىلادى. ونىڭ ىشىندە 8 مىڭى گازعا قوسىلعان. جالپى الداعى 3-4 جىل ىشىندە 15-20 مىڭ ءۇي گازعا قوسىلادى.
2023 جىلدىڭ قاڭتار-مامىر ايلارىنىڭ قورىتىندىسى بويىنشا, ەلوردانىڭ نەگىزگى الەۋمەتتىك-ەكونوميكالىق كورسەتكىشتەرى وڭ ءوسىمدى كورسەتىپ وتىر. مىسالى, جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانى 220,1 مىڭ بىرلىكتى قۇرادى, بۇل وتكەن جىلعى كەزەڭمەن سالىستىرعاندا 25,2%-عا كوپ. جالپى ايماقتىق ءونىم كولەمى 5,5%-عا ۇلعايعان. بۇل – 10 444,1 ملرد تەڭگە. 2022 جىلدىڭ قورىتىندىسى بويىنشا نەگىزگى كاپيتالعا سالىنعان ينۆەستيتسيالار كولەمى 1 446,8 ملرد تەڭگە بولدى, ءوسىم - 12,7%. ال 2023 جىلدىڭ قاڭتار-مامىر ايلارىندا نەگىزگى كاپيتالعا سالىنعان ينۆەستيتسيالار كولەمى 427,6 ملرد تەڭگەنى قۇرادى, ءوسىم 20,9% بولدى.
استانا قالاسى – قۇرىلىس سەكتورىندا قازاقستان بويىنشا الدىڭعىلار قاتارىندا. 2023 جىلعى قاڭتار-مامىردا قۇرىلىس جۇمىستارىنىڭ كولەمى 152 ملرد تەڭگەنى قۇرادى. بۇل وتكەن جىلدىڭ كەزەڭىمەن سالىستىرعاندا 2,2% -عا ارتىق.
تۇيىندەي كەلگەندە بۇنىڭ بارلىعى تۇرعىنداردىڭ الاڭسىز ءومىر ءسۇرۋى ءۇشىن جاسالىپ جاتقان جۇمىستار. توعىز جولدىڭ تورابىنداعى قۇتتى قالانىڭ الەۋمەتتىك ءھام ەكونوميكالىق دامۋ داڭعىلى ءالى الدا. جۇيەلى جۇرگىزىلگەن جۇمىستاردىڭ ناتيجەسىن كورەتىن ۋاقىت تا الىس ەمەس. تاۋەلسىزدىگىمىز بەن تۇتاستىعىمىزدىڭ تۇعىرى, ۇلت بولىپ ۇيىسۋىمىزدىڭ ۇستىنى بولعان استانامىزدىڭ «ايحاي 25-ءى» قۇتتى بولسىن!