الەۋمەتتىك جەلىدە بالالارعا ارنالعان كونتەنت بارشىلىق. الايدا اتا-انالار ورىس تىلىندەگى بەينەماتەريالداردى تاماشالاپ جەتىلگەن بالانىڭ قازاق تىلىنە شورقاقتاۋ بولاتىنىن بىلەدى. جۋىردا بالدىرعاندارعا جول تارتقان «Phenomenal kids» تانىمدىق ويىن-ساۋىق جوباسى وسى ولقىلىقتىڭ ورنىن تولتىرار دەگەنگە ءۇمىت باسىم.
قازاق تىلىندە ازىرلەنگەن «Phenomenal kids» جوباسى ارقىلى بالدىرعاندار الەۋمەتتىك جەلىدە ەرتەگى, بەسىك جىرىن تىڭداي الادى. سونداي-اق پلاتفورمادا بالالاردى دامىتۋعا ارنالعان كونتەنت جاريالاندى. ايتا كەتەرلىگى, جوبانى ازىرلەۋگە ارتىستەر مەن ەلگە تانىمال بەلسەندى ازاماتتار ۇلەس قوسقان. مۇنىڭ بارلىعىن جوبانىڭ تانىستىرىلىمىندا يدەيا اۆتورى, پروديۋسەر ازات ابىكەن تارقاتىپ ايتتى.
– ءبىز ءبىر توپ بەلسەندى ازاماتتىڭ باسىن قوسىپ, وتاندىق بالالار كونتەنتىن ازىرلەدىك. بۇل دۇنيەمىز ەڭ اۋەلى قازاق تىلىندە, سوسىن اعىلشىن جانە ورىس تىلىندە قولجەتىمدى. ءبىزدىڭ ءونىمدى ەلگە تانىمال ارتىستەر دىبىستادى. ءبىرىنشى جيناقتا اۋەنگە باسىمدىق بەردىك. ەكىنشى جيناققا قازاق ەرتەگىلەرىن توپتاستىردىق. ءبىز جاڭا ءداۋىردىڭ تەحنولوگياعا بەيىم بالالارى اقپاراتتى جىلدام قابىلدايتىنىن بىلەمىز. سوندىقتان بالاقايلارعا تۇسىنىكتى بولسىن دەگەن نيەتتە تاسپاعا جاڭا نۇسقادا 12 ەرتەگى ەنگىزدىك. ەرتەگىلەردى دە ەلگە ەسىمى بەلگىلى ازاماتتار دىبىستادى. ءۇشىنشى جيناقتا ارينە بالالاردى دامىتاتىن كونتەنتتەر ازىرلەدىك. ياعني مۇندا بالالار اۋەزدى ءان ارقىلى ءارىپ تانىپ, ساناۋدى, تۇستەردى اجىراتۋدى, تازالىق ساقتاۋدى ۇيرەنەدى. جانۋارلار الەمىمەن تانىسىپ, ءتىپتى جاڭا ماماندىقتار جايىندا اقپارات الا الادى. ءبىز بالالارعا ساپالى كونتەنت ۇسىنۋدى مىندەتىمىز دەپ سانادىق. سوندىقتان جوبانى ءوز كۇشىمىزبەن, ءوز قاراجاتىمىزعا باستادىق. جوباعا قولداۋ كورسەتكەن ازاماتتارعا العىس ايتامىز. بۇل ءبىز ىسكە اسىرۋعا وقتالعان ۇلكەن جۇمىستىڭ ءبىرىنشى ساتىسى عانا دەپ ويلايمىز. سوندىقتان جىل سوڭىنا دەيىن بالالار كونتەنتىنە بەيجاي قارامايتىن سەرىكتەستەرىمىز پايدا بولار دەگەن ۇمىتتەمىز. جاڭا ءداۋىردىڭ بالالارى بىزدەن الدەقايدا دارىندى, شيراق ءارى مىقتىراق. سولاي بولۋى دا زاڭدىلىق. بالالار ءبىز جاساعان ءونىم ارقىلى اۋەلى قازاق تىلىندە ەركىن سويلەپ, سوسىن ورىس تىلىنەن بۇرىن اعىلشىن ءتىلىن توتە ۇيرەنە الادى. وسى كونتەنتتى پايدالانعان بالالار باسەكەگە قابىلەتتى بولىپ جەتىلسە ەكەن دەيمىز, دەگەن جوبا جەتەكشىسى جوبانى ۇيلەستىرۋگە ۇلەس قوسقان شىعارماشىلىق ۇجىمدى كوپشىلىككە تانىستىردى.
