قوستانايدا «Kardeş Kalemler» جۋرنالىنىڭ ۇلت ۇستازى احمەت بايتۇرسىن ۇلى مەن الاش قايراتكەرى سەيدازىم قادىرباي ۇلىنا ارنالعان ساندارىنىڭ تانىستىرىلىمى ءوتتى.
تۇركىتىلدەس 37 ەلگە تارايتىن حالىقارالىق جۋرنالدى تۇركياداعى ەۋرازيالىق جازۋشىلار وداعى (توراعاسى ياكۋب ومەروعلى)شىعارادى. ايىنا ءبىر رەت وقىرمانعا جول تارتاتىن باسىلىمنىڭ اتاۋى قازاق تىلىندە «باۋىرلاس قالامدار» دەگەن ۇعىمدى بەرەدى.
توبىل تورىندەگى الاش قايراتكەرى سەيدازىم قادىرباي ۇلىنا ارنالعان حالىقارالىق عىلىمي كونفەرەنتسياعا كەلگەن تۇركيا عالىمدارىنىڭ ايتۋىنشا, «Kardeş Kalemler» ادەبي-پۋبليتسيستيكالىق جۋرنالىندا ەلۋدەن استام مەملەكەتتىڭ عالىم-قالامگەرلەرىنىڭ ماقالالارى, ولەڭدەرى مەن پروزالىق شىعارمالارى جاريالانىپ تۇرادى. كەيدە شىعارۋشىلار جۋرنالدىڭ بۇتىندەي ءبىر سانىن باسىنان اياعىنا دەيىن تۇركى الەمىنىڭ اسا كورنەكتى تۇلعالارىنا ارنايدى.
– مىسالى, بىلتىر احمەت بايتۇرسىن ۇلىنىڭ 150 جىلدىعىنا وراي بۇل جۋرنالدىڭ قىركۇيەكتەگى سانى تولىقتاي اقاڭا ارنالدى. ۇلت ۇستازىن زەرتتەۋشىلەردىڭ ەڭبەكتەرىن جيناپ, باسپاعا دايىنداعان پروفەسسور نەرگيز بيراي. ءبارىمىز ءبىر-ءبىر ماقالادان قوسىپ, سول جاقتا احمەت اتامىزدىڭ مۇراسىن بارىنشا ناسيحاتتاۋعا ۇلەس قوستىق. ول جۋرنالدىڭ تۇساۋكەسەرى قازاقستان رەسپۋبليكاسىنىڭ تۇركياداعى ەلشىلىگىندە ۇيىمداستىرىلدى. بيىل جۋرنالدىڭ ءبىر سانى الاش قايراتكەرى سەيدازىم قادىرباي ۇلىنا ارنالىپ وتىر. شىندىعىندا, سەيدازىم اتامىزدى شەتەل تۇرماق, قازاقستاننىڭ وزىندە كوپ ادام بىلە بەرمەيدى. سوندىقتان باستان-اياق كوپشىلىككە جىلدار بويى بەيمالىم بولىپ كەلگەن الاش ارداقتىسىنىڭ ءومىربايانى, تۇلعاسى, ەلگە ەتكەن ەڭبەگىنە ارنادىق. مۇنداعى ماقساتىمىز – قايراتكەردى تۇركياداعى حالىققا تانىستىرۋ جانە تۇرىكشە بىلەتىن جۇرتشىلىق ارقىلى الەمگە تانىتۋ, – دەيدى PhD, انكارا قاجى بايرام ءۋالي ۋنيۆەرسيتەتىنىڭ تاريح پروفەسسورى گۇلجانات قۇرمانعاليەۆا-ەردجيلاسۋن.
«Kardeş Kalemler» جۋرنالىنىڭ بۇتىندەي ءبىر سانى 2020 جىلى قازاقتىڭ باس اقىنى ابايدىڭ 175 جىلدىعىنا ارنالعانى ءمالىم.
قوستاناي وبلىسى