وسى كۇندەرى ەۋروپانىڭ كوك مايسا الاڭدارىندا چەمپيوندار ليگاسى مەن ەۋروپا ليگاسىنىڭ ەكىنشى ىرىكتەۋ كەزەڭىنىڭ ويىندارى وتۋدە.
بۇل سىنعا ەلىمىزدىڭ بىلتىرعى چەمپيونى «اقتوبە», الماتىنىڭ «قايرات», قاراعاندىنىڭ «شاحتەر» جانە «استانا» كلۋبتارى قاتىسۋدا.
سارسەنبى كۇنى «اقتوبە» چەمپيوندار ليگاسىنداعى جارىسىن ەكىنشى كەزەڭنەن باستاپ, سىرت الاڭدا گرۋزيانىڭ «دينامو» (تبيليسي) كومانداسىن 1:0 ەسەبىمەن ۇتتى. جەرەبە كەشەگى كەڭەس وداعى كەزىندە اتاعى دۇركىرەگەن ءتبيليسيدىڭ «ديناموسىمەن» تۇيىستىرگەندە «اقتوبەنىڭ» جەڭەتىنىنە ءبىراز كۇماندانعان بولاتىنبىز. ويتكەنى, ەل چەمپيوناتىندا اقتوبەلىكتەر «قايراتتان» 1:7 ەسەبىمەن ۇتىلىپ, ونىڭ ۇستىنە كومانداعا جاڭا جاتتىقتىرۋشى كەلگەن بولاتىن. بىراق, بەكەر كۇماندانعان ەكەنبىز. «اقتوبە» سىرت الاڭدا شىنىمەن دە جاقسى ويىن ورنەگىن كورسەتتى. بۇل كەزدەسۋدە قازاقستاندىق كوماندا قورعانىسقا باسا ءمان بەرىپ, دۇرىس تاكتيكانى ۇستاندى. سونىڭ ناتيجەسىندە ويىن بويى بولعان از عانا مۇمكىندىكتىڭ بىرەۋىن ۇتىمدى پايدالانىپ, جەڭىسكە جەتتى. ماتچتاعى جالعىز دوپتى ەكىنشى تايمدا برازيليالىق لەگيونەر دانيلو نەكو سوقتى. «اقتوبە» سىرت الاڭدا ماڭىزدى ءۇش ۇپايدى اكەتتى. ەندى كەلەسى كەزدەسۋ 23 شىلدە كۇنى اقتوبەدە وتەدى. ەگەر وسى ويىندا «دينامودان» وتسە, ءۇشىنشى كەزەڭدە «اقتوبە» رۋمىنيانىڭ «ستياۋا» كومانداسىمەن كەزدەسەدى.
بەيسەنبى كۇنى «استانا», «قايرات» جانە «شاحتەر» كلۋبتارى ەۋروپا ليگاسىنىڭ ەكىنشى ىرىكتەۋ كەزەڭىندەگى العاشقى ماتچتارىن وتكىزدى. ەستەرىڭىزدە بولسا, ءبىرىنشى ەلەكتىك كەزەڭدە «استانا» ارمەنيانىڭ «پيۋنيك», «شاحتەر» ارمەنيانىڭ «شيراك», «قايرات» البانيانىڭ «كۋكەس» كوماندالارىن ۇتىپ, كەلەسى اينالىمعا شىققان بولاتىن. بۇل جولى ءبىزدىڭ كلۋبتار ىشىندە «استانا» عانا العاشقى ماتچىن ءساتتى وتكىزدى. «استانا» ءوز الاڭىنداعى ويىنىن جەڭىسپەن باستاپ, ءيزرايلدىڭ «حاپوەل» كلۋبىن 3:0 ەسەبىمەن ۇتتى. بۇل كەزدەسۋدە «استانانىڭ» ساپىندا كانياس پەنالتيدەن ءبىرىنشى بولىپ ەسەپ اشسا, سوڭىن الا تاڭات نوسەرباەۆ پەن ابزال بەيسەبەكوۆ ءبىر-ءبىر گولدىڭ اۆتورى اتاندى. وسىلاردىڭ ىشىندە جانكۇيەرلەرگە تاڭاتتىڭ ەكىنشى تايمدا سوققان گولى ۇناعانىن ايتۋ كەرەك. وسىدان كەيىن «استانانىڭ» ساپىندا ابزال بەيسەبەكوۆ تە ادەمى گول سوقتى.