وسى تۇستا جوبانىڭ كومپوزيتورى اسكەر ابدراحمانوۆ قازاقشا بالالار كونتەنتىن ازىرلەۋ يدەياسى قالاي تۋعانىن ايتىپ بەرگەن ەدى.
– پاندەميا كەزىندە مەنىڭ تۇڭعىشىم دۇنيەگە كەلدى. ارينە وتباسىمىزدىڭ ۇلكەن-كىشىسى تۇگەل بالاعا كوڭىل اۋداردى. سول تۇستا بالامىزعا قازاق تىلىندە كونتەنت كەرەگىن تۇسىندىك. وسىلايشا, ءبىرىنشى بەسىك جىرىن جازدىق. سوسىن دامىتقىشتى دايىندادىق. ۋاقىت وتە كەلە ءبىرشاما ساپالى دۇنيە جينالدى. ەندى وسىنى نەگە ەلدەگى بارشا بالاعا ۇسىنباسقا دەگەن وي مازالادى. بىلتىر قاراشادا جوبانى مىقتاپ قولعا الىپ, وسى كۇنگە دەيىن ىسكە اسىرعان جۇمىستاردى توپتاستىردىق. ازىرگە ءبىزدىڭ ءونىم ەكى-ءۇش جاسار بالالارعا ارنالعان. كەلەشەكتە مۋلتفيلمدەرگە كوڭىل اۋدارامىز دەپ وتىرمىز, دەيدى ول.
بالالار قازاقشا كونتەنت ارقىلى قازاقتىڭ سالت-ءداستۇرىن, مادەنيەتىن ءبىلىپ, قورشاعان ورتانى انا تىلىندە تانىپ وسەدى. ول ءۇشىن ءبىرىنشى كەزەكتە قازاق تىلىندەگى كونتەنت ءار الۋان بولسا, ونى تاماشالعان بالا جالىقپاي, كەرىسىنشە, قىزىقسا يگى. بالالارعا ساپالى دۇنيە ۇسىنۋدى ويلاعان «Phenomenal kids» جوباسىنىڭ اۆتورلارى بۇلدىرشىندەردىڭ تالعامىن ەلەپ-ەسكەرگەنى قۋانتادى. مىسالى, جوبا ۇيلەستىرۋشىلەرى دايىن ءونىمدى اۋەلى وزدەرىنىڭ بالالارىنا ۇسىنعان. ياعني ساپالى دۇنيەگە ءبىرىنشى بولىپ وڭ باعا بەرگەن – ەرەسەكتەر ەمەس, بۇلدىرشىندەردىڭ ءوزى. «Phenomenal kids». كوپشىلىك نەگە جوبا اعىلشىن تىلىندە اتالدى دەپ ويلاسا كەرەك. مۇنىڭ سەبەبى, جوبا جەتەكشىلەرى وتاندىق ءونىمدى حالىقارالىق دەڭگەيدە تانىتۋدى ماقسات تۇتىپ وتىر. قازاق تىلىندەگى بالالار كونتەنتىنىڭ جاناشىرلارى جىل سوڭىنا دەيىن ءبىر ەرتەگىنى مەملەكەت باسشىسى انا تىلىمىزدە دىبىستاسا دەگەن نيەتتە. ەندەشە, ءبىز دە قازاق تىلىندەگى بالالار كونتەنتىن ازىرلەۋگە ءۇن قوسقان بەلسەندى ازاماتتارعا تابىس تىلەيمىز. قۇلاققاعىس رەتىندە ايتار بولساق, «Phenomenal kids»-ءتىڭ بالالارعا ارنالعان ساپالى دۇنيەلەرى الەۋمەتتىك جەلىدەگى بارلىق پلاتفورمادا قولجەتىمدى.