4 ماۋسىم — مەملەكەتتىك رامىزدەر كۇنى. قازاقستان رامىزدەرى 1992 جىلدىڭ 4 ماۋسىمىندا قابىلداندى, دەپ حابارلايدى Egemen.kz.
«قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 جىلدىڭ 4 ماۋسىمىندا قابىلداندى. وسى زاڭعا سايكەس جىل سايىن رامىزدەر كۇنى 4 ماۋسىمدا اتاپ وتىلەدى.
قازاقستان رەسپۋبليكاسىنىڭ رامىزدەرى – تۋ, ەلتاڭبا, ءانۇران.
ءاربىر ءرامىز - قاستەرلى قۇندىلىق. رامىزدەردەرگى ءار سيمۆولدىڭ ءوز ءمانى بار. ماسەلەن, تۋدا بەينەلەنگەن قىران ەركىندىكتى, كۇن مولشىلىق پەن بايلىقتى, كوك ءتۇس بەرەكە, تىنىشتىق بىرلىكتى بىلدىرەدى. مەملەكەتتىك تۋىمىز 1200 نۇسقانىڭ ىشىنەن تاڭدالعان.
قازاقستان رەسپۋبليكاسى مەملەكەتتىك تۋىنىڭ اۆتورى – قازاقستاننىڭ ەڭبەك سىڭىرگەن ونەر قايراتكەرى شاكەن نيازبەكوۆ.
ەلىمىزدىڭ ەلتاڭباسىندا ۇلتىمىزدىڭ تاريحى مەن مادەنيەتى كورىنىس تاپقان. قازاقستان رەسپۋبليكاسى مەملەكەتتىك ەلتاڭباسىنىڭ اۆتورلارى – بەلگىلى ساۋلەتشىلەر جانداربەك مالىبەكوۆ پەن شوت-امان ءۋاليحانوۆ.
اسقان شەبەرلىكپەن جاسالعان ەلتاڭبا 293 جوبانىڭ ىشىنەن ۇزدىك دەپ تانىلعان.
ەلتاڭبا اۆتورى جانداربەك مالىبەكوۆ ەلتاڭبانىڭ فيلوسوفيالىق ءمانى تۋرالى بىلاي دەيدى: ء«بىزدىڭ مورىمىزدە حالقىمىزدىڭ اتا-بابالارى – ساق, عۇن, تۇرىك, قىپشاقتان باستاۋ الاتىن قانشا مىڭ جىلدان اسا تاريحى مەن مادەنيەتىن كورسەتۋدى كوزدەدىم. وسى ماقسات ميىمنىڭ ءبىر تۇكپىرىنەن ورىن الىپ, شىقپاي قويعاندا قازاقتىڭ كۇندەلىكتى تۇرمىستا ايتىلاتىن «شاڭىراعىڭ بيىك, بوساعاڭ بەرىك, كەرەگەڭ كەڭ بولسىن!» دەگەن تىلەكتەر سانامدا قايتا جاڭعىردى».
اۆتور ەلتاڭبانى وزبەكستاندا جۇرگەندە جاساعان.
«ەلتاڭبا – وتانىما دەگەن ساعىنىشىمنىڭ جەمىسى, شەتتەگى قارادومالاقتىڭ تەرەڭ تاريحى, جوعارى مادەنيەتى, ولمەيتىن رۋحى, تاربيە تۇنعان سالت-ءداستۇرى, باي ونەرى ساقتالعان ەگەمەن ەلىنىڭ بار ەكەنىنە دەگەن ماقتانىشىنىڭ, وسىنىڭ ءبارىن مويىنداماعاندارعا ءوز كاسىبىمەن كورسەتكىسى كەلگەن ساۋلەتشى ەڭبەگىنىڭ ناتيجەسى. بۇعان قوسا تۋعان جەردەن جىراقتا جۇرگەن جانعا تاۋەلسىز مەملەكەتىنىڭ ىرگەتاسىن قالاۋعا اتسالىسۋ, وسىنداي تاريحي جولدا قولتاڭباسى مەن ءوز ءىزىن قالدىرۋ – ەشتەڭەمەن الماستىرمايتىن اسقاق ابىروي, قاسيەتتى قىزمەت», دەيدى جانداربەك مالىبەكوۆ «Egemen Qazaqstan» گازەتىنە بەرگەن سۇحباتىندا.
قر مەملەكەتتىك ءانۇرانى 2006 جىلدىڭ 7 قاڭتارىندا پارلامەنتتە بەكىتىلگەن. سونداي-اق ول العاش رەت تۇڭعىش پرەزيدەنتتى ۇلىقتاۋ راسىمىندە ورىندالعان.
زاڭ بويىنشا (قر قازاقستان رەسپۋبليكاسىنىڭ مەملەكەتتىك رامىزدەرى تۋرالى زاڭىنىڭ 9-باپ, 1-تارماعى) مەملەكەتتىك ءانۇران شىرقالعان كەزدە ونى ورنىنان تۇرىپ ايتۋ جانە وڭ قولىن جۇرەك تۇسىنا قويۋ مىندەتتەلەدى.
ءاننىڭ اۆتورى - ءشامشى قالداياقوۆ, ءسوزىن جازعاندار - جۇمەكەن ناجىمەدەنوۆ, نۇرسۇلتان نازارباەۆ.