بۇل تۋرالى بۇرىنعى دەنساۋلىق ساقتاۋ ءمينيسترى Nege.kz پورتالىنا بەرگەن سۇحباتىندا ايتتى, دەپ حابارلايدى Egemen.kz.
ەكى جىلعا سوزىلعان سوت پروتسەسىنىڭ شەشىمى بويىنشا ءبىرتانوۆ شارتتى تۇردە بەس جىلعا, ونىڭ ورىنباسارى ولجاس ابىشەۆ ءتورت جىلعا سوتتالدى. الايدا ەكس-مينيستر تاعىلعان ايىپپەن كەلىسپەيدى.
ەلجان ءبىرتانوۆتىڭ ايتۋىنشا, ەشقانداي قىلمىس بولعان جوق.
«نەگىزى قىلمىس بويىنشا سوتتا ەكى جاققا دا تەڭ مۇمكىندىك بەرىپ, دالەلدەر كورسەتىلۋى قاجەت. ەڭ ءبىرىنشى وبەكتيۆتى دالەل – «مەملەكەتكە شىعىن كەلتىردى» دەگەن ايىپپەن كەلىسپەۋ. سول سياقتى قىلمىستىڭ موتيۆىنە بايلانىستى تەرگەۋ ورگاندارى مەن پروكۋراتۋرا سوتتا تاعىلعان ەكى ايىپ بويىنشا ەشقانداي دالەل كورسەتكەن جوق», دەدى ەكس-مينيستر.
سونداي-اق ول ونىڭ ورىنباسارى ولجاس ابىشەۆ ەكەۋىنىڭ اراسىندا ەشقانداي موتيۆ بولماعانىن ايتتى.
جۋرناليست مينيستردەن 1.3 ملرد تەڭگە ايىپپۇلدى تولەۋ ءۇشىن قانشا جىل كەرەك ەكەنىن سۇرادى.
بۇرىنعى باسشىنىڭ ايتۋىنشا, ونىڭ ەشقانداي اكتيۆى دە, بيزنەسى دە جوق.
«ناۋرىز ايىندا قارجى ايىبى بويىنشا شاعىم جازىپ, جوعارعى سوتقا بەردىم. ماعان جانە ولجاس ابىشەۆكە بەلگىلەنگەن شەكتەۋدەن باسقا 1,3 ملرد تەڭگە وتەماقى قايتارۋ تۋرالى شەشىم شىقتى. مۇنىمەن دە كەلىسپەيمىن. سوت ءبارىن بىلەدى. مەندە مۇنداي اقشا جوق, بولعان دا ەمەس. مەن نەگە, نە ءۇشىن قايتارامىن؟
بۇل اقشانى حورۆاتيانىڭ كومپانياسى اتقارعان جۇمىسىنا العان. ەگەر كومپانيانىڭ جۇمىسىنا شاعىم بولسا, ايىپپۇل وتەماقىسىن نەگە حورۆاتياعا سالمايدى؟ نەگە ماماندارىن شاقىرىپ, قايتا جاساتپايدى؟ سول جاعى مۇلدەم تۇسىنىكسىز. جاي قاراپايىم ادامعا قالاي 3 ملن دوللار ايىپپۇل سالادى؟ مەن – دارىگەرمىن. ايەلىم دە دارىگەر. 30 جىل بويى مەملەكەتتىك سالادا جۇمىس ىستەپ كەلەمىن. ەشقانداي اكتيۆىم دە, بيزنەسىم دە جوق. ومىرگە ءۇش مارتە قايتا كەلسەم دە, 1,3 ملرد تەڭگە ايىپپۇلدى جابۋعا جەتكىزە المايمىن. ويتكەنى تابيعاتىمىزدان ەلگە ەڭبەك ەتەتىن وتباسىمىز. باۋىرلارىم دا مەملەكەتتىك قىزمەتتە», دەدى ە.ءبىرتانوۆ.
سونداي-اق ول ءۇش جۇمىس ورنىندا ءجۇرىپ, وتباسىن باعىپ جۇرگەنىن ايتتى.
«بانك ەسەپشوتتارىم بۇعاتتالعان. قازىر بالا-شاعامدى اسىراۋ ءۇشىن ءۇش جەردە جۇمىس ىستەيمىن. ءۇش مەكەمەدەن الاتىن ايلىعىمنىڭ 50 پايىزى وتەماقى رەتىندە دەنساۋلىق ساقتاۋ مينيسترلىگىنە كەتىپ جاتىر», دەدى ول.
ايتا كەتەيىك, دەنساۋلىق ساقتاۋ ەكس-ءمينيسترى ەلجان ءبىرتانوۆ پەن ورىنباسارى ولجاس ابىشەۆكە قر قىلمىستىق كودەكسىنىڭ 361-بابى, 4-تارماعى بويىنشا ايىپ تاعىلىپ, 2020 جىلى قاماۋعا الىنعان ەدى.