بيىل قاڭتار-ءساۋىر ارالىعىندا ءسۇت ونىمدەرىنىڭ ءوندىرىسى 173,8 ملرد تەڭگەگە جەتىپ, بىلتىرعى كورسەتكىشتەن 32,9 پايىزعا اسىپ ءتۇستى. وڭىرلىك بولىنىستە ءوندىرىس تۇرعىسىنان سولتۇستىك قازاقستان وبلىسى العا شىقتى. ونداعى ءوندىرىس كولەمى 31,7 ملرد تەڭگەگە جەتىپ, جىلدىق ءوسىم 52,3 پايىزدى قۇراپ وتىر. ەكىنشى ورىندا الماتى وبلىسى. شىعارىلعان ءونىم كولەمىنىڭ سوماسى – 30,4 ملرد تەڭگە, ال ءوسۋ كورسەتكىشى – 28,5 پايىز. ءۇشىنشى ورىندا قوستاناي وبلىسى – 24,6 ملرد تەڭگە جانە 76,6 پايىز.
ءسۇت ونىمدەرى اراسىندا بالمۇزداق ءوندىرىسىنىڭ ءباسى بيىك بولىپ تۇر. ء«تاتتى مۇزداق» ءوندىرۋ 12,5 مىڭ تونناعا دەيىن ارتقان. سونداي-اق وسىمدىك مايى مەن سپرەد ءوندىرىسى دە العاشقى پوزيتسيادا. وڭدەلگەن سۇيىق ءسۇت پەن كىلەگەي ءوندىرىسى 5,3 پايىزعا, 199,6 مىڭ تونناعا ارتسا, سىر مەن سۇزبە ءوندىرىسى – 0,4 پايىزعا, 12,5 مىڭ تونناعا كوبەيگەن. بۇل رەتتە قاتتى كۇيدەگى ءسۇت ءوندىرىسى (54,6 پايىزعا, 1,1 مىڭ تونناعا دەيىن), سونداي-اق يوگۋرت, اشىتىلعان ءسۇت پەن كىلەگەي (1,3 پايىزعا, 76,2 مىڭ تونناعا دەيىن) وندىرىسىندە تومەندەۋ بايقالادى. الايدا اشىتىلعان ءسۇتتى سۋسىندار سەگمەنتىندە قىمىز (65,4 پايىزعا, 964 تونناعا دەيىن) جانە شۇبات (21,1 پايىزعا, 1000 تونناعا دەيىن) ءوندىرىسى ءوستى.
Energyprom مالىمەتى بويىنشا 2023 جىلى قاڭتار-اقپاندا جەرگىلىكتى كومپانيالار ءسۇت ونىمدەرىنە دەگەن سۇرانىستى 85 پايىزعا (بىلتىرعى دەڭگەيدە) قاناعاتتاندىرعان. يمپورت كولەمى 8,2 پايىزعا, 26,4 مىڭ تونناعا ءوستى. بارلىق دەرلىك ءونىم (170,7 مىڭ توننا) ىشكى نارىقتا ساتىلعان. تەك 4,6 مىڭ توننا ءونىم عانا ەكسپورتقا جىبەرىلگەن.
وڭدەلگەن ءسۇت پەن كىلەگەي سەگمەنتىندە كومپانيالار سۇرانىستى 94,6 پايىزعا وتەگەن. يمپورت ءبىر جىلدا 45,9 پايىزعا, 5,5 مىڭ تونناعا ارتقان. ىشكى نارىقتا 101,8 مىڭ توننا ءونىم ساتىلسا, ەكسپورتقا 1 مىڭ توننا ءسۇت شىعارىلىپتى.
ساراپشىلار قازىر وتاندىق ءسۇت نارىعىندا داعدارىس ورناپ تۇرعانىن ايتادى. قازاقستان جىل سايىن 700 ملن دوللاردىڭ ءونىمىن يمپورتتايدى. اۋىل شارۋاشىلىعى مينيسترلىگى ماسەلەنى جاڭا جوبالاردى جۇزەگە اسىرۋ ارقىلى شەشكىسى كەلەدى, بىراق ودان دا قارجىنى قازىرگى جۇمىس ىستەپ تۇرعان كاسىپورىندارعا باعىتتاۋ ءتيىمدى بولار ەدى دەيدى ولار.