اباي وبلىسىنىڭ اۋماعىن, ناقتى ايتقاندا, بورودۋليحا اۋدانىنىڭ اۋىلدارى مەن سەمەي قالاسىنا قاراستى اۋىلداردىڭ جالپى جاعدايى تاپ قازىر كۇردەلى كۇيدە. سەمەي قالاسىنىڭ اكىمى نۇربول نۇرساعاتوۆ ءورتتىڭ نەگىزگى وشاقتارىنىڭ ءبىرى سانالاتىن تاليتسا اۋىلىندا جۇرگەنىمەن, ازىرگە ول جاقتان ناقتى مالىمەت ءتۇسىپ جاتقان جوق.
قالاي دەسەك تە, 15 ادامنىڭ ءومىرىن جالماعان ءورت كوپ شىندىقتىڭ بەتىن اشىپ, سالاعا سالماقتى وزگەرىس اكەلەتىندەي.
قازاقستان رەسپۋبليكاسى باس پروكۋرورىنىڭ ورىنباسارى جاندوس ومىراليەۆتىڭ ايتۋىنشا, بۇگىندە قىلمىستىق كودەكستىڭ 292-بابى 3-بولىگى «ەكى جانە ودان دا كوپ ادامنىڭ قازا بولۋىنا اكەپ سوققان ءورت قاۋىپسىزدىگى تالاپتارىن بۇزۋ» بويىنشا قىلمىستىق ءىس قوزعالعان. مەملەكەت باسشىسى قاسىم-جومارت توقاەۆتىڭ تاپسىرماسى بويىنشا تەرگەۋ جۇمىستارىن جۇرگىزۋ باس پروكۋراتۋرا قۇزىرىنا جۇكتەلگەن. ناقتىسى ورمان ورتىنە قاتىستى ءىس باس پروكۋروردىڭ ەرەكشە باقىلاۋىندا.
«وسى تراگەديانىڭ اۋقىمىن, ەكولوگياعا كەلتىرىلگەن زالالدى, ەڭ باستىسى, قىزمەتتىك مىندەتتەرىن اتقارۋ كەزىندە 14 ورمان قىزمەتكەرىنىڭ قازا تابۋىنا بايلانىستى لاۋازىمدى تۇلعالارعا قاتىستى قىلمىستىق ءىس قوزعادىق. وسى قىلمىستىق ءىستى تەرگەۋ شەڭبەرىندە ءوز مىندەتتەرىنە, قىزمەتىنە جوسىقسىز, جاۋاپسىز قاراعان, سونىڭ سالدارىنان وزىنە جۇكتەلگەن مىندەتتەمەلەردى ورىنداماعان, وسىنداي قايعىلى وقيعالار مەن ادام ولىمىنە اكەپ سوققان بارلىق لاۋازىمدى ادامدار قاتارى بەلگىلەنەتىن بولادى», دەپ ءتۇسىندىردى جاندوس ومىراليەۆ.
ونىڭ ايتۋىنشا, توتەنشە جاعدايلار مينيسترلىگىنىڭ بۇرىنعى باسشىسى يۋري يلين, ەكولوگيا جانە تابيعي رەسۋرستار ءمينيسترى زۋلفيا سۇلەيمەنوۆا, اباي وبلىسىنىڭ اكىمى نۇرلان ۇرانحاەۆ, شىعىس قازاقستان وبلىسىنىڭ اكىمى دانيال احمەتوۆ سىندى لاۋازىمدى تۇلعالاردىڭ ءىس-ارەكەتىنە ءالى ەشقانداي باعا بەرىلمەگەن.
«قوزعالعان قىلمىستىق ءىس اياسىندا قىزمەتتىك مىندەتتەرىنە قاتىستى ءتيىستى شارا قولدانباي, سونىڭ سالدارىنان اۋقىمدى ءورت پەن ادام ولىمىنە اكەپ سوقتىرعانداردىڭ ءبارى ءسوزسىز جاۋاپقا تارتىلادى. قازىر شەنەۋنىكتەردىڭ ارەكەتى سارالانعان جوق, تەرگەۋ ەندى باستالدى. ايتا كەتسەم, جاۋاپقا تەك باسشىلار عانا ەمەس, ورتا بۋىن باسشىلارى دا تارتىلادى, ولار قازىر ءورتتى سوندىرۋگە اتسالىسىپ جاتقانىن ەسكەردىك. ءبىزدىڭ باستى ماقساتىمىز – ءورتتى ءسوندىرۋ. بىراق الداعى ۋاقىتتا ولاردان مىندەتتى تۇردە جاۋاپ الىنادى. تەرگەۋ مەرزىمى ەكى اي», دەپ مالىمدەدى باس پروكۋروردىڭ ورىنباسارى.
ءورت جايلاعان شاقتان بەرى «اتى شىققان» بورودۋليحا اۋدانىنا اكىم بولىپ بۇعان دەيىن اباي وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى قىزمەتىن اتقارعان ايدار يبراەۆ تاعايىندالدى.
«قازاقستان رەسپۋبليكاسى پرەزيدەنتى اكىمشىلىگى مەن بورودۋليحا اۋدانىنىڭ ءماسليحات دەپۋتاتتارىنىڭ كەلىسىمىمەن جانە اباي وبلىسى اكىمىنىڭ وكىمىمەن بورودۋليحا اۋدانىنىڭ اكىمى لاۋازىمىنا تاعايىندالدىم.
اۋدان اۋماعىندا بولىپ جاتقان ورتپەن كۇرەستە جان تاپسىرعان 14 ورمانشىنىڭ وتباسىنا, تۋىستارى مەن جاقىندارىنا قايعىرىپ كوڭىل ايتامىن.
ءورتتى سوندىرۋگە قاتىسىپ جۇرگەن ساربازدار, ورمانشىلار مەن اسكەري قىزمەتكەرلەرگە, ەرىكتىلەرگە, كاسىپكەرلەر مەن شارۋا قوجالىقتارىنا, ءاربىر اۋدان تۇرعىنىنا ەرلىگى, قولداۋى مەن كومەگى ءۇشىن شىن جۇرەكتەن العىس بىلدىرەمىن», دەدى ول ءوزىنىڭ جەكە پاراقشاسىندا. جالىن جايپاعان اۋدانعا جاڭادان قىزمەتكە كەلىپ جاتقان اكىمنىڭ قادامى قايىرلى بولىپ, توتەنشە جاعدايدىڭ تەزىرەك اياقتالۋىنا مول جاردەمى تيسە ەكەن دەپ تىلەك قوستىق.
ال قازىرگى ۋاقىتتا تجم ورتكە قارسى كوميتەت باسشىسى نۇربولات دەربىسوۆ استانا جانە وسكەمەن قالاسىنان كەلگەن ارىپتەستەرىمەن بىرلەسە قيمىلداپ, شۋلبا سۋ قويماسىنا تونگەن قاۋىپتىڭ الدىن الىپ ۇلگەردى.
ء«ورت سوندىرۋشىلەردىڭ شۇعىل ارەكەتتەرىنىڭ ارقاسىندا شۋلبا گەس-ىنە تونگەن قاۋىپ اۋىزدىقتالدى», دەپ مالىمدەدى ن.دەربىسوۆ.
اباي وبلىسى