تارازدا عىلىم جانە جوعارى ءبىلىم مينيسترلىگىنە قاراستى رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعىنىڭ ۇيىمداستىرۋىمەن ونەرتاپقىشتاردىڭ (اۋە, زىمىران, اۆتو, كەمە قۇراستىرۋ) جارىسى ءوتتى, دەپ حابارلايدى Egemen.kz.
ونەرتاپقىش جاستار اراسىندا وتكىزىلگەن بايقاۋعا ەلىمىزدىڭ بارلىق قيىرىنان 180 ۇمىتكەر قاتىسىپ, شەبەرلىكتەرىن ورتاعا سالدى. بايقاۋدىڭ اشىلۋ سالتاناتىنا رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعىنىڭ ديرەكتورى رايسا شەر قاتىسىپ, تەحنيكالىق شىعارماشىلىق باعىتتا ىزدەنىستە جۇرگەن ءبىلىم الۋشىلارعا ساتتىلىك تىلەدى.
اۋە ۇلگىلەۋ باعىتى بويىنشا سىنعا تۇسكەن بالالار مودەلدى دۇرىس قۇراستىرىپ, بيىككە ۇشىرىپ قانا قويماي, اەروباتيكا فيگۋرالارىنا قاتىستى ويلارىن ورتاعا سالدى. وزگە باعىتتار بويىنشا توپقا تۇسكەن جاستاردىڭ بويىنان دا ىزدەنىس ءىزى ايقىن اڭعارىلىپ تۇردى.
بايقاۋ قورىتىندىسىندا جۇزدەن ۇزدىك شىققان ونەرتاپقىش جاستار ماراپاتتالدى.