ەندى كەلەسى ماتچ 24 شىلدە كۇنى يزرايلدەگى ساياسي جاعدايعا بايلانىستى كيپردە وتەدى دەلىنۋدە.
ال «قايرات» ەۋروپا ليگاسىنىڭ ەكىنشى ىرىكتەۋ ساتىسىنداعى العاشقى ماتچىندا دانيالىق «ەسبەرگ» كلۋبىمەن 1:1 ەسەبىمەن تەڭ ءتۇستى. دانيالىق كوماندا وسال ەمەس ەكەن. «قايرات» وسى جولى دا ءوز الاڭىندا جەڭۋگە تىرىسىپ ەدى, بىراق وعان تاجىريبەلى ويىنشىلارى بار «ەسبەرگ» كونگەن جوق. ءتىپتى, كەرىسىنشە, داتتار الماتىعا تەك جەڭىس ءۇشىن عانا كەلگەندەرىن كورسەتىپ, بىرنەشە قاۋىپتى جاعدايلار جاساپ وتىردى. ءبىرىنشى تايمدى وسىلاي قارسىلاستار ەسەپ اشا الماي اياقتادى. ال ەكىنشى تايمنىڭ باسىندا باۋىرجان يسلامحاننىڭ تەپكەن دوبى دات قورعاۋشىسىنىڭ قولىنا ءتيىپ, تورەشى پەنالتي بەردى. وسى مۇمكىندىكتى پايدالانىپ, يوسيپ كنەجەۆيچ 11 مەترلىك پەنالتيدەن دوپ سوقتى. بۇدان كەيىن «ەسبەرگ» شابۋىلىن كۇشەيتىپ, ويىن سوڭىندا ءوز دەگەندەرىنە جەتتى. كەزدەسۋدىڭ نەگىزگى ۋاقىتى ءبىتىپ, قوسىمشا بەرىلگەن مينۋتتاردا ەسەپتى تەڭەستىرىپ كەتتى. ەندى «قايراتقا» سىرت الاڭدا وڭاي بولمايدى.
«شاحتەر» كلۋبى دا ەۋروپا ليگاسىنىڭ ەكىنشى ەلەكتىك ساتىسىنداعى ءبىرىنشى ماتچىندا تەڭ ءتۇستى. بىراق ولار ءوز الاڭىندا ەمەس, ليتۆادا «اتلانتاس» كومانداسىمەن كەزدەسىپ, 0:0 ەسەبىمەن تەڭ تارقاستى. بۇل ويىندا «شاحتەر» باسىمدىق تانىتتى. الاڭ يەلەرىنىڭ دە گول سوعۋعا مۇمكىندىكتەرى بولدى. سونىڭ ءبىرى قاراعاندى كلۋبىنىڭ قاقپاسىنىڭ باعاناسىنا ءتيىپ, كەرى قايتتى. وسىدان كەيىن «شاحتەر» تىزگىندى الۋعا تىرىسىپ, كوپ شابۋىلداپ, قاقپاعا قاراي كوپ سوققى باعىتتادى. سونىڭ بىرىندە قاراعاندىلىقتاردىڭ ءبىر سوققىسى دا قاقپا باعانىنان قايتتى. ەندى «شاحتەر» كەلەسى ماتچىن 24 شىلدە كۇنى ءوز الاڭىندا وتكىزەدى. وسى كەزدەسۋدە وتانداستارىمىز جەڭەدى دەپ ۇمىتتەنەمىز.
داستان كەنجالين,
«ەگەمەن قازاقستان